قازاقستان پارلامەنتشىلەرى ناتو پارلامەنتتىك اسسامبلەياسىنىڭ سەسسياسىنا قاتىستى
بۇل تۋرالى ءماجىلىستىڭ باسپا ءسوز قىزمەتىنەن حابارلاندى.
ستاۆانگەر (نورۆەگيا كورولدىگى) قالاسىندا ءۇش كۇن بويى وتكەن وتىرىسقا ناتو-عا مۇشە 28 ەلدىڭ 300 دەن استام پارلامەنتشىلەرى - سەرىكتەس ەلدەردىڭ دەلەگاتتارى مەن باقىلاۋشىلارى حالىقارالىق قاۋىپسىزدىك ماسەلەلەرىن تالقىلاپ، ۋكرايناداعى جاعدايعا، رەسەيمەن قارىم-قاتىناسقا، تاياۋ شىعىس پەن سولتۇستىك افريكاداعى داعدارىس پەن بوسقىندار ماسەلەسى جانە تەرروريزم قاۋپىنىڭ ۇلعايعاندىعىنا نازار اۋداردى.
«ناتو پارلامەنتتىك اسسامبلەياسىنىڭ دەپۋتاتتارى سەسسيا جۇمىسىندا اسسامبلەيانىڭ بارلىق بەس كوميتەتتەرىنىڭ باياندامالارىن تىڭدادى جانە اليانس قىزمەتىنىڭ وزەكتى باعىتتارى بويىنشا سەگىز رەزوليۋتسيا قابىلدادى. جىل سايىنعى سەسسيا شەڭبەرىندە قازاقستان رەسپۋبليكاسى پارلامەنتىنىڭ دەلەگاتسياسى ساياسات كوميتەتىنىڭ، قاۋىپسىزدىككە ازاماتتىق ولشەم بويىنشا كوميتەتىنىڭ، ەكونوميكا مەن قاۋىپسىزدىك بويىنشا كوميتەتىنىڭ جانە اسسامبلەيانىڭ پلەنارلىق وتىرىسىنا قاتىستى. پارلامەنتتىك فورۋم اياسىندا قازاقستاندىق دەلەگاتسيا ناتو پارلامەنتتىك اسسامبلەياسىنىڭ ءتوراعاسى م. تەرنەرمەن كەزدەسىپ، اليانستىڭ قازاقستانمەن ىنتىماقتاستىعىن دامىتۋدىڭ ماڭىزىندا عالامدىق جانە ايماقتىق قاۋىپسىزدىكپەن قامتاماسىز ەتۋ ماسەلەلەرى جاتقانىن اتاپ ءوتتى»، دەلىنگەن باسپا ءسوز بايانىندا.
اۆتور: قانات مامەتقازى ۇلى
