يسلامبەك قۋات تۇركيا حالقىنا قاھارمان اتاندى
ءيا، قاراپ تۇرساڭ بۇل جەڭىستىڭ ءبىز ءۇشىن، بەسىنشى ورىنعا كوتەرىلگەننەن باسقا، ايتارلىقتاي ماڭىزى جوق دەسەك تە بولادى. دەگەنمەن جەڭىستىڭ اتى جەڭىس، جىگىتتەردىڭ سوڭعى ويىندا نامىسقا تىرىسىپ، ءۇش ۇپايدى العاندارى قۋانتادى.
ءبىراق اڭگىمە باسقادا. بۇل جەڭىس بىزگە ەمەس، الىستاعى اعايىنىمىز تۇركياعا اۋاداي قاجەت ەدى. ءيا، ءتاڭىرى ءبارىن اينالدىرىپ كەلىپ، تۇرىكتەردىڭ ەۋرو-2016 ىرىكتەۋ تۋرنيرىندەگى تاعدىرىن قازاقتاردىڭ قولىنا تاپسىرىپ قويعانىن قاراشى. ۇنەمى جەڭىلىستىڭ ءدامىن تاتىپ جۇرەتىن قازاقستان قۇراماسى ءدال وسى كۇنى لاتۆيانى جەڭسە، تۇركيا قۇراماسى فرانسيادا وتەتىن دوداعا تىكەلەي ءوتۋ مۇمكىندىگىنە يە بولۋى ءتيىس ەدى. البەتتە ولار وزدەرى دە يسلانديانى ۇتۋى ءتيىس بولاتىن، سولاي بولدى دا. ءوز الاڭىنداعى ويىندى اياقتاپ، قازاقتار مەن لاتىشتاردىڭ ويىنىنىڭ ناتيجەسىن كۇتكەن تۇرىكتەر ءبىزدىڭ جەڭىستى قاتتى تىلەگەن بولسا كەرەك. جىگىتتەرىمىز قاپى قالمادى. ريگادا وتكەن ويىننىڭ 65- مينۋتىندا بىرنەشە پاستان كەيىن دوپ يسلامبەك قۋاتتىڭ اياعىنا ءتۇسىپ، ول قارسىلاستىڭ قاقپاسىنا گول سالدى. بۇل ەسەپ ويىن سوڭىنا دەيىن ساقتالدى. قازاقستان لاتۆيانى ۇتتى، ال تۇركيا ەۋرو-2016 دوداسىنا تىكەلەي جولداما الدى، گول سوققان يسلامبەك قۋات تۇركيانىڭ قاھارمانىنا اينالىپ شىعا كەلدى. جەرگىلىكتى ب ا ق وكىلدەرى يسلامبەك جايلى ماقالالار جازىپ جاتىر، ال جانكۇيەرلەر ۇلدارىن يسلامبەك قۋات دەپ اتاعىسى كەلەتىنىن ايتۋدا. الەۋمەتتىك جەلىلەرگە #islambekkuat حەشتەگىن تەرىپ كورىڭىز، قىزىقتىڭ كوكەسىنە كۋا بولاسىز.
ال مەن سول كۇنى تۋيتتەردە جازىلعان جازبالاردان ۇزىندىلەر كەلتىرەيىن:
- يسلامبەك قۋات تۇركياعا كەلىپ پارتيا اش، داۋىس بەرەيىك.
- بۇگىن دۇنيەگە كەلگەن ءسابيدىڭ اتىن يسلامبەك قۋات قويىڭدار.
- ادىلەت مينيسترلىگىندە تانىستارىڭىز بار ما، 3 جاسار ۇلىمنىڭ اتىن يسلامبەك قۋات دەپ اۋىستىرامىن.
- يسلامبەك قۋات باۋىرىمىزدىڭ اتىمەن تۇركيانىڭ ءبىر جەرى اتالۋى كەرەك.
- تۇركياعا شاقىرىپ 3 كۇن، 3 ءتۇن قوناق قىلايىق.
- يسلامبەك قۋات ناعىز ەركەكسىڭ، مەملەكەتىمىزدەن ەڭبەكاقى (ايلىق) تولەنۋى ءتيىس بۇل ازاماتقا.
- «ۇلىم ەكەۋمىز اۋلادا دوپ تەپكەندە سۇيىكتى فۋتبولشى بولىپ ويناۋشى ەدىك. ۇلىم بولسا - مەن، مەن بولسام يسلامبەك قۋات بولۋشى ەدىم». ز. زيدان
- قازىر ايەلىم جۇكتى بولعاندا، ءسابيدىڭ اتىن يسلامبەك قۋات قويار ەدىم. اتتەڭ بويداقپىن.
- يسلامبەك قۋات سۋپەر ليگاننىڭ قايسى كومانداسىنا اۋىسادى؟
- يسلامبەك قۋات «حالىق قاھارمانى» اتانىپ، مەملەكەتتىك سىيلىق بەرىلسىن.
- بۇل جىگىتكە تۇركيانىڭ ازاماتتىعىن بەرۋ كەرەك، كەلەسى جىلى بىزگە ويناسىن.
- جاڭا تۋعان سابيلەردىڭ اتى يسلامبەك بولسىن.
- مەترونىڭ ءبىر ايالداماسىنا يسلامبەك قۋات اتى بەرىلسىن.
(تۋيتتەردەن اۋدارعان: نۇرلان احمەتوۆ)
ال مىنا ۆيدەودا تۇرىكتەردىڭ ءوز الاڭىنداعى ويىن سوڭىندا قازاقستان مەن لاتۆيا ويىنىنىڭ سوڭىن كۇتكەن ءساتى، «قازاقستان جەڭدى» دەگەن حاباردىڭ كەلگەنىنە ولاردىڭ قالاي قۋانعاندىعى كورسەتىلگەن:
يسلامبەك قۋاتتىڭ سوققان دوبى:
massaget.kz
