ا ق ش- تا تۇراتىن الماتىلىق بويجەتكەن گولوۆكيننىڭ جەكپە-جەگىنەن العان اسەرىن ايتىپ بەردى - فوتو
ول گولوۆكيننىڭ جانكۇيەرلەرى جايلى ايتىپ، Madison square garden ارەناسىنداعى جاعدايدى باياندايدى.
قازاقستاندا تۇرعانىمدا كاسىبي جەكپە-جەكتە بولۋدى، ءوز كوزىممەن كورۋدى ارماندادىم، رينگتە نە بولىپ جاتقانىن بىلگىم كەلدى. ارماندار ورىندالادى. كاسىبي جەكپە-جەكتى ءوز كوزىممەن كورىپ قانا قويماي، جەرلەسىمنىڭ جەڭىسىنە كۋاگەر بولدىم.
لاس-ۆەگاستان نيۋ-يورككە تاڭعى 7 دە ۇشىپ كەلدىم (نەگىزىندە مەن نيۋ-يوركتە تۇرامىن، ال سول كەزدە لاس-ۆەگاستا دەمالىپ جاتقانمىن). وفيتسەر مەنىڭ پاسپورتىمدى كورىپ، «قازاقستان؟» دەپ تاڭعالدى.
«يەس، سەر!»، - دەپ قويامىن وعان.
«و، گولوۆكين! مەن ونى قۇرمەتتەيمىن، - دەيدى ول. - بۇگىن ونىڭ جەكپە-جەگى عوي، باراسىڭ با؟».
«ارينە، بارامىن، سەر، نيۋ-يورككە سول ءۇشىن كەلدىم عوي!»، - دەيمىن وعان. امەريكالىق بولسا كۇلىمسىرەپ، جۇكتەردى الاتىن ورىنعا نۇسقادى، ونىمەن قويماي، جەتىستىك تىلەپ، گەناعا سالەم جولداپ جاتتى. ءوزىم دە بوكسشىعا سالەمىمدى ايتىپ قالامىن دەگەن ۇمىتپەن، وعان دا كەلىسىم بەردىم.
بيلەتتەر ءبىر اي بۇرىن ساتىپ الىنىپ قويعان. 115- سەكتسيا - ەكىنشى قاتار، تىم الىس ەمەس. ءساتتى بولدى، بيلەت قۇنى - 350 دوللار، كىرەبەرىستە وسى بيلەتتەردى بىرەۋلەر ەكى ەسە قۇنىنا ساتىپ جاتتى.
كەشكى 6:30، جەكپە-جەككە بارا جاتىرمىن. 34 Herald square - بۇل جول مەنى اڭىزعا اينالعان Madison square garden ارەناسىنا اپارا جاتتى، ءدال وسى جەردە اتاقتى مۇحاممەد ءالي، دجو فرەيزەر، تايسون، روي دجونس سياقتىلار جۇدىرىقتاسقان.
كوشەدە مۇحيت تەڭىزى بۋسانىپ جاتتى، ءبىراق ءبىز ودان ۇرەيلەنۋدىڭ ورنىنا، گەناعا قولداۋ بىلدىرەتىنىمىزدى ويلاپ، كوڭىل-كۇيىمىز تولقىپ تۇردى. «ارەنادان» ءبىر كۆارتال جەردىڭ وزىندە قازاقتاردى كورۋگە بولادى، سول كۇنى كوشەدەن قازاقتاردى كوپ كوردىم. ءبىزدىڭ تۋىمىز ونسىز دا جاپ-جارىق Eight avenue كوشەسىن جارقىراتىپ جىبەردى.
ءدال وسى كۇنى ءبىزدىڭ قازاقتاردىڭ بىرلىگى جاراسادى - بارلىعى ءبىر-بىرىمەن سالەمدەسىپ، تانىسىپ جاتادى. ال ىشىندە قاراعاندىلىقتارى بولسا ءتىپتى ماقتانىشتارى كەرنەپ جۇرەدى. بىرەۋ گولوۆكيندى «گەنا اعا» دەپ، اڭگىمەسىن ايتىپ جاتاتىن. «ءبىز بالا ەدىك، ول جەرگىلىكتى كلۋبتا جۇدىرىقتاسىپ جۇرەتىن» دەگەن اڭگىمەلەر ايتىلادى.
جولدىڭ قيىلىسىندا جەيدەلەرى مەن باس كيىمدەرىنە «GGG» دەگەن جازۋدى جازىپ العان يسپانداردى كوردىم. قۇددى ءبىزدىڭ باراحولكا سياقتى.
ساۋداسى جاقسى ءجۇردى: ءبىر كەپكا 20 دوللار تۇرادى، ال فۋتبولكانىڭ قۇنى - 25 دوللار. مەن دە «GGG» دەگەن كەپكا ساتىپ الدىم. ارمەن قاراي جۇرگىم كەلگەن، ءبىراق گولوۆكيننىڭ اتريبۋتيكاسىمەن بىرگە رەسەي فەدەراتسياسىنىڭ تۋلارىنىڭ دا ساتىلىپ جاتقانىن بايقاپ قالدىم. «نەگە؟ گەنا قازاقستاننان عوي؟»، - دەپ سۇرادىم. قازاقستان تۋىنىڭ قانداي ەكەنىن كورسەتىپ جاتىرمىن. «ميسس، تاپپاي قويدىق، «امازوندا» جوق ەكەن، ءبىراق Russia بايراعىن تاپتىق، سىزدەردە ك س ر و عوي»، - دەيدى كاسىپكەرلەر.
«مىرزالار، - دەدىم مەن، - ءبىز كوپ ۋاقىتتان بەرى ك س ر و ەمەسپىز، - ءبىز - تاۋەلسىز ەلمىز». مۇنداي جاعدايعا قازاقستاندىقتار عانا نارازى بولدى. ال امەريكالىقتار رەسەيدىڭ تۋلارىن ساتىپ الىپ ءجۇر. كەلەسى جەكپە-جەكتە كىرەبەرىستە قازاقستاننىڭ تۋىن ساتۋمەن اينالىسامىن دەپ شەشتىم. ەندى شە، اقشا دا تابامىن، ەلىمدى دە كورسەتەمىن.
7:30. كىرەبەرىستە جانكۇيەرلەردىڭ دەلەگاتسياسى كەلىپتى. GGG- عا قازاقتار عانا ەمەس، كورەيلەر دە، قىتايلار دا، يسپاندار دا، يرلانديالىقتار دا، ۋكرايندار دا كەلىپتى - بارلىعى قازاقستاننىڭ تۋى مەن «GGG جازىلعان باس كيىمدەرىن كوتەرىپ ءجۇر. قازاقستاندىق جانكۇيەرلەردىڭ كوبىسى مۇحيتتىڭ ارعى جاعىنان، 25 ساعاتتىق ۇزاق جولدى ەڭسەرىپ ۇشىپ كەلگەن. ولارعا تەك جەڭىس كەرەك ەدى.
«ءبىز مۇندا تەك جەڭىس ءۇشىن كەلدىك»، - دەدى استانالىق سەرىك دەگەن كىسى. ول گولوۆكين دەسە ىشكەن اسىن جەرگە قويىپ، قولداۋ بىلدىرەدى ەكەن، ونىڭ ارتىنان لاس-ۆەگاسقا دا، كاليفورنياعا دا بارىپتى. «باستىسى گەنا امان بولسىن، ءبىز ونى ءارقاشان قولدايمىز» دەيدى.
امەريكانىڭ قالالارىنان چيكاگودان، بوستوننان، لوس-اندجەلەستەن، سان-ديەگودان قازاقستاندىق ستۋدەنتتەر دە كەلدى - ولار ءبىزدىڭ باتىرىمىزدى كۇتتى.
گەنا قانداي ماسشتابتاعى بوكسشى ەكەنىە تۇسىنە مە ەكەن دەپ ويلاپ قويامىن.
8:30. اقىرىنداپ قاۋىپسىزدىك قىزمەتىنىڭ تەكسەرىسىنەن ءوتىپ جاتىرمىز، سەلفي ستيك (سەلفي تاياعى) قولدانۋعا بولمايتىنىن ايتىپ، ەسكەرتۋ جاساپ جاتىر. نەگە ەكەنىن بىلمەيمىن، ءبىراق قازاقتار بۇل تىيىمدى ساقتاۋعا اسىعار ەمەس. قاۋىپسىزدىك تەكسەرىسىنەن وتكەنىمىز سول ەدى، ءبارى سومكەلەرىنەن سەلفي تاياقشالارىن شىعارىپ جاتتى.
ناعىز جۇلدىز بولدىق. شەتەلدىكتەر قايتا-قايتا كەلىپ، گەنا تۋرالى سۇراستىرا بەرەدى، قازاقستانداعى بولاشاق بوكسشىلار تۋرالى بىلگىسى كەلەدى. ولار ءبىزدى ءتىپتى ءبىر ەسكەرتكىشكە ۇقساتىپ، سۋرەتكە ءتۇسىرىپ الىپ جاتتى. قۋانباي تۇرا المادىق. شتاتتاردى ءومىر ءسۇرىپ جاتقان ەكى جىلدا ءوز ەلىم ءۇشىن سونداي ماقتانىش سەزىمىن ءبىرىنشى رەت باسىمنان وتكەردىم. سەبەبى ءبىزدى امەريكالىقتار «بورات» فيلمى ارقىلى بىلەدى عوي. لەمەنىڭ ءوزى تۆيتتەردە بوراتتىڭ سۋرەتىن جاريالاعان. الايدا 17- قازاندا، كەشتە ولار بوراتتى بىردەن ۇمىتتى، ءسويتتى دە گولوۆكينگە تامساندى.
ءبىز زالعا كىرەتىن ەكىنشى قاباتتاعى جەردە تۇرىپ، گەناعا بىرگە قولداۋ بىلدىردىك. قولىمىزدا تۋ. كانادالىق جانكۇيەرلەرمەن دە سويلەستىك، ولار بىزگە اۋىر جەكپە-جەكتىڭ بولاتىنىن ايتىپ، ءتىپتى ءتورتىنشى راۋندتا نوكاۋتتىڭ بولاتىنىن بولجاعاندارىن ايتتى. ءبىز بولساق، ءوز كەزەگىمىزدە ماقتانباي-اق قويايىق دەپ شەشىپ، ولارعا تەك ساتتىلىك تىلەدىك.
«ءبىز قازاقستاننان كەلدىك، ءبىز بوس ءسوز ايتقىمىز كەلمەيدى. ءبىزدىڭ گەنا - وتە قاراپايىم جىگىت. لەمەنىڭ جانكۇيەرلەرىنىڭ شۋ تۋعىزاتىن سوزدەرىنە ماقتانىشپەن جاۋاپ بەرەيىك»، - دەپ كەڭەس بەردى ءبىر جىگىت ارامىزدا. ول گولوۆكيننىڭ ناعىز جانكۇيەرى، ءبىر دە ءبىر جەكپە-جەكتى قالت جىبەرمەيدى. ول 35 جاستا، 20 جىلىن چيكاگودا وتكىزىپتى. الايدا جىگىت ءوز ەلىنىڭ پاتريوتى، گەنا ميۋررەيدى جەڭگەندە وعان دەگەن قۇرمەتپەن وسى ءبىر تاتۋيروۆكانى سالعىزىپتى.
ادرەنالين. جەكپە-جەكتىڭ باستالۋىنا بىرەر ءسات قالدى. ورىندارىمىزعا جايعاستىق، ءبىرىنشى قاتارلاردا اتاقتى دەگەن جۇلدىزداردى، سپورتشىلاردى، ءتىپتى ا ق ش پرەزيدەنتتىگىنە ۇمىتكەر دونالد ترامتى كورىپ وتىرمىز.
اينالامدا گەنانىڭ عانا فاناتتارى وتىر دەگەنگە سەنە الار ەمەسپىن. قاراپ كورسەم بۇكىل زال «GGG» دەگەن باس كيىمگە تولى. گەنا، بۇگىن بۇكىل زال ساعان قولداۋ ءبىلدىرىپ كەلدى دەدىم ىشتەي. شىن مانىندە، ءتۇرلى ۇلتتىڭ وكىلدەرى "Triple GGG , Gennadiii" دەپ ايعايلاۋمەن بولدى.
بارلىعى پوپكورن جەپ، سىرا ءىشىپ وتىردى.
مىنە، كوپ كۇتتىرگەن ءسات تە كەلىپ جەتتى. ءبىرىنشى بولىپ لەمە شىقتى. زال قوشەمەت كورسەتىپ جاتىر، رومانتيكالىق اۋەن، كۇلگىن ءتۇستى جىبەك ماتادان جاسالعان كيىم، حالات، دەمەۋشىلىك سىرانىڭ «CORONA» دەگەن جازۋى، وزىنە سەنىمدى لەمە رينگكە شىقتى.
ءسان بيزنەسىنىڭ وكىلدەرى سياقتى، KFW دەرسىڭ.
زال ورنىنان تۇرا كەلىپ، رينگكە گەنناديدى شاقىرا باستادى: «Triple GGG where are u, show me drama tonight!». «گەنا العا!» دەگەن داۋىس. سونىمەن، ءبىزدىڭ گەنا شىعىپ كەلەدى، ادەمى شاپان، بالى كوزقاراس، شورتى ادەمى، وندا قازاقستاندىق ويۋ كومكەرىلگەن.
ادەمى. قازاق مادەنيەتى سىزدەرگە «كورونا» دەگەن سىرا ەمەس دەپ ويلادىم سول ساتتە.
دۇنيە استاڭ-كەستەڭ. ماقتانىش. باسىم اينالىپ كەتتى. ادام سونشا كوپ جينالدى. ءبىزدىڭ باتىرىمىزدى زال قوشەمەتپەن قارسى الدى.
وڭ جاعىمدا وتىرعان ادام ايەلىمەن بىرگە كاليفورنيادان كەلىپتى، ولار گولوۆكيننىڭ كەزدەسۋلەرىن وتكىزبەيدى ەكەن. ۋايىمىمدى سولارعا ايتا باستادىم: «قالاي ويلايسىزدار، وعان وسىنداي قوشەمەتتىڭ كورسەتىلگەنى جاقسى ما؟ بۇدان قاتتى اسەرلەنىپ كەتپەي مە؟ ءوزىن-ءوزى جوعالتىپ الماي ما؟ امەريكالىق جىگىت ماعان باسۋ ايتا باستادى: «جوق، ءبىزدىڭ وعان ارنايى كەلگەنىمىزدى بىلەدى عوي».
راۋند سايىن گولوۆكينگە قارسىلاسى سوققى جاساپ جاتقاندا قوبالجىپ وتىردىق، ءبىراق ول كانادالىققا قارىمتا سوققى جاساعان ساتتەردە ريزا بولىستىق. كەزدەسۋ كەزىندە ءبىزدى كامەرا تۇسىرە بەردى، قارسى بولمادىق، كەرىسىنشە، وپەراتوردىڭ نازارىن اۋلاۋمەن بولدىق. قازاقستاندىق تۋدى قاسىمدا وتىرعان امەريكالىقتارمەن جانە كورەيلەرمەن بولىسۋىمەن تۋرا كەلدى. ولار ءبىزدىڭ تۋدى ءسات سايىن ماقتانىشپەن كوتەرىپ وتىردى. بارلىعى ريزا.
6- راۋند. تاماعىم قارلىعىپ قالدى، كابلۋك كيگەنىم دە دۇرىس بولماپتى. ءبىراق جاي وتىرۋ دەگەندى بىلمەيمىز. ونىمەن بىرگە (گەنامەن) جەڭىسكە دەيىن بارۋىمىز كەرەك.
كەي ساتتەردە كەزدەسۋ ا ق ش- تا ەمەس، ءبىزدىڭ الماتىداعى بالۋان شولاق سپورت سارايىندا بولىپ جاتقان سياقتى بولىپ كورىندى. گولوۆكينگە وسىنداي مولشەردە جانكۇيەرلەر بۇعان دەيىن كەلمەگەن شىعار.
ءبىر ۋاقىتتا لەمەگە جانىم اشىدى، جانكۇيەرلەرى وتە از بولدى، بوكسشىنىڭ كوڭىل-كۇيىنە وسى جاعداي دا اسەر ەتكەن بولۋى كەرەك. زال «GGG Triple G» دەپ قانا ايعايلاۋمەن بولدى.
سوڭىنا قاراي داۋ بولىپ كەتتى. تارازدان كەلگەن جانكۇيەرلەرىمىزدىڭ ءبىرى كانادالىققا بىلاپىت ءسوز ايتتى. كۇزەتشىلەر كەلىپ، ونى باسقا ورىنعا وتىرعىزىپ قويدى.
8- راۋند. ءبىز جەڭدىك، انىق، ءبىراق سوندا دا گەنا شارشاپ قالمادى ما دەپ ۋايىمداي باستادىق. لەمەدەن وندايدى كۇتۋگە بولادى. سوڭعى سەكۋندتار. ەەەەەەس، تەحنيكالىق نوكاۋت.
زال جارىلدى: ءبىز ساعان سەندىك، گەنا!
رينگتىڭ جانىندا تۇرمىز، كۇزەتشىلەر ءبىزدى وعان جىبەرەر ەمەس. گەنا HBO ارناسىنا سۇحبات بەرىپ جاتسا دا ايعالاپ جاتىرمىز: «گەنا، مايقۇدىق، گەنا، جاقىنداشى بىزگە». ول قاسىمىزدان ءوتتى، كۇزەتشىلەر ونى بىزگە جاقىنداتپادى، ءبىراق ول بىزگە كۇلىمسىرەپ قارادى دا، «جىگىتتەر، جىبەرمەي جاتىر، جىگىتتەر، سالەم» دەپ ايعايلادى.
مىنە، ءبىزدىڭ چەمپيون.
