ورالدا شەشەن ايەلىنىڭ كۇنى اتالىپ ءوتىلدى - فوتو
وعان قاتىسقان وبلىس اكىمىنىڭ ورىنباسارى يگور ستەكسوۆتىڭ ءمالىم ەتكەنىندەي، بۇل كۇن شەشەن ايەلدەرى مەن قىزدارىنىڭ ەرلىگى مەن نامىسقويلىعىنا قۇرمەت رەتىندە اتالىپ وتىلەدى. ەلى مەن جەرىن قورعاي ءبىلۋدىڭ قاي ۋاقىتتا دا ماڭىزى ەرەكشە. سوندىقتان مۇنداي مەرەكەلەر جاس ۇرپاقتىڭ بويىندا وتانشىلدىق سەزىمىن ورنىقتىرۋ ءۇشىن كەرەك.
«ۆايناح» شەشەن-ينگۋش قوعامىنىڭ ءتوراعاسى دانيلبەك ساراتوۆتىڭ ايتۋىنشا، شەشەن رەسپۋبليكاسىنىڭ باسشىسى رامزان قادىروۆ شەشەن ايەلىنىڭ كۇنىن 2009 -جىلى بەلگىلەگەن. مۇنىڭ تاريحى مىنادا، 1819 -جىلى گەنەرال ەرمولوۆتىڭ اسكەرى شەشەننىڭ دادي-يۋرت اۋىلىن ورتەپ، 46 ايەل- قىزدى تۇتقىنعا الادى. تەرەك وزەنىنەن وتكەن كەزدە ولار بەرىلگىسى كەلمەي، ءبارى سۋعا سەكىرەدى. سوندىقتان شەشەن ايەلى ۇلتتىڭ ار- ابىرويى بولىپ ەسەپتەلەدى. شەشەن ايەلىنىڭ كۇنىمەن تەك شەشەن عانا ەمەس، بارلىق ايەلدەردى مەرەكەمەن قۇتتىقتاعان ءجون. قازاقستاندا انالاردىڭ ءوز بالالارىن امان- ەسەن ءوسىرۋى ءۇشىن بارلىق جاعداي جاسالعان. ەڭ باستىسى، بەيبىتشىلىك پەن تىنىشتىققا نە جەتسىن. مۇنى قورلىق پەن ازاپتى كوپ كورگەن شەشەن حالقى جاقسى تۇسىنەدى.
ءبورلى اۋدانىنىڭ قۇرمەتتى ازاماتى، قازاقستان حالقى اسسامبلەياسىنىڭ مۇشەسى، قازاق تىلىندە سويلەپ قانا قويماي، شىعارمالار دا جازاتىن مۇحتار بوقايەۆ ومىرگە تىرشىلىك سىيلايتىن ايەل- انانى سىيلاۋدىڭ ماڭىزى زور ەكەندىگىن جەتكىزدى.
ر ف- نىڭ ورال قالاسىنداعى ۆيتسە- كونسۋلى يۋري پونوماريەۆ قازاقستان مەن رەسەي اراسىندا دوستىق تامىرلارىنىڭ تەرەڭ ەكەندىگىنە توقتالدى. قازىرگى ۋاقىتتا دا ءوزارا ءتيىمدى قارىم- قاتىناس جاسالۋدا. بيىلدىڭ وزىندە ەكى ەل باسشىلارى التى رەت كەزدەستى. سونىڭ ىشىندە جۋىردا استانادا وتكەن جۇزدەسۋ قوس مەملەكەتتىڭ بايلانىسى بەرىك ەكەندىگىن تاعى ءبىر كورسەتىپ بەردى. ۆيتسە- كونسۋل بارلىق جينالعانداردى مەيراممەن قۇتتىقتاي كەلىپ، بيىل 25 جىلدىعىن اتاپ وتكەن «ۆايناح» شەشەن- ينگۋش ەتنومادەني بىرلەستىگىنىڭ ءتوراعاسىنا ر ف باس كونسۋلدىگىنىڭ قۇرمەت گراموتاسىن تابىس ەتتى.
ورالداعى شەشەن ايەلى كۇنى مەرەكەسىنە اقتوبەدەن «ۆايناح» قوعامىنىڭ وكىلدەرى كەلىپ، ءوز ونەرلەرىن كورسەتىپ، شەشەن ۇلتتىق تاعامدارىنان ءدام تاتتى.
اۆتور: ەلجان ەرالى
