قازاقستاندىق نۇرسۇلتان عالامشاردىڭ ۇزدىك سپورتشىسى بولىپ تانىلدى

استانا. قازاقپارات - دۇنيەجۇزىلىك تاەكۆوندو فەدەراتسياسى ق ر ق م ارميا ورتالىق سپورت كلۋبىنىڭ قاتىسۋشىسى قاتارداعى جاۋىنگەر نۇرسۇلتان مامايەۆتى عالامشاردىڭ ۇزدىك سپورتشىسى ەكەنىن جاريا ەتتى.

بۇل مارتەبە قازاقستاندىق سپورتشى جاۋىنگەرگە مانچەستەردەگى (ۇلى بريتانيا) تاەكۆوندودان (WTA Grand Prix) الەمدىك گران-پري كەزەڭىندە ءساتتى ونەر كورسەتۋدەن كەيىن بەرىلدى. بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.

58 كەلىگە دەيىنگى سالماقتا نۇرسۇلتان مامايەۆ يسپانشى جەزۋس تورتوس كابرەرومەن ايقاسۋدا جەڭىسكە جەتىپ، الەمنىڭ 30 مىقتى تاەكۆوندوشىسى اراسىنداعى ابسوليۋتتىك چەمپيون اتاندى.

«قازىر نۇرسۇلتان ورلەۋ ۇستىندە. ول ءىرى الەمدىك تۋرنيرلەردە بىرنەشە مارتە جەڭىستەرىمەن ءوزىنىڭ شەبەرلىگىن راستاي وتىرىپ، قارقىندى تۇردە جوعارىعا قاراي ىلگەرىلەۋدە. سوڭعى ۋاقىت ىشىندە ول قاتارىنان بىرنەشە رەيتينگتىك سايىستاردى جەڭىپ الدى. قازىرگى كەزدە ريو-دە-جانەيروداعى وليمپياداعا ليتسەنزيا الۋعا بىردەن-ءبىر ۇمىتكەر بولىپ تابىلادى جانە جوعارى ماراپاتتاردى الۋدى كوزدەپ وتىر»، - دەپ اتاپ وتۋدە تاەكۆوندودان كوماندا باستىعى ق ر ق م ا و س ك- نىڭ كاپيتانى ءانۋار ۇسەنوۆ.

نۇرسۇلتان مامايەۆ 2010-جىلعى جازعى جاسوسپىرىمدەردىڭ وليمپيالىق ويىندارىنىڭ كۇمىس جۇلدەگەرى، 2012-جىلعى لوندوندىق وليمپيادانىڭ قاتىسۋشىسى، ازيا ويىندارىنىڭ كۇمىس جۇلدەگەرى (2014)، جازعى ۋنيۆەرسيادا جانە VI دۇنيەجۇزىلىك ارميا ويىندارىنىڭ جەڭىمپازى (2015)، بىرنەشە دۇركىن جەڭىمپاز جانە حالىقارالىق رەيتينگتىك تۋرنيرلەردىڭ جۇلدەگەرى. ول ق ر ق م ارميا ورتالىق سپورت كلۋبىنىڭ دارىندى سپورتشىلارىنىڭ ءبىرى. وعان وتاندىق اسكەري سپورتتى دامىتۋدا ەرەكشە ءۇمىت ارتىلىپ وتىر.