ميللياردەر اپتاسىنا ءۇش-اق كۇن جۇمىس ىستەۋ تۋرالى ۇسىنىس ايتتى

استانا. قازاقپارات - الەم بويىنشا داۋلەتى جاعىنان ەكىنشى ادام سانالاتىن مەكسيكالىق ميللياردەر كارلوس سليم اپتاسىنا ءۇش-اق كۇن جۇمىس ىستەۋ تۋراسىندا ۇسىنىس ءبىلدىردى.

ونىڭ ايتۋىنشا، مۇنداي شارا جۇمىسسىزدىق ماسەلەسىن شەشۋگە كوپ كومەكتەسەدى.

دەسە دە، ول وسىمەن قاتار زەينەتكە شىعۋ جاسىن 75 كە دەيىن كوتەرۋدى دە ۇمىت قالدىرمادى. ميللياردەردىڭ سوزىنە قاراعاندا، ادامدار اپتاسىنا جالپى العاندا 32-33 ساعات جۇمىس ىستەگەن جاعدايدا بۇل ءوز كەزەگىندە ەكى قولعا ءبىر كۇرەك تاپپاي جۇرگەندەردى جۇمىسقا ورنالاستىرۋعا مۇمكىندىك بەرەدى.

سونداي-اق، ول زەينەتكە شىعۋ جاسى ۇزارتىلاتىن بولسا، بۇل ءوز كەزەگىندە تاجىريبە جيناۋعا كوپ كومەكتەسەتىنىن دە تىلگە تيەك ەتتى. يسپانيانىڭ اليكانتە قالاسىندا وسى ۇسىنىسىن ورتاعا تاستاعان ميللياردەر وسىلايشا ادامدارعا اپتاسىنا ءۇش كۇن جۇمىس ىستەتۋ ارقىلى جۇمىسسىزدىق ماسەلەسىن (ياعني، اپتانىڭ قالعان كۇندەرىندە جۇمىسسىز جۇرگەندەردىڭ ەڭبەگىمەن تولتىرۋ ارقىلى) شەشۋگە بولاتىنىن جەتكىزدى. ول بۇل ۇسىنىسىن يسپانيادا بەكەر ايتقان جوق. ويتكەنى، يسپانيا ەۋروداققا مۇشە ەلدەر ىشىندە جۇمىسسىزدىق قاتتى بەلەڭ العان ەلدەردىڭ كوش باسىندا تۇر. ناقتىراق ايتقاندا، بۇل ەلدەگى جۇمىسسىزدىقتىڭ زارىن تارتىپ جۇرگەندەردىڭ قاراسى شامامەن 23 پايىزدى قۇرايدى. ال جاستار اراسىندا جۇمىسسىزدىق 40 پايىزدان اسىپ كەتكەن.

ايتا كەتەيىك، وسىناۋ ۇسىنىستى بىلدىرگەن كارلوس سليمنىڭ داۋلەتى الەمدەگى بايلاردىڭ جيعان-تەرگەنىن شوتقا سالىپ، ەسەپتەپ وتىراتىن Forbes جۋرنالىنىڭ مالىمەتىنشە، 77 ميلليارد دوللاردى قۇرايدى ەكەن. ونىڭ اكتيۆتەرى تەلەكوممۋنيكاتسيا، قۇرىلىس سالاسىندا جانە سەمەنت وندىرىسىندە، دەپ جازادى islam.kz.