عالىمدار كيىكتەردىڭ قىرىلۋىنا بايلانىستى ءالى ورتاق شەشىمگە كەلمەگەن

استانا. قازاقپارات - بۇگىن استانادا كيىكتەردىڭ جاپپاي قىرىلۋى قايتالانباس ءۇشىن الدىن-الا قانداي شارالار قولدانۋ كەرەكتىگى جونىندە ءماجىلىس ءوتتى.

جيىنعا قاتىسقان اۋىل شارۋاشىلىعى ۆيتسە-ءمينيسترى ەرلان نىسانبايەۆتىڭ ايتۋىنشا، زەرتتەۋشىلەر اۋرۋدىڭ تارالۋى جونىندە ءالى دە ءبىر ورتاق شەشىمگە توقتاماعان.

«بۇگىنگى كۇنى كيىكتىڭ قىرىلۋىنىڭ باستى سەبەبى - پاستەرەللەز ەكەنى ناقتى. ءار ءتۇرلى پىكىرلەر بار، الايدا، ونى ناقتىلاۋ ءۇشىن عىلىمي زەرتتەۋ جۇرگىزۋ كەرەك. زەرتتەۋ جوسپارىنىڭ تاقىرىپتارى بەلگىلەنگەن. وسى ماسەلەدە جەكەلەگەن ينستيتۋتتاردىڭ بارلىعىنان ۇلكەن ءبىر تاقىرىپ جاسالىپ، ءبىلىم جانە عىلىم ميمنيسترلىگىنە ۇسىنىلدى. ونداعى عىلىم كوميتەتى وسى جۇمىستى ءارى قاراي جالعاستىرادى. ءبىز وسى وتىرىستاردىڭ ءبارىن اشىق وتكىزىپ جاتىرمىز. عالىمدار ءالى دە بولسا ءبىر پىكىرگە كەلگەن جوق. ال، ءبىزدىڭ مينيسترلىك ءوز جۇمىسىن جالعاستىرادى» دەيدى ۆيتسە-مينيستر.

ونىڭ ايتۋىنشا، ءدال قازىرگى كەزدە كيىكتەردى براكونەرلەردەن قورعاۋ كەرەك. ماسەلەن، جۋىردا ب ق و- دا 100 كيىكتىڭ مۇيىزىمەن براكونەرلەر ۇستالدى.

«ءبىزدى قوبالجىتاتىن ماسەلە - بولاشاقتا ەندى نە ىستەۋ كەرەكتىگى جانە كيىكتەردىڭ قىرىلۋىنا جول بەرمەس ءۇشىن ءتيىستى شارالاردىڭ اتقارىلۋى. وكىنىشكە قاراي، ەڭ قاتتى زارداپ شەككەن ايماق - بەتپاقدالا پوپۋلياتسياسى. قازىرگى تاڭدا ورال پوپۋلياتسياسىندا 60 مىڭعا جۋىق كيىگىمىز بار. ۇستىرتتە 2 مىڭداي كيىك بار. وسى كيىكتەردى امان الىپ قالۋ ءۇشىن تىنباي ەڭبەك ەتۋىمىز كەرەك. عىلىمي زەرتتەۋ جۇمىسىنا ب ع م كەلەر جىلعا شامامەن 350 ميلليون تەڭگە قارجى بولەدى»، - دەدى ول.

ەسكە سالا كەتەيىك، اعىمداعى جىلدىڭ ماۋسىمىنداعى دەرەك بويىنشا بەتپاقدالا پوپۋلياتسياسىندا - 132329 كيىك، قوستاناي وبلىسىندا - 113309، اقمولا وبلىسىندا - 9386، اقتوبە وبلىسىندا - 9634 كيىك قىرىلعان.

baq.kz