تۇركيا وپپوزيتسياسى ەكى ءمينيستردىڭ قىزمەتتەن كەتۋىن تالاپ ەتتى
وسى ەلدىڭ قۇقىق قورعاۋ ورگاندارى ءوز- وزدەرىن جارىپ جىبەرگەن ەكى جانكەشتىنىڭ ەر ادام ەكەندىگى انىقتالىپ، ولاردىڭ قانى تەكسەرۋگە جىبەرىلگەنىن مالىمدەپ وتىر. ال بۇگىن تۇركيانىڭ پرەمەر-ءمينيسترى احمەت ءداۋىتوعلى تۇرىكتىڭ NTV ارناسىنا بەرگەن ارنايى سۇحباتىندا قاندى شابۋىلدىڭ ۇيىمداستىرۋشىلارىن اتىن اتاپ، ءتۇسىن تۇستەۋگە از قالدى دەپ سەندىردى.
تۇركيانىڭ تىنىشسىز شىعىس ايماعىنداعى اسكەري قىزمەتكەرلەر مەن سودىرلار اراسىنداعى قاندى قاقتىعىستاردىڭ سالقىنى ەلدىڭ باس شاھارى انكاراعا دا كەلىپ جەتۋى، قاۋىپسىزدىك سالاسى مەن قۇقىق قورعاۋ ورگاندارىنىڭ بىلىكتىلىگىنە كولەڭكە ءتۇسىردى. قايعىلى وقيعادان كەيىن تۇرىك وپپوزيتسياسى ەلدىڭ ىشكى ىستەر ءمينيسترى سەلامي التىنوك پەن ادىلەت ءمينيسترى كەنان يپەكتىڭ دەرەۋ قىزمەتتەن كەتۋى ءتيىس ەكەندىگىن مالىمدەدى.
كەشە كەشكىسىن رەسپۋبليكالىق حالىق پارتياسىنىڭ ءتوراعاسى كەمال كىلىچداروگلى ۇكىمەت جەتەكشىسىمەن كەزدەسۋى بارىسىندا وسالدىق تانىتقان ۆەدومستۆو باسشىلارىن جۇمىسىنان بوساتۋىن تالاپ ەتتى.
كەمال كىلىچداروگلى، رەسپۋبليكالىق حالىق پارتياسىنىڭ ءتوراعاسى:
- ەلىمىز قاسىرەتتى كۇندەردى باستان وتكەرۋدە. قايعىلى وقيعالاردان قابىرعامىز قايىستى. ەگەر ىشكى ىستەر جانە ادىلەت مينيسترلەرىنىڭ حالقىنا، مارقۇم بولعان وتباسىلارىنا تيتىمدەي قۇرمەتى بولسا، ءوز ەركىلەرىمەن قىزمەتتەن كەتۋلەرى ءتيىس. ولار ساياسي جاۋاپكەرشىلىگىن سەزىنۋلەرى قاجەت.
ال تۇركيا پرەمەر-ءمينيسترى احمەت ءداۋىتوعلى قۇقىق قورعاۋ ورگاندارىنىڭ كاسىبيلىگىنە ءشۇبا كەلتىرمەيدى. جارىلىس بولعان كۇنى قۇزىرلى ورگاندار قاۋىپسىزدىك شارالارىن قايتا كۇشەيتكەنىن العا تارتۋدا. ۇكىمەت جەتەكشىسى ءوز ۇستانىمىن وسىدان 3-4 كۇن بۇرىن پوليتسيا ىستامبۇل مەن انكارادا ۇيىمداستىرىلماق بولعان لاڭكەستىك شابۋىلدىڭ الدىن الۋىمەن نەگىزدەيدى. سونداي-اق ءداۋىتوعلى: «انكاراداعى جارىلىستىڭ ارتىندا تۇرعان ۇيىمداستىرۋشىلاردى انە-مىنە انىقتايمىز. وعان «يراك پەن لەۆانت لاڭكەستىك ۇيىمىنىڭ» قاتىسى ءجىتى تەكسەرىلىپ جاتىر»، - دەيدى.
