الماتىدا ترامۆاي اپاتى كەزىندە جولاۋشىلاردى قۇتقارعان ستۋدەنت اتا-اناسىن ويلاپتى
بۇل تۋرالى ول Tengrinews.kz تىلشىسىنە بەرگەن سۇحباتىندا ايتىپ بەردى.
ەسكە سالايىق، ءبىر اي ىشىندە ەكىنشى رەت بولىپ وتىرعان ترامۆاي اپاتىنان بەس ادام زارداپ شەكتى. وقيعا 2015 -جىلدىڭ 13 -قازانىندا ماقاتايەۆ پەن سەيفۋللين قيىلىسىندا بولدى.
يۋسەفي اپاتقا ۇشىراعان ترامۆايعا ويدا جوقتا مىنگەنىن ايتىپ بەردى. سول كۇنى ول كوك بازارداعى مەشىتتەن نامازدان قايتىپ كەلە جاتقان. نامازدان كەيىن ستۋدەنت ايالداماعا بارىپ، اۆتوبۋس كۇتىپ تۇرعان. ءبىراق قوعامدىق كولىك كەلمەي قالىپ، ول ترامۆايعا مىنۋگە ءماجبۇر بولىپتى. ال كىرگەننەن كەيىن ول ءتورتىنشى ەمەس، التىنشى باعىتتاعى ترامۆايعا وتىرۋى ءتيىس ەكەنىن ەسكە الادى. «مەن شىعايىن دەپ جاتتىم دا ارتىما قارادىم. ايەلدەر مەن بالالاردىڭ جىلاپ جاتقانىن كوردىم. ەگەر سەكىرىپ كەتسەم، جاعدايدىڭ قيىن بولاتىنىن ءتۇسىندىم. جۇرگىزۋشى ەسىگىن اشپاق بولدىم، ءبىراق ول كىلتتەنىپ قالىپتى. قولمەن ۇرىپ، اياقپەن تەپكىلەي باستادىم. تەرەزەسىن سىندىرعاننان كەيىن بارلىق باتىرمانى باسا بەردىم. سودان كەيىن عانا ستوپ-كراندى تارتۋىم كەرەك ەكەنىن ءتۇسىندىم»، - دەدى جىگىت. ستۋدەنت كولىك سالونىنداعى ەگدە جاستاعى ادامداردى كورگەننەن كەيىن ءوز اكە- شەشەسىن ەسكە العانىن ايتتى. «مەن ءوز انامدى ەسكە الدىم. اتا-انامدى ساعىندىم. سوندىقتان قىرىق ادام قازا بولعانشا، ءبىر ادامنىڭ ءومىرى قيىلسىن دەپ ويلادىم»، - دەيدى يۋسەفي.
ستۋدەنتتىڭ ايتۋىنشا، ول ساياساتقا ارالاسقىسى كەلمەيدى. باشارات دارىگەرلەردىڭ تەك ناۋقاستاردىڭ جاعدايىن ويلاۋى كەرەكتىگىن ايتادى. «بولاشاقتا اسفەندياروۆ اتىنداعى قازاق ۇلتتىق ۋنيۆەرسيتەتتە وقىپ جاتقان جولداستارىم دا، مەن دە اۋعانستانعا قايتىپ، دارىگەر بولۋدى جوسپارلاپ وتىرمىز. مۇندا ءبىز ءۇش تىلدە وقىپ جاتىرمىز - قازاق ءتىلى، ورىس ءتىلى جانە اعىلشىن. مۇنداي مۇمكىندىك بەرگەنى ءۇشىن قازاقستانعا العىس ايتامىز»، - دەيدى ستۋدەنت.
وسى جول- كولىك وقيعاسىنىڭ كۋاگەرى بولعان حيۋاز سازانبايەۆا ستۋدەنتتىڭ ەرلىگى تۋرالى جوعارى وقۋ ورنىنىڭ وكىلدەرىنە حابارلاپتى. سازانبايەۆا وقيعانىڭ ءمان-جايىن ايتىپ بەردى. ونىڭ ايتۋىنشا، ترامۆاي باستاپقىدا قونايەۆ پەن ماقاتايەۆ كوشەلەرىنىڭ قيىلىسىندا توقتايدى. جۇرگىزۋشى جولاۋشىلاردىڭ بىرىنەن بەلگى بەرگەن كەزدە باتىرمانى باسۋدى سۇرايدى، سويتەدى دە ءوزى بىرنەشە ەر اداممەن كولىكتى يتەرۋگە كەتەدى. ال جولاۋشى قىز بولسا باتىرمانى شاتاستىرىپ الادى، بۇدان كەيىن ترامۆاي قوزعالىپ كەتەدى. «جولاۋشىلار ايعايلاي باستادى، جىلاپ، قۇدايعا جالبارىنا باستادى. باشارات ەسىك تەرەزەسىن شاعىپ، ستوپ- كراندى تارتتى. وسىدان كەيىن مەن ءتۇنى بويى ۇيىقتاي الماي شىقتىم. كەلەسى كۇنى ستۋدەنتتى تاۋىپ، العىس ايتقىم كەلدى. جولاۋشىلاردىڭ اتىنان العىس ايتامىن»، - دەدى سازانبايەۆا.
ەسكە سالايىق، وسىعان دەيىن اسفەندياروۆ اتىنداعى قازاق ۇلتتىق ۋنيۆەرسيتەتىنىڭ رەكتورى ايقان اقانوۆ Tengrinews.kz تىلشىسىنە بەرگەن سۇحباتىندا عىلىمي كەڭەستە باشاراتتى "ۋنيۆەرسيتەت ماقتانىشى" گالەرەياسىنا قوسۋعا ۇسىنىس جاسايتىنىن ايتىپ بەرگەنى حابارلاندى. تىزىمدە بەس ادام بار، ولاردىڭ ىشىندە 7-قالالىق اۋرۋحانانىڭ باس دارىگەرى بولاتبەك بايماحانوۆ بار، ول قازاقستاندا تۇڭعىش رەت باۋىر اۋىستىرۋ وپەراتسياسىن جاساپتى. اقانوۆ باشاراتتىڭ اۋعانستاننان كەلگەن 200 ستۋدەنتتىڭ ءبىرى ەكەنىن ايتتى. بۇل ستۋدەنتتەر ورتاازيالىق مەملەكەتتىك كومەك كورسەتۋ اياسىندا ق ر بيۋدجەتىندە گرانتپەن وقيدى ەكەن. جىگىت وقۋدا ۇزدىك جانە ۆولەيبولدان ۋنيۆەرسيتەت ليگاسىنىڭ قاتىسۋشىسى.
رەكتوردىڭ ايتۋىنشا، ناعىز دارىگەردىڭ ءىسىن جاسادى. «باشارات كەشە ادامگەرشىلىگىن كورسەتتى. ءبىز ونىڭ اتا- اناسىنا مىندەتتى تۇردە حات جازىپ، تاربيەلەرى ءۇشىن العىس ايتامىز. بەس جىل بۇرىن اۋعانستاننان ستۋدەنتتەردى العان ءبىز ولاردىڭ ادامگەرشىلىگى بار دارىگەر يدەولوگياسىن قابىلداۋى ءۇشىن ءبارىن جاسادىق. باستى ميسسيالارىمىزدىڭ ءبىرى - ادامگەرشىلىكتى تاربيەلەۋ. باشارات ناعىز بولاشاق دارىگەر رەتىندە ەرلىك جاسادى»، - دەدى اقانوۆ.
ەسكە سالا كەتەيىك، 2015 -جىلدىڭ 13 -قازانىندا بولعان جول اپاتىندا 5 ادام زارداپ شەكتى. ولاردىڭ تورتەۋى اۋرۋحانادان شىعارىلدى، ال بىرەۋى، الماتى قالالىق دەنساۋلىق ساقتاۋ باسقارماسىنىڭ مالىمەتىنشە، دارىگەرلەردىڭ قاراۋىندا. وعان باسسۇيەك ميىنىڭ اشىق جاراقاتى دەگەن دياگنوز قويىلعان.
ايتا كەتەيىك، وسى وقيعادان بۇرىن، 2015 -جىلدىڭ 21 -قىركۇيەگىندە الماتىدا ترامۆايدىڭ قاتىسۋىمەن تاعى ءبىر ءىرى جول- كولىك وقيعاسى بولعان ەدى. سول ۋاقىتتا باسقارۋسىز قالعان ترامۆاي شەۆچەنكو، ماسانچي جانە بايتۇرسىنوۆ كوشەلەرىندە بىرنەشە اۆتوموبيلدى سوعىپ كەتكەن بولاتىن. زارداپ شەككەندەردىڭ ءبىرى ءالى كۇنگە دارىگەرلەردىڭ قاراۋىندا جاتىر.
