بوكس: كىمدە قانشا جولداما بار؟
بۇل الاماندا بوستاندىق ارالىنىڭ وكىلدەرى ياعني كۋبا قۇراماسى 4 التىن، 1 كۇمىس، 2 قولا جۇلدەمەن جەكە دارا كوش باستاپ، باس جۇلدەنى ەنشىلەدى.
ەكىنشى ورىندى رەسەي ەلى ەنشىلەسە، ۇزدىك ۇشتىككە ءازىربايجان قۇراماسى جايعاستى. ال قازاقستان بوكسشىلارى بولسا 69 كەلىدەگى دانيار ەلەۋسىنوۆ پەن اسا اۋىر سالماقتاعى يۆان دىچكونىڭ قوس كۇمىسىنە قاناعات تۇتىپ، جالپى كوماندالىق ەسەپتە 8- ورىننان كورىندى.
جالپى بۇل الەم بىرىنشىلىگىندە چەمپيوندىق اتاقپەن بىرگە كەلەر جىلى ريودا وتەتىن وليمپيادا ويىندارىنا جولداما ساراپقا سالىنعان بولاتىن. سونىمەن ءدال قازىرگى تاڭدا كىمدە قانشا جولداما بار؟
شىعىستاعى كورشىمىز رەسەي قۇراماسىندا 7 سالماقتا 11 جولداماسى بار. ءبىراق وليمپيادا ويىندارىنا ءار سالماقتان 1 عانا بوكسشى قوسا الاتىندىقتان ءالى دە بولسا الەكساندر لەبزياك شاكىرتتەرى 60, 81, 91+ كەلىدەگى 3 جولداماعا تالاسىپ كورەدى. ەكىنشى ورىندا الەم بىرىنشىلىگىنە 10 بوكسشىمەن قاتىسىپ، كوماندالىق ەسەپتە باس جۇلدەنى يەلەنگەن بوستاندىق ارالى وكىلدەرىنىڭ 6 جولداماسى بار. كۋبا قۇراماسىنا ازىرگە 56، 69، 91، 91+ كەلىلەردە جولداما جوق.
ءۇشىنشى ورىنداعى الا تاقيالى وزبەك قۇراماسى دا 4 سالماقتا 5 جولداما ەنشىلەدى. مىرزاعالي ايتجانوۆ باستاعان ءبىزدىڭ جىگىتتەر ءتورتىنشى ورىندا. قازىرگى كەزدە 4 سالماقتا 4 جولداماعا قول جەتكىزدى. ولار: 49 كەلىدەگى ءبىرجان جاقىپوۆ، 60 كەلىدە بەرىك ءابدىراحمانوۆ، 69 كەلىدە دانيار ەلەۋسىنوۆ جانە 91 كەلىدە ۆاسيلي لەۆيت. بىزدەن كەيىن يرلانديا مەن فرانسيادا 3 جولداما. ال ءازىربايجان، قىتاي، يتاليا، موروككو مەن مەكسيكادا 2 ەۋ بولسا، حورۆاتيا، بەلارۋس، يران، گەرمانيا، پولشا، ەگيپەت، پۋەرتو-ريكو، رۋمىنيا، تايلاند پەن تۇركيادا جالعىز عانا جولدامادان بار ەكەن.
ەندى ريو وليمپياداسىنا بارۋ ءۇشىن ءبىزدىڭ بوكسشىلار قالعان ءۇش ليتسەنزيالىق جارىستا بارىنشا تابىستى ونەر كورسەتۋ كەرەك.
كەلەسى العاشقى وليمپياداعا ىرىكتەۋ 2016-جىلى 23- ناۋرىز بەن 3- ءساۋىر ارالىعىندا قىتايدىڭ سيانان قالاسىندا ازيا مەن تىنىق مۇحيت بوكسشىلارىنىڭ قاتىسۋىمەن بولادى. ال مامىر ايىندا بولگاريا استاناسى سوفيادا WSB مەن APB جوبالارى بويىنشا جولداماعا تالاسسا، سوڭعى جالپى دۇنيەجۇزىلىك ىرىكتەۋ شىلدەنىڭ 7-19 ارالىعىندا باكۋدە وتەدى.
نۇرجان قوڭىرباي
Baq.kz
