تۇركىستان تۇرعىندارى «قالا كۇنى» مەن «التىن كۇز» مەرەكەلەرىن اتاپ ءوتتى
قالا كۇنىنە وبلىس اكىمىنىڭ ورىنباسارى ەرلان ايتاحانوۆ قاتىسىپ، تۇركىستاندىقتاردى مەرەكەلەرىمەن قۇتتىقتادى.
تۇركىستان - بۇكىل تۇرىك تىلدەس حالىقتاردىڭ ءدىني ورتالىعىنا اينالعان، 15- عاسىردان استام تاريحى بار كونە قالالاردىڭ ءبىرى. حالقىمىزدىڭ ەجەلدەن ىرگەلى ەل بولىپ، ونىڭ ون بەس حانىنا استانا بولعان تۇركىستان تاريحىمىزدا ەرەكشە ورىن الادى.
بۇل تۋرالى ەلباسىمىز ن. نازاربايەۆ «تۇركىستاندا قازاق حاندارى تاققا وتىرعىزىلدى. كورشىلەس مەملەكەتتەردىڭ ەلشىلەرى قابىلداندى. اسا ماڭىزدى مەملەكەتتىك ماسەلەلەر تالقىلانعان جوعارى مارتەبەلى جيىندار وتكىزىلدى. ونداعى كۇلتوبەدە ءۇش ءجۇزدىڭ يگى جاقسىلارى تاۋكە حاننىڭ باسشىلىعىمەن قازاق مەملەكەتىنىڭ زاڭدىق نەگىزى - «جەتى جارعى» قابىلدادى. ءبىر سوزبەن ايتقاندا، تۇركىستان - قازاق حالقىنىڭ ۇلتتىق مەملەكەتتىلىگىن دۇنيەگە اكەلگەن التىن بەسىك ءارى ونى كەمەلدەندىرگەن ونەگەلى مەكتەپ»، - دەپ تۇركىستاننىڭ قازاق تاريحىنداعى ماڭىزىن ايشىقتاپ بەردى.
تۇركىستاندا قازىرگى تاڭدا 260 مىڭ حالىق تۇرادى. اتاپ ايتساق، وسى جىل ىشىندە قالانىڭ جالپى وڭىرلىك ءونىمى 45 ميلليارد تەڭگەنى قۇراعان. ايتا وتەيىك، قالا كۇنىن تويلاۋ ءبىر كۇنمەن شەكتەلمەيدى. وسى ورايدا قالا تۇرعىندارى مەن قوناقتارى ءتۇرلى شارالاردىڭ كۋاسى بولماق.
