بوسقىنداردىڭ كەيپىنە ەنگەن لاڭكەستەر بولۋى مۇمكىن - نازاربايەۆ
ت م د مەملەكەتتەرى باسشىلارى كەڭەسىنىڭ جالپى وتىرىسىندا حالىقارالىق تەرروريزمگە قارسى كۇرەس جانە ب ۇ ۇ 70 جىلدىعىنا ارنالعان مالىمدەمەلەرىنە قول قويىلدى.
«ت م د جاڭاشىلدىققا بەيىمدەلىپ، جاھاندىق وزگەرىستەر مەن قارسىلىقتارعا ودان دا تيىمدىرەك ارەكەت ەتۋى كەرەك. ءبىز بۇل تۋرالى ايتقانبىز. بۇگىن تالقىلاناتىن تاقىرىپتاردىڭ ءبىرى قاۋىپسىزدىك سالاسىنداعى حالىقارالىق جاعداي. الەمدەگى جاعدايدى سيپاتتاي كەلە، لاڭكەستىك ۇيىمداردىڭ جاندانۋىن كونستاتاتسيالاۋ كەرەك، ولاردىڭ ارەكەتى بەيبىتشىلىكتىڭ تىرەگىن قۇلاتادى. بۇل جەردە حالىقارالىق تەرروريزمنىڭ كوپتەگەن مەملەكەتتەگى جاعدايلارعا ىقپال ەتىپ، ءبۇتىن ءبىر وڭىرلەردى قوزعاپ وتىرعانىن ايتا كەتكەن ءجون. زومبىلىقتىڭ قازىرگى ۇدەرىسى بەيبىت حالىق اراسىندا قۇربانداردىڭ سانىن ارتتىرىپ وتىر، اسىرەسە ايەلدەر مەن بالالار اراسىندا. سونىڭ سالدارىنان سولتۇستىك افريكا، تاياۋ شىعىس پەن ەۋروپادان ەرىكسىز قاشقان ادامداردىڭ كوشى-قونى ەكىنشى دۇنيەجۇزىلىك سوعىستاعى كورسەتكىشتەرگە الىپ كەلدى.
بۇل ماسەلەنى شەشۋگە قارجىلاي زور الەۋەت قاجەت بولادى. سونىمەن قاتار، بوسقىنداردىڭ اراسىندا ولاردىڭ كەيپىنە ەنگەن لاڭكەستەردىڭ دە بولۋ مۇمكىن. (...) ءبىز، ت م د مەملەكەتتەرىنىڭ باسشىلارى بىرلەسىپ قاۋىپسىزدىك بويىنشا ءتيىمدى شارالاردى ۋاقىتىندا قولعا الۋعا ءتيىسپىز. ونىمەن كۇرەسۋ ءۇشىن ب ۇ ۇ- نىڭ ماقۇلداۋىمەن لاڭكەستىك ۇيىمدارمەن كۇرەس بويىنشا بۇكىل الەمدىك جەلى قۇرۋ كەرەك»، - دەدى قازاقستان پرەزيدەنتى.
ەسكە سالا كەتەيىك، بۇگىن بۋرابايدا ت م د مەملەكەتتەرى باسشىلارى كەڭەسىنە سەگىز ەلدىڭ پرەزيدەنتى قاتىسىپ جاتىر: قازاقستان رەسپۋبليكاسىنىڭ پرەزيدەنتى نازاربايەۆ، ازەربايجان رەسپۋبليكاسىنىڭ پرەزيدەنتى اليەۆ، ارمەنيا رەسپۋبليكاسىنىڭ پرەزيدەنتى سارگسيان، بەلارۋس رەسپۋبليكاسىنىڭ پرەزيدەنتى لۋكاشەنكو، قىرعىز رەسپۋبليكاسىنىڭ پرەزيدەنتى اتامبايەۆ، رەسەي فەدەراتسياسىنىڭ پرەزيدەنتى پۋتين، تاجىكستان رەسپۋبليكاسىنىڭ پرەزيدەنتى راحمون، وزبەكستان رەسپۋبليكاسىنىڭ پرەزيدەنتى كاريموۆ، مولدوۆا رەسپۋبليكاسىنىڭ پرەمەر-ءمينيسترى سترەلەس، تۇرىكمەنستان مينيسترلەر كابينەتى ءتوراعاسىنىڭ ورىنباسارى ساتلىكوۆ.
كۇننىڭ ەكىنشى جارتىسىندا جوعارى ەۋرازيالىق ەكونوميكالىق كەڭەسى وتەدى. وعان قازاقستان پرەزيدەنتى نۇرسۇلتان نازاربايەۆ پەن ارمەنيا، بەلارۋس، قىرعىزستان جانە رەسەي باسشىلارى قاتىسادى.
بۇل تۋرالى Tengrinews.kz حابارلادى.
