ۇلتتىق مۋزەيدە «ادەمى - اي» ونەر مۋزەيى قۇشان پاتشالىعى كەزىندەگى جادىگەرلەردى كورمەگە شىعاردى

استانا. قازاقپارات - بۇگىن ۇلتتىق مۋزەيدە «ادەمى- اي» ونەر مۋزەيىنىڭ «زەرگەرلىك ونەر» اتتى كورمەسى اشىلدى.

قازاق حاندىعىنىڭ 550 جىلدىعىنا ارنالعان كورمەدەگى ەڭ كونە جادىگەرلەردىڭ ءبىرى - قۇشان پاتشالىعى كەزىندەگى كانيشكا پاتشانىڭ بەينەسى بار تيىندار ەكەن.  

«ادەمى- اي» ونەر مۋزەيىندە جالپى مىڭنان اسا كوللەكسياسى بار. ال بۇگىن قازاق حاندىعىنىڭ 550 جىلدىعىنا وراي وسى جادىگەرلەر اراسىنان قازاق حاندىعى داۋىرىنەن سىر شەرتەتىن بۇيىمداردى كورمەگە شىعاردىق.

«زەرگەرلىك ونەر» اتتى بۇگىنگى كورمە «زەرگەرلىك بۇيىمدار»، «كوشپەندى قازاقتىڭ تۇرمىستىق بۇيىمدارى» سياقتى توپتارعا ءبولىنىپ وتىر. زاتتارىمنىڭ كوبى - زەرگەرلىك بۇيىمدار. ولاردىڭ اراسىندا ۇمىت بولىپ بارا جاتقان قۇس تۇمسىق جۇزىكتەر، توپسالى بىلەزىكتەر، اسىل تاستار قوندىرعان بويتۇمارلار، شاشپاۋلار مەن شولپىلار، اي سىرعا، قوجالى سىرعا سياقتى سىرعانىڭ 100 دەن استام ءتۇرى، ەر ادامداردىڭ بەلدىكتەرى، وتە جاقسى كۇيىندە ساقتالعان ەر تۇرماندار، قامشىلار، كيىز ءۇي جابدىقتارى بار»، - دەيدى «ادەمى- اي» ونەر مۋزەيىنىڭ نەگىزىن قالاعان ونەرتانۋشى باحارگۇل تولەگەن.

ب. تولەگەن اتاپ وتكەندەي، كورمەدەگى ەڭ كونە جادىگەردىڭ ءبىرى - قۇشان پاتشالىعى كەزىندەگى كانيشكا پاتشانىڭ بەينەسى بار تەڭگەلەر.

«كونە جادىگەرلەردىڭ اراسىنان ب. ز. ب. 1-3 - عاسىرلارداعى كونە مەملەكەت - قۇشان پاتشالىعى كەزىندەگى كانيشكا پاتشانىڭ بەينەسى بار تەڭگەلەردى ەرەكشە اتاۋعا بولادى. سونداي- اق، 3-5 - عاسىرلارداعى قارۋلار ، 11- 12 عاسىرلارداعى وتىرار كەراميكالارى  دا وسى كورمەنىڭ ءسانىن اشىپ، مازمۇنىن تولىقتىرىپ تۇر»، - دەيدى ب. تولەگەن.

ايتا كەتەيىك، قۇشان پاتشالىعى - كونە زامانداعى مەملەكەت. وركەندەپ تۇرعان كەزىندە (ب. ز. ب. 1 - عاسىردىڭ اياعى - 3 - عاسىردىڭ باسى) قازىرگى ورتا ازيانىڭ ەداۋىر بولىگىن، اۋعانستاندى، باتىس پاكىستاندى، سولتۇستىك ءۇندىستاندى، شىعىس تۇركىستاندى تۇگەل قامتىلعان. ريمدىك پارفيا، حان مەملەكەتىمەن قاتار كونە زامانداعى 4 كۇشتى يمپەريانىڭ ءبىرى بولدى. كونە دۇنيەدە زور ءرول اتقارعاندىعىنا قاراماستان، كۋشان پاتشالىعىنىڭ تاريحى جەتكلىكتى زەرتتەلمەگەن. قۇشان  پاتشالىعى ساياسي تاريحى   جايىنداعى دەرەكتەر قىتاي مەن ريم اۆتورلارىنىڭ جازبالارىنان، قۇشان جەرىندە شىعارىلعان تەڭگە اقشالارعا جۇرگىزىلگەن تالداۋلاردان، ءتۇرلى زاتتاردىڭ بەتىندە ساقتالعان ازداعان جازۋلاردان قالىپتاسادى. قۇشان تاريحىنىڭ ءدال حرونولوگياسى ءالى انىقتالماعان.

اۆتور :   كەنجەكەي توقتامۇرات قىزى