وزگە ۇلت وكىلدەرى اراسىندا «ىنتىماعى جاراسقان، تۋعان ولكەم» تاقىرىبىندا بايقاۋ ءوتتى

قىزىلوردا. قازاقپارات - قازاقستان حالقى اسسامبلەياسىنىڭ «مىڭ بالا» جوباسى اياسىندا وزگە ۇلت وكىلدەرى اراسىندا «ىنتىماعى جاراسقان، تۋعان ولكەم» بايقاۋ وتكىزىلدى، دەپ حابارلادى قازالى اۋداندىق اكىمدىگىنىڭ باسپا ءسوز قىزمەتىنەن.

بايقاۋدىڭ ماقساتى - وزگە ۇلت وكىلدەرىنە مەملەكەتتىك ءتىلدى مەڭگەرتۋ، قازاقتىڭ تاريحى مەن مادەنيەتىن، سالت-داستۇرلەرى مەن ادەت-عۇرىپتارىن بويىنا ءسىڭىرۋ، قوعامدىق كەلىسىم مەن قازاقستاندىق پاتريوتيزمدى نىعايتۋ فاكتورى رەتىندە مەملەكەتتىك ءتىلدىڭ مارتەبەسىن كوتەرۋ.

وعان 14-16 جاس ارالىعىنداعى 10 عا تارتا تالاپكەر قاتىستى. سايىس شارتى بويىنشا وقۋشىلار قازاقستان حالقىنىڭ بىرلىگىنە ارنالعان ەسسە جازۋدان جانە ولەڭ شۋماقتارىن مانەرلەپ وقۋدان ءوزارا تارتىسقا ءتۇستى. ساراپشىلار ۇمىتكەرلەردى باعالاۋ كەزىندە ولاردىڭ قازاق تىلىندە تازا سويلەۋىنە، جازۋ ساۋاتتىلىعىنا، مازمۇنىنا نازار اۋدارىپ، ءادىل باعالارىن بەردى.

ناتيجەسىندە 1- ورىندى 16№ مەكتەپتىڭ 11-سىنىپ وقۋشىسى سۆەتلانا كوۆالەنكو جەڭىپ الىپ، وبلىستىق بايقاۋعا جولداما الدى. جۇلدەلى 2-3- ورىنداردى 16№ مەكتەپتىڭ 9-سىنىپ وقۋشىسى دينارا شادىمۇراتوۆا مەن 266№ مەكتەپ-ليتسەيدىڭ 9-سىنىپ وقۋشىسى اليشەر روزمەتوۆ يەلەندى. جەڭىمپازدار ارنايى ديپلومدارمەن، باعالى سىيلىقتارمەن ماراپاتتالدى.