شىمكەنت قالا كۇنىن جەتى كۇن جەتى ءتۇرلى اتاۋمەن تويلاماق
مۇنى ق ر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ وبلىستىق فيليالىندا وتكەن بريفينگتە قالا اكىمىنىڭ كەڭەسشىسى - باسپا ءسوز حاتشىسى نۇرلىبەك جەڭىسبەك ءمالىم ەتتى، دەپ حابارلايدى Bnews.kz.
«ءار كۇن دەربەس اتاۋعا يە بولىپ، سونىڭ اياسىندا ۇيىمداستىرىلاتىن تاربيەلىك ءمانى بار مەرەكەلىك شارالار تۇرعىنداردىڭ قالاعا دەگەن سۇيىسپەنشىلىگى مەن پاتريوتتىق سەزىمىن وياتادى دەگەن سەنىمدەمىز»، - دەيدى ن. جەڭىسبەك.
قازاق حاندىعىنىڭ 550 جىلدىعىنا وراي، شىرايلى شىمقالا تۋعان كۇنىن وسىلايشا ەرەكشە اتاپ وتپەك. جىل ساناپ گۇلدەنىپ، كوركەيىپ كەلە جاتقان شاھاردىڭ تۋعان كۇنى وزىندىك ەرەكشەلىكتەرمەن ەستە قالماق.
«قازاننىڭ 10-17- كۇندەرى ارالىعىندا وتەتىن مەرەكەلىك شارالاردىڭ ءبىرىنشى كۇنى «جاڭارۋ مەن تازالىق» ايدارىمەن، ەكىنشى كۇن «سالاماتتى ءومىر سالتى كۇنى»، ءۇشىنشى كۇنى «بولاشاقتاعى - شىمكەنت»، ءتورتىنشى كۇن «شىمكەنت - دوستىق مەكەنى»، بەسىنشى كۇن «عاسىرلار توعىسىنداعى قالا»، التىنشى كۇن «شۋاعىن شاشقان شىمقالا» شاتتىق كۇنى ايدارىمەن تويلانادى.
«ۇلكەنگە قۇرمەت، كىشىگە ىزەت بىلدىرگەن دانا حالقىمىز جەتىنشى كۇندى «ىرىس الدى - ىنتىماق» قايىرىمدىلىق كۇنىنە ارنايدى. سونىمەن قاتار، مەرەكەلىك شارادا ات بايگەسى، قىز قۋۋ، تاعى باسقا ۇلتتىق سپورت ويىن تۇرلەرىنەن جارىستار ۇيىمداستىرىلىپ، ەلىمىزدىڭ ەسترادا جۇلدىزدارى مەن شەتەلدىك انشىلەر ونەر كورسەتەدى»، - دەيدى قالا اكىمدىگىنىڭ مادەنيەت جانە تىلدەردى دامىتۋ ءبولىمىنىڭ باسشىسى مۇرات بازارقۇلوۆ.
ن. جەڭىسبەكتىڭ ايتۋىنشا، شىمكەنت قازاقستاننىڭ ەڭ كونە قالاسى اتاعىن الۋى مۇمكىن.
«تاريحشى ارحەولوگتاردىڭ زەرتتەۋىنشە، شىمكەنت قالاسىنا 2200 جىل تولىپ وتىر. بۇل اتاقتى الۋ ءۇشىن بۇگىندە ب ۇ ۇ- عا ءتيىستى قۇجاتتاردى جىبەرىپ وتىرمىز. ەگەر ول جاق ماقۇلداسا 2017-جىلى شىمكەنت - 2200 جىلدىق قالا اتانىپ، ونى تويلاۋىمىز مۇمكىن»، - دەيدى اكىمنىڭ كەڭەسشىسى.
