دوحاداعى داعدارىس نەمەسە كاپيتاننىڭ كۇيرەۋى

استانا. قازاقپارات - كاتاردىڭ ەلىندەگى الەم چەمپيوناتى ءبىزدىڭ بوكسشىلار ءۇشىن الىنباس قامال بولدى.

اتتەڭ دەيسىڭ، عايىپتان تايىپ الەم چەمپيوناتى تاعى دا الماتىدا بولعانىندا عوي، دوحاعا بارعان سەگىزدىڭ ەڭ قۇرىعاندا تورتەۋى التىن، ەكەۋى كۇمىس، ول از بولسا قالعان ەكەۋى دە قولا الار ەدى... ايتەۋىر قۇر قايتپايتىن ەدىك: ساعان كەرەك پە - ءما، ال. سەن دە ءبىر اتانىڭ بالاسىسىڭ عوي، كوڭىلىڭ قالماسىن - ال، اينالايىن، ال!

ءسويتىپ، دوحا رينگى بوكستا الدىمىزعا جان سالمايمىز دەگەن ءبىزدىڭ ەلدىڭ بىلعارى قولعاپ شەبەرلەرىنە دوق كورسەتتى. كادىمگىدەي كوڭىلدە دىق قالدى. ەكى جىل بۇرىن ءتورت التىن العانىمىزدى ەسكەرىپ، ەڭ قۇرىعاندا جارتىسىن بەرۋى كەرەك ەدى. كۇشتىنىڭ الدىندا كۇيلەپ كىرگەن بايتالداي بولۋدى بىلمەيتىن بۇل نە دەگەن ەل ەدى دەسەڭىزشى؟

جاڭا عانا كاپتيانىمىزدىڭ كۇيرەي جەڭىلگەنىن كوردىك. بۇل نە دەگەن مانەر دەسەڭىزشى... قولىن سىلتەيدى دە قاشادى. ۇتىلىپ جاتقانىن بىلگەن ادام ەسەمدى قايتارام دەپ العا ۇمتىلۋشى ەدى، بىزدىكى كەجەگەسى كەيىن كەتىپ، شەگىنشەكتەي بەرەدى. «قاشقان جاۋعا قاتىن ءبي» دەگەن، تايساقتاپ جۇرگەنىن كورگەن سوڭ موحامماد رابيي اياسىن با، قولىنىڭ قىشۋى قانعانشا ۇردى. يەكتىڭ استىنان كوتەرىپ ۇردى، قۇلاق شەكەدەن قاپتالداتىپ سوقتى.

البەتتە، بۇل سپورت. ءيا، سپورت بولعان سوڭ جەڭەسىڭ ءھام جەڭىلىس بار دەپ كوڭىلدى جۇباتاسىڭ... ءبىراق...

52 ك گ سالماقتا ازەربايجاندىق ماميشزادەگە ەسە جىبەرگەن كۋبا بوكسشىسى يوسۆاني ۆەيتيا سياقتى جەڭىلسە عوي - ارمان جوق. تورەشىلەردىڭ تۇگىن قويماي بوقتاپ، كوڭىلدى قىجىلمەن جۇباتار ەدىك.

مىنە، شارشى الاڭدا سەرەڭ-سەرەڭ ەتىپ جۇرگەن دىچكو دا داۋسىز جەڭىلدى. تۇيە بويىنا سەنىپ جىلدان قۇر قالعاننىڭ كەرى... قاقىراتىپ سوعۋدىڭ ورنىنا قوقاڭ-قوقاڭ ەتىپ ءجۇرىپ العانىڭا بولايىن...

دوحاداعى داعدارىسقا ايتۋلى دەگەن ماماندارىمىز جان-جاقتى تالداۋ جاساپ، ءادىل باعاسىن بەرۋى كەرەك. قۇلىبايەۆ قالاي قابىلدار ەكەن، قاتتى ايتساق ايتجانوۆتىڭ كوڭىلىنە كەلىپ قالماي ما دەپ شىجبالاقتاماي، شىندىقتى شىجعىرىپ تۇرىپ بەتكە ايتۋ كەرەك. توقىراۋ بار ما - تەرەڭىنە ءۇڭىلىپ، سەبەبىن ىزدەگەن ءجون شىعار. ايتپەسە، جاي عانا جول بولمادى ما - وندا دالەلىن ايتسىن! ءبارىن ايتسىن. تەك، كىنانى تورەشىدەن ىزدەمەيىكشى. ءوز باسىم ءدال وسى جولى تورەشىدەن تەپەرىش كورگەن بوكسشىمىزدى كورگەن جوقپىن.

«ءبىز نە كورمەدىك: قاسقىر دا قامادى، بايىم دا سابادى»، دەپتى باياعىدا ءبىر بەيباق. الماتىدا اقسارباس ايتقاندى كوردىك، دوحاداعى ماسقاراعا دا كۋا بولدىق. ەندى ريودا ءبىزدى ءبۇيتىپ رەنجىتپەسە ەكەن. بوكس بولماسا ءبىزدى كىم ەلەپ جاتىر دەيسىڭ الەمدە...

قايرات ابدولدانىڭ فەيسبۋكتاعى پاراقشاسىنان