جول جيەگىندە تۇرعان بويجەتكەندى قاعىپ كەتكەن جۇرگىزۋشى وقيعا ورنىنان ءىزىن سۋىتقان

استانا. قازاقپارات - ماڭعىستاۋ وبلىسىنىڭ جاڭاوزەن قالاسىندا كولىك جۇرگىزۋشىسى جولدىڭ جيەگىندە تۇرعان بويجەتكەندى قاعىپ كەتىپ، وقيعا ورنىنان كەتىپ قالعان.

بۇل تۋرالى جول-پاترۋلدىك قىزمەتىنە سىلتەمەمەن lada.kz حابارلايدى.

جول وقيعاسى «شۇعىلا» شاعىناۋدانىنداعى «نيازبەك» مەيرامحاناسىنىڭ قاسىندا ورىن العان. بويجەتكەندى اۆتوموبيل قاققاندا، ول جولدىڭ جيەگىندە تۇرعان.

ادامدى قاعىپ كەتكەن جۇرگىزۋشى جابىرلەنۋشىگە كومەك كورسەتپەستەن وقيعا ورنىنان كەتىپ قالدى.

جول اپاتى سالدارىنان 19 جاستاعى جەرگىلىكتى تۇرعىن ورتاشا دارەجەدەگى جاراقاتتار الدى. جۇرگىزۋشى ەكى ساعاتتىڭ ىشىندە ۇستالدى. وقيعا فاكتىسى بويىنشا تەرگەۋ امالدارى جۇرگىزىلۋدە.

تاعى ءبىر جول-كولىك وقيعاسى مۇنايلى اۋدانىندا ورىن العان. وندا 49 جاستاعى جۇرگىزۋشى باسقارعان Ssang Yong Aktyon كولىگى دوڭگەلەگىنىڭ استىندا 10 جاسار وقۋشى قالىپ قويدى. وقيعا كەزىندە بالا اتامەكەن اۋىلىنداعى «بەكسۇلتان» دۇكەنىنىڭ جانىندا تۇرعان.

جول-كولىك اپاتى سالدارىنان جابىرلەنۋشى اۋرۋحاناعا جەتكىزىلىپ، مەديتسينالىق كومەك كورسەتىلگەن سوڭ ۇيىنە جىبەرىلدى.