بابالار ءسوزى: رايىمبەك بۇلاعى قالاي پايدا بولدى؟
«بابالار ءسوزى» ايدارى نەگىزىنە «مادەني مۇرا» باعدارلاماسى اياسىندا شىققان 100 تومدىق اۋىز ادەبيەتىنىڭ جىر- تولعاۋلارى، قيسسا- داستاندار، ءسوز ۇستاعان شەشەندەر مەن بيلەرىمىزدەن قالعان ناقىلدار، تاريحي جادىگەرلەر الىندى.
***
جوڭعار شاپقىنشىلىعى تۇسىنداعى رايىمبەك باتىردىڭ ءبىر ءىسى ەل ەسىندە ماڭگى ساقتالعان. ول ءوز ساربازدارىمەن قازاق جەرىن قالماق جاۋلاپ الۋشىلارىنان قورعاعان ەكەن. اۋىر شايقاستار ءوتىپ جاتىپتى. بىردە دۇشپانداردى قۋىپ كەلە جاتىپ، رايىمبەك جاساعى قۇمعا شىعىپ كەتىپتى. ولاردى ءشول قينايدى.
ءسويتىپ ولار سۋ ىزدەي باستايدى. ۇزاق ىزدەپتى، ءبىراق ەش جەردەن سۋ كوزى كورىنبەيدى. جاۋىنگەرلەر السىرەي تۇسەدى. سوندا رايىمبەك نايزاسىن بار كۇشىمەن جەرگە شانشىپ جىبەرەدى. قايتا سۋىرىپ العاندا، جەردەن شاپشىپ سۋ شىعادى.
سول بۇلاق الماتى وبلىسىنىڭ قاراقاستەك اۋىلىندا كۇنى بۇگىنگە دەيىن بار. حالىق ونى قاسيەتتى بۇلاق دەپ سانايدى دا، قۇرمەتتەپ «رايىمبەك بۇلاعى» دەپ اتايدى.
