استانادا قازاقستاننىڭ جانۋارلار الەمى تۋرالى فوتوكورمە ۇيىمداستىرىلدى - فوتو
ۇيىمداستىرۋشىلار قازاقستاننىڭ ءوڭىر-وڭىرىنەن جىبەرىلگەن 231 سۋرەتتىڭ اراسىنان 40 جۇمىستى ىرىكتەپ الىپ، كورمەگە قويىپ وتىر ەكەن. كورمەنىڭ جەڭىمپازدارى 20 -قازاندا انىقتالادى.
«بۇگىنگى كورمە - ەلىمىزدىڭ سىرى كوپ تىلسىم تابيعاتىنىڭ از عانا بولىگىن قامتىپ وتىرعان شارا. ەلىمىزدە قۇستاردىڭ 490 ءتۇرى، سۇتقورەكتىلەردىڭ 172 ءتۇرى، بالىقتىڭ 100 دەن استام ءتۇرى، باۋىرىمەن جورعالاۋشىلاردىڭ 51، قوسمەكەندىلەردىڭ 12 ءتۇرى بار. جەرىمىزدەگى قوسمەكەندىلەردىڭ 3 ءتۇرى، بالىقتاردىڭ 18 ءتۇرى، باۋىرىمەن جورعالاۋشىلاردىڭ 10 ءتۇرى، قۇستاردىڭ 57 ءتۇرى، سۇتقورەكتىلەردىڭ 40 ءتۇرى، وزگە دە جانۋارلاردىڭ 128 ءتۇرى 2010 -جىلى شىققان « قىزىل كىتاپتىڭ» 4 باسىلىمىنا ەنگەن.
ءبىزدىڭ، قازاقستاندىقتاردىڭ مىندەتى وسى جانۋارلار الەمىن قامقورلىققا الۋ، جان-جانۋارلاردى ءجونسىز اۋلاماي، اڭشىلىقتىڭ ادەبىن ساقتاۋ. كۇش بىرىكتىرسەك قانا، وسى تابيعات پەن ونى مەكەن ەتكەن نەشە ءتۇرلى جانۋارلاردى ساقتاپ، سانىن كوبەيتە الامىز»، - دەدى كورمەنىڭ اشىلۋىندا «دۇرىس اڭشىلىقتى قولداۋ جانە جانۋارلار دۇنيەسىن قورعاۋ» كورپوراتيۆتى قورىنىڭ ديرەكتورى ورالباي ابدىكارىموۆ.
فوتوكورمەنى تاماشالاعانداردىڭ اراسىندا ق ر ۇلتتىق مۋزەيىنىڭ ديرەكتورى دارحان مىڭباي، سەنات دەپۋتاتى ۆلاديمير رەدكوكاشين، ءماجىلىس دەپۋتاتى قۋانىش سۇلتانوۆ جانە وزگە دە بەلگىلى ازاماتتار بار. كورمە جەڭىمپازدارى 20 -قازان كۇنى، وسى ۇلتتىق مۋزەيدە ماراپاتتالادى.
اۆتور: كەنجەكەي توقتامۇرات قىزى
