شەتەلدىك تۋركومپانيالار و ق و- دا كيىز ۇيلەر قالاشىعىن اشۋدى ۇسىندى
بۇل اقپاراتتىق تۋر 4 كۇن بويى ءوتتى. وعان قازاقستان، رەسەي، فرانسيا، اۆستراليا، لاتۆيا جانە اراب امىرلىگىنىڭ تۋريستىك كومپانيالار وكىلدەرى مەن بلوگەرلەرى قاتىستى. دەلەگاتسيا تۇركىستان، وتىرار، سارى اعاش اۋداندارىندا بولىپ، شىمكەنتتىڭ كورىكتى جەرلەرىن ارالادى.
قوجا احمەت ياسساۋي مەن ارىستانباب مازارلارى قىزىعۋشىلىق تۋدىرعانى اتالىپ ءوتىلدى.
قوناقتارعا ۇلتتىق سۋسىندار ۇسىنىپ، ونى قالاي جاسايتىنىن كورسەتتى. وسى شارا ارقىلى ايماق باسشىلىعى مەن «تۋريزم يندۋسترياسىن دامىتۋ ورتالىعى» قاۋىمداستىعى تۋريزمدى دامىتپاق.
قوناقتار وڭتۇستىكتىڭ تۋريستىك مۇمكىندىكتەرىن باعالاپ، ۇسىنىستارىن ءبىلدىردى. ولار ۇلتتىق ناقىشتاعى كيىز ءۇي قالاشىعى كەيپىندە قوناقۇيلەر اشۋدى ۇسىندى.
سونىمەن قاتار كاسىبي گيدتەر مەن ساياحات جۇرگىزۋشىلەردى دايىنداۋدى ۇسىندى.
اتاپ ءوتۋ كەرەك، بۇل اقپاراتتىق تۋر «ەكسپو-2017» حالىقارالىق كورمەسىنە دايىندىق اياسىندا ءوتتى.
