قىتاي حالىقارالىق راديوسى «قازاقپارات» ح ا ا- مەن ىنتىماقتاستىق ورناتۋعا نيەت ءبىلدىردى
مۇنداي ىنتاسىن قازاقستاندىق جۋرناليستەر دەلەگاتسياسىن قابىلداۋ بارىسىندا قىتاي حالىقارالىق راديوسىنىڭ (ق ح ر) باس ديرەكتورىنىڭ ورىنباسارى ما بوحۋەي ءبىلدىردى.
قىتاي تاراپىنىڭ وكىلى قازاقستاندىق ماسس-مەديامەن كەزدەسۋ بارىسىندا كوپ جىلدان بەرى جۇرگىزىلىپ كەلە جاتقان ىنتىماقتاستىقتى ودان ءارى تەرەڭدەتۋ كەرەكتىگىن جەتكىزدى.
«ءبىزدىڭ باستى ماقساتىمىز - قوس مەملەكەت اراسىنداعى اقپاراتتىق ىنتىماقتاستىقتى دامىتۋ. حالىقارالىق حابار تاراتۋ قىزمەتى بارلىق الەمدى قىتايمەن تانىستىرادى. ءبىز 65 تىلدە حابار تاراتامىز. بۇرىن راديومىز ءداستۇرلى اۋە تولقىنىندا شىعاتىن. سوڭعى 10 جىلدا ريەۆوليۋتسيا باستالدى. ءبىز قازىر تەك راديو ەمەسپىز. سونداي-اق، تەلەباعدارلامالار جۇرگىزەمىز. باسىلىمدارىمىز دا بار. الەمنىڭ باسىم مەملەكەتتەرىندە ءوز تىلشىلەر قوسىنىمىز، حابار تاراتۋ ورتالىعى، ستۋديامىز بار. ءبىز الەم حالىقتارىن قىتايمەن تەك قىتاي تىلىندە ەمەس، سول ەلدىڭ انا تىلىندە تانىستىرۋعا تىرىسامىز»، - دەدى ما بوحۋەي قابىلداۋ بارىسىندا.
سونداي-اق، قازاقستاندىق جۋرناليستەر دەلەگاتسياسى ق ح ر كورمەسىن تاماشالادى. بايقاعانىمىزداي، قىتايلىقتار ءوز تاريحىنىڭ ساقتالۋىنا اسا ءمان بەرەتىن ەل.
بۇل بىرەگەي كورمەدە اقپارات قۇرالىنىڭ قالىپتاسقان كۇندەرىنەن باستاپ، قازىرگە دەيىنگى تۇسىرىلگەن فوتوسۋرەتتەر، قولدانىلعان قۇرىلعىلار حرونولوگيالىق رەجىمدە قويىلعان. ءتىپتى عيمارات ورتاسىندا ۇلكەن گلوبۋس ورناتىلىپ، ونىڭ بەلدەۋىندە ءار ەلدەن كەلگەن حاتتار تاسقا باسىلعان. سونداي- اق، ءار ەلدەگى ارىپتەستەرىنەن كەلگەن سىيلىقتار ورنالاستىرىلعان.
قىتاي راديوسىنا جىلىنا تىڭداۋشىلاردان 3 ميلليونعا جۋىق حات كەلەدى ەكەن. ق ح ر راديوسىندا 2 مىڭعا جۋىق قىزمەتكەر جۇمىس جاسايدى. راديو ەفيرى ءار كۇندە ءارتۇرلى تاقىرىپتا حابار تاراتادى. ماسەلەن، دۇيسەنبى كۇنى قىتايلىقتار رەسمي جاڭالىقتارمەن سۋسىنداسا، دەمالىس كۇندەرى شوۋ-بيزنەس جاڭالىقتارىن، ءان-كۇي تىڭداي الادى.
قىتايلىق ارىپتەستەر قازاقستاندىق راديوتاراتۋ جۇيەسىنىڭ قۇرىلىمى جايلى دا قىزىعۋشىلىق تانىتتى. ءوز كەزەگىندە ولار بىرلەسكەن جوبا جاساۋعا دايىن ەكەندىگىن ءبىلدىردى.
«ءبىزدىڭ راديو «قازاقپارات» ح ا ا وتە جاقسى ىسكەرلىك بايلانىستى دامىتىپ كەلەدى. بۇگىنگى سىزدەردىڭ ساپارلارىڭىز ەكى تاراپقا دا پايدالى باستامالارعا جول اشاتىنىنا سەنىمدىمىز»، - دەدى ما بوحۋەي.
«حالىقارالىق راديونىڭ جۇمىسى وتە جاقسى جولعا قويىلعان. الەمنىڭ 65 تىلىندە حابار تاراتۋ وتە ۇلكەن مۇمكىندىكتى كورسەتەدى. مەملەكەت باسشىلارىنىڭ كەزدەسۋلەرىندە كوپ ورتاق ماسەلەلەر كوتەرىلدى. وسى باعىتتا بايلانىستى نىعايتا تۇسسەك دەگەن نيەت بار»، - دەدى ول.
ايتا كەتۋ كەرەك، قىتاي حالىقارالىق راديوسى قازاقستاندىق جۋرناليستەردى ەكى ەل اراسىنداعى ارىپتەستىكتى نىعايتۋ ءۇشىن شاقىرعان بولاتىن. ساپار بارىسىندا جۋرناليستەر داليان قالاسىنداعى تەڭىز پورتىن، ليانيۋنگان قالاسىنداعى قازاقستاندىق لوگيستيكالىق تەرمينالدىڭ جۇمىسىمەن تانىسىپ قايتپاق.
اۆتور: گۇلميرا عوسمانالي
