عالامتور ارقىلى ارىپتەسىنە ءتىل تيگىزگەن فۋتبولشىلار ءۇش ايعا تۇرمەگە قامالدى

استانا. قازاقپارات - ءابۋ-دابي سوتى ەكى فۋتبولشىنى سپورتپەن اينالىساتىن باسقا ادامعا ءتىل تيگىزگەن بەينەنى عالامتورعا جاريالاعان ءۇشىن ءۇش ايعا تۇرمەگە قاماۋ جازاسىنا كەستى.

بۇل تۋرالى ر ي ا «نوۆوستي» حابارلاپ وتىر.

بۇدان باسقا، سوت بەينەجازبا جاريالانعان سايتتىڭ يەسىنە ايىپپۇل سالىپ، ونى روليكتى جويىپ تاستاۋعا مىندەتتەدى.

سوت بۇل بەينەدە بالاعات سوزدەرى بار ەكەنىن، سونداي-اق ب ا ءا- ءنىڭ ەتيكالىق جانە مورالدىق قۇندىلىقتارىنا قايشى كەلەتىنىن قاۋلى ەتتى.

سپورتشىلار قىركۇيەك ايىندا الەۋمەتتىك جەلىلەرگە ادەپسىز قىلىقتارى مەن ءتىل تيگىزۋ سوزدەرى بار بەينە پايدا بولعان سوڭ ۇستالعان.