ماقسۇت نارىكبايەۆتىڭ اتى ەشقاشان ۇمىتىلمايدى - ا. داۋىلبايەۆ

 «بۇگىن ءبىز بەلگىلى زاڭگەر، بەلگىلى مەملەكەت جانە قوعام قايراتكەرى، ومىردە وتە جاقسى ادام بولعان ماقسۇت سۇلتان ۇلىمەن ەرىكسىز قوشتاسىپ تۇرمىز. ونىڭ ءومىرى قيىن، ءبىراق، بەكەر وتپەگەن ءومىر. 1940 -جىلى تۋعان ماقسۇت سۇلتان ۇلىنىڭ بالالىعى سوعىسپەن تالاسا وتسە، سوعىستان كەيىنگى اۋىر جىلدار جالىنداعىن جاستىعىنا تۇسپا تۇس كەلدى. ول مەتاللۋرگ تە، قارا جۇمىسشى دا بولدى، قازاق مەملەكەتتىك ۋنيۆەرسيتەتىن بىتىرگەن سوڭ، بۇكىل ءومىرىن زاڭ سالاسىنا ارنادى.

 وقۋ بىتىرگەن سوڭ پروكۋراتۋرادا تەرگەۋشى، زاڭ ورىندارىندا حالىق سۋدياسى، كەيىن پرەزيدەنت اكىمشىلىگىندە، باس پروكۋراتۋرادا جۇمىس ىستەدى، ەلىمىزدىڭ جوعارعى سوتىن باسقاردى. بۇل ادام حالقىنا ايانباي قىزمەت ەتكەن ادام. ماقسۇت سۇلتان ۇلىنىڭ جارقىن بەينەسى ارىپتەستەرىنىڭ، دوستارى مەن جاقىندارىنىڭ، شاكىرتتەرىنىڭ جۇرەگىنەن جوعالماق ەمەس. ماقسۇت نارىكبايەۆتىڭ اتى ەشقاشان ۇمىتىلمايدى»، - دەدى مارقۇمدى اقتىق ساپارعا شىعارىپ سالار كەزدە ق ر باس پروكۋرورى اسحات داۋىلبايەۆ.

م. نارىكبايەۆتىڭ جاقىندارىنا كوڭىل ايتا كەلگەن حالىقتىڭ اراسىندا جوعارعى سوت ءتوراعاسى قايرات ءمامي، استانا اكىمى ادىلبەك جاقسىبەكوۆ، سىرتقى ىستەر ءمينيسترى ەرلان ىدىرىسوۆ، ءبىلىم جانە عىلىم ءمينيسترى اسلان سارىنجىپوۆتەر دە بار.

 ەستەرىڭىزگە سالا كەتەيىك، كەشە، 12 - قازان كۇنى 76 عا قاراعان جاسىندا زاڭ عىلىمدارىنىڭ دوكتورى، پروفەسسور، «قاز گ ز ۋ» ا ق پرەزيدەنتى، كورنەكتى قوعام جانە مەملەكەت قايراتكەرى ماقسۇت سۇلتان ۇلى نارىكبايەۆ دۇنيەدەن ءوتتى. بۇگىن تاڭەرتەڭ قازاق گۋمانيتارلىق زاڭ ۋنيۆەرسيتەتىندە مارقۇممەن قوشتاسۋ ءراسىمى ءوتتى.

ماقسۇت سۇلتان ۇلى نارىكبايەۆ تالدىقورعان وبلىسى تالدىقورعان اۋدانىنىڭ ەركىن اۋىلىندا دۇنيەگە كەلگەن. 1974 - جىلى س. م. كيروۆ اتىنداعى قازاق مەملەكەتتىك ۋنيۆەرسيتەتتى زاڭگەر ماماندىعى بويىنشا ءبىتىرىپ شىقتى (قازىر - ءال- فارابي اتىنداعى قازۇۋ). زاڭ عىلىمدارىنىڭ دوكتورى (1998)، قۇقىقتانۋ پروفەسسورى (2001)، حالىقارالىق جوعارى مەكتەپ اكادەمياسىنىڭ اكادەميگى (2001 -جىلدان باستاپ) . م. نارىكبايەۆ جوعارى كلاستى بىلىكتى سۋديا ەدى.

اۆتور: كەنجەكەي توقتامۇرات قىزى