ن. نازاربايەۆتىڭ ت م د- ءنىڭ جاڭا دامۋ تۇجىرىمداماسىن جاساقتاۋ جونىندەگى ۇسىنىسى دوستاستىق سامميتىنىڭ ەڭ ماڭىزدى وقيعاسى بولدى - ساراپشى

استانا. قازاقپارات - نۇرسۇلتان نازاربايەۆتىڭ الەمدەگى بۇگىنگى تالاپتارعا جاۋاپ بەرەتىن ت م د- ءنىڭ جاڭا دامۋ تۇجىرىمداماسىن جاساقتاۋ جونىندەگى ۇسىنىسى بۋرابايدا وتكەن دوستاستىق سامميتىنىڭ ەڭ ماڭىزدى وقيعاسى بولدى.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «ەكونوميكالىق زەرتتەۋلەر ينستيتۋتى» اق باسقارما ءتوراعاسى ماقسات مۇقانوۆ ءمالىم ەتتى.

«كەشە بۋراباي كەنتىندە ت م د مەملەكەت باسشىلارىنىڭ كەڭەسى مەن ەۋرازيالىق ەكونوميكالىق وداقتىڭ جوعارى ەكونوميكالىق كەڭەسىنىڭ وتىرىسى بولدى. بۇل وقيعا الەمدىك ەكونوميكاداعى اۋىر احۋالعا جانە سوڭعى كەزدە الەم ەكونوميكاسىندا ورىن العان وزگەرىستەرگە تىكەلەي بايلانىستى ەكەندىگىن اتاپ وتكەن ءجون»، - دەدى م. مۇقانوۆ.

ونىڭ ايتۋىنشا، ت م د ۇيىمى ءبىرشاما وزگەرىستەردىڭ الدىندا تۇر.

«وسى تۇرعىدا ق ر پرەزيدەنتى نۇرسۇلتان نازاربايەۆتىڭ ت م د- نى الەمدىك وزگەرىستەرگە توتەپ بەرۋىنە ارنالعان جاڭا دامۋ تۇجىرىمداماسىن جاساقتاۋ تۋرالى ۇسىنىسى بۋرابايدا وتكەن دوستاستىق سامميتىنىڭ ەڭ ماڭىزدى وقيعاسى بولدى. بۇل باعىتتا ۇلكەن باستاۋلار كۇتىپ تۇر، ولار ۇيىمنىڭ 25 جىلدىعى قارساڭىندا اياقتالادى دەپ جوسپارلانۋدا»، - دەپ اتاپ ءوتتى ينستيتۋت باسشىسى.

ونىڭ سوزىنە قاراعاندا، ت م د ەلدەرى اراسىنداعى قارىم-قاتىناستى، ساۋدا-ساتتىق بايلانىستاردى تەرەڭدەتە تۇسەتىن جانە جاڭا الەۋەتتى باعىتتار بويىنشا ارىپتەستىكتى كۇشەيتەتىن جاڭا پراكتيكالىق قۇجاتتار قابىلداندى.

ەسكە سالا كەتەيىك، ت م د مەملەكەت باسشىلارىنىڭ كەڭەسى مەن ەۋرازيالىق ەكونوميكالىق وداقتىڭ جوعارى ەكونوميكالىق كەڭەسىنىڭ وتىرىسى 16 قازاندا اقمولا وبلىسىنىڭ بۋراباي اۋىلىندا وتكەن بولاتىن. وندا دوستاستىق ەلدەرى اراسىنداعى قارىم-قاتىناستاردىڭ الەۋەتتى باعىتتارى پىسىقتالدى. ت م د مەملەكەتتەرىنىڭ باسشىلارى 17 قۇجاتقا قول قويىپ، قۇقىق قورعاۋ، تابيعي جانە تەحنوگەندىك توتەنشە جاعدايلاردىڭ سالدارلارىن جويۋ سالالارىندا ءبىرقاتار حالىقارالىق كەلىسىمدەر جاسادى. سونىمەن بىرگە 2020-جىلعا دەيىنگى اسكەري ىنتىماقتاستىق جونىندەگى تۇجىرىمداما، 2016-2020-جىلدارعا ارنالعان شەكارالاردا قاۋىپسىزدىكتى كۇشەيتۋ بويىنشا ارىپتەستىك باعدارلاماسى قابىلداندى.

اۆتور: جاسۇلان جولدىبايەۆ