بۋرابايدا ت م د مەملەكەت باسشىلارى كەڭەسىنىڭ وتىرىسى باستالدى

 بۋراباي. قازاقپارات - اقمولا وبلىسىنا قاراستى بۋراباي كەنتىندە ق ر پرەزيدەنتى نۇرسۇلتان نازاربايەۆتىڭ توراعالىعىمەن تاۋەلسىز مەملەكەتتەر دوستاستىعى مەملەكەت باسشىلارى كەڭەسىنىڭ وتىرىسى باستالدى، دەپ حابارلايدى قازاقپارات ءتىلشىسى.

 جوعارى دەڭگەيدەگى وتىرىسقا ارمەنيا پرەزيدەنتى سەرج سارگسيان، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى المازبەك اتامبايەۆ، رەسەي پرەزيدەنتى ۆلاديمير پۋتين، ازەربايجان پرەزيدەنتى يلحام اليەۆ، تاجىكستان پرەزيدەنتى ەمومالي راحمون، وزبەكستان پرەزيدەنتى يسلام كارىموۆ، مولدوۆا سىرتقى ىستەر جانە ەۋروپالىق ينتەگراتسيا ءمينيسترىنىڭ ورىنباسارى اندرەي گالبۋر، تۇركىمەنستان مينيسترلەر كابينەتى ءتوراعاسىنىڭ ورىنباسارى ساتلىق ساتلىكوۆ، ۋكراينانىڭ قازاقستانداعى ىستەرىنىڭ ۋاقىتشا سەنىمدى وكىلى يۋريي لازەبنيك، ت م د اتقارۋ كوميتەتىنىڭ ءتوراعاسى - اتقارۋشى حاتشىسى سەرگەي لەبەديەۆ قاتىسۋدا.

كەزدەسۋ قاتىسۋشىلارى لاڭكەستىك قاۋپىنە بىرلەسە قارسى تۇرۋ، قاۋىپسىزدىك پەن قۇقىقتىق ءتارتىپتى قامتاماسىز ەتۋ، دوستاستىق قاتىسۋشى- ەلدەرى كۇش- قۋات قۇرىلىمدارىنىڭ ىنتىماقتاستىعى جانە باسقا دا نەگىزگى ماسەلەلەردى قامتيتىن تاقىرىپتار توپتاماسىن تالقىلايدى.

 اتاپ ايتقاندا، بىرىككەن ۇلتتار ۇيىمىنىڭ قۇرىلعانىنا 70 جىل تولۋىنا وراي جانە حالىقارالىق لاڭكەستىكپەن كۇرەس تۋرالى مالىمدەمەلەر، چەرنوبىل ا ە س- ىندەگى اپاتتىڭ 30 جىلدىعىمەن بايلانىستى ۇندەۋ قابىلدانۋى جوسپارلانۋدا. سونىمەن قاتار وتىرىس بارىسىندا 2020 - جىلعا دەيىنگى اسكەري ىنتىماقتاستىق تۇجىرىمداماسى، 2016-2020 - جىلدارعا ارنالعان سىرتقى شەكارالارداعى شەكارالىق قاۋىپسىزدىكتى نىعايتۋ باعدارلاماسى قابىلدانباق.

 مۇنان بولەك، تاراپتار تۇركىمەنستاننىڭ داشوگۋز قالاسىن ت م د- نڭ 2016 - جىلعى مادەني استاناسى دەپ جاريالاماق. سونداي- اق 2016 - جىلى ت م د- عا قىرعىز رەسپۋبليكاسىنىڭ ءتوراعالىعى تۋرالى شەشىم شىعارىلماق.

 اۆتور: مارلان جيەمباي