ا ق ش- تاعى باتىرحان شۇكەنوۆتىڭ وتباسى دالادا قالىپ قويدى

استانا. قازاقپارات - باتىرحان شۇكەنوۆتىڭ بۇرىنعى ايەلى مەن ۇلى ا ق ش-تاعى ۇيىنەن ايىرىلىپ قالدى دەپ مالىمدەدى تانىمال جۋرناليست ءارى ءانشىنىڭ دوسى وتار كۋشاناشۆيلي.

«ا ق ش- تا ونىڭ ايەلى كاتيا مەن ەسەيىپ قالعان ۇلى قالدى. بىردەن باسىن اشايىن: كاتيا مۇلدەم قايتىپ ورالعىسى كەلمەيدى. ۇلى تىپتەن قارسى. ءۇي سالىنىپ بىتۋگە قالعان ەدى. بۇل امەريكا - اقشاڭ جوق بولسا، دالادا تەنتىرەپ قالاسىڭ. كاتيا بالاسىمەن جاناشىرلىق تانىتقان تانىستارىنىڭ ۇيىنە كوشتى. ولار كومەككە ءزارۋ»، - دەيدى رەسەيلىك شوۋمەن prozvezd.info پورتالىنا بەرگەن سۇحباتىندا.

باتىرحان شۇكەنوۆتىڭ ديرەكتورى NUR. KZ- كە قازاقستاندىق مۋزىكانتتىڭ وتباسىنداعى قيىنشىلىقتار تۋرالى ايتىپ بەردى.

«باتىرحاننىڭ وتباسى جالدامالى ۇيدە تۇراتىن. جالداۋ اقىسىن ءانشى ءوزى تولەپ وتىرعان. قايعىلى جاعدايدان كەيىن ۇيگە اقىنى تولەۋ مۇمكىن بولماي قالدى. سول سەبەپتى كاتيا ۇلىمەن دوستارىنىڭ ۇيىنە كوشتى. قازىر ءبىز بۇل ماسەلەنى شەشۋگە تىرىسۋدامىز»، - دەيدى قازاقستاندىق ءارتىستىڭ وكىلى.

«باتىر بۇل دۇنيەدەن كەتكەلى بەرى ولار ۇيىنەن كوشىپ كەتىپ، دوستارىندا تۇرىپ جاتىر. قازىر مەن جانە باتىردىڭ وتباسى بىرىگىپ، ولارعا سول جەردەن پاتەر الىپ بەرۋ ماسەلەسىن شەشۋگە تىرىسۋدامىز»، - دەيدى ولجاس بايكانوۆ Today.kz تىلشىسىنە. ول رەسەيلىك ب ا ق- تىڭ وتباسى ۇيدەن قۋىلدى دەگەن اقپاراتىن جوققا شىعاردى.

ونىڭ اقپاراتىنا سايكەس، 14 جاستاعى ماقسۇت شۇكەنوۆ اناسىمەن بىرگە فلوريدا شتاتىنىڭ ساراسوتا قالاسىندا تۇرىپ جاتىر. بايكانوۆ شۇكەنوۆتىڭ ۇلىنا ا ق ش- تا ءۇي سالۋدى جوسپارلاپ كەلگەنىن، ءتىپتى قۇرىلىسقا ءبىرشاما قاراجات تا جيناپ ۇلگەرگەنىن العا تارتتى.

«باتىر امەريكادا سالىپ باستاعان ءۇيدىڭ قۇرىلىسىنا قاراجات سوڭىنا دەيىن تولەنبەي قالدى. تەك جارتىسىن عانا تولەپ ۇلگەرگەن. ەندى سوت ارقىلى قۇرىلىسقا كەتكەن قاراجاتتى قايتارىپ الامىز دەپ ۇمىتتەنەمىز. الايدا ول كوپ قاراجات ەمەس. ءبىز سول جاقتان تىم قۇرىسا پاتەر ساتىپ الۋى ءۇشىن فوند جوبالارىنىڭ ەسەسىنەن قاراجات جيناۋعا تىرىسۋدامىز (باتىرحان شۇكەنوۆ اتىنداعى قوعامدىق فوند)»، - دەيدى ولجاس بايكانوۆ.

الدىن الا ەسەپتەۋلەر بويىنشا، پاتەردى ساتىپ الۋعا كەمىندە 300 مىڭ دوللار قاجەت.

«قازىر فوند بۇل ماسەلەمەن اينالىسۋدا. الايدا، وكىنىشكە قاراي قولداۋ كورسەتىپ جاتقاندار جوق. مەتسەناتتار دا، دەمەۋشىلەر دە جوق. تەك كىشىگىرىم قاراجاتىن بولگەن 40 قاراپايىم ادام عانا بار. شامامەن 1600 دوللار عانا جينالدى. ءبىز ءتىپتى كەڭسايدا ەسكەرتكىش ورناتۋ ءۇشىن قاراجات تابا الماي وتىرمىز»، - دەيدى وتباسىنىڭ دوسى.

ول فوندقا قاراجات جيناۋ ءۇشىن باتىرحان شۇكەنوۆتىڭ كومپاكت-ديسكىلەرىن شىعارىپ، كونسەرت ۇيىمداستىرۋدى جوسپارلاپ وتىرعانىن ايتتى.

ەسكە سالساق، مۋزىكانت باتىرحان شۇكەنوۆ وسى جىلدىڭ ساۋىرىندە 52 جاسقا كەلگەن شاعىندا دۇنيەدەن ءوتتى. ءانشىنىڭ قازا بولۋىنا جۇرەك سىرقاتى سەبەپ بولعان.

دەرەككوز: NUR. KZ