نەمىستەر كوشى-قون ساياساتىنا قارسى كوتەرىلىسكە شىقتى

ءتارتىپ ساقشىلارىنىڭ ايتۋىنشا، بۇل وقيعا سوڭعى جىلدارى ورىن العان نارازىلىقتاردىڭ ەڭ ۇلكەنى.

شەرۋدى ەۋروسكەپتيكتەردىڭ «گەرمانيا ۇكىمەتىنە بالاما» اتتى پارتياسى ۇيىمداستىرىپتى. ولار گەرمانيا كانتسلەرى انگەلا مەركەلدىڭ قىزمەتىنەن كەتۋىن، بوسقىنداردىڭ شەكارادان وتۋىنە تىيىم سالۋدى تالاپ ەتتى.

سونداي-اق، قىركۇيەك ايىندا تاياۋ شىعىستان اعىلعان بوسقىندارعا سەربيا شەكاراسىن جابۋدى ۇسىنعان ۆەنگر پرەمەر-ءمينيسترى ۆيكتور ورباندى قولدايتىندارىن ايتىپ، ۇرانداتتى. كوتەرىلىسكە ەرفۋرت قالاسىنىڭ حالقى عانا ەمەس، ەلدىڭ تۇكپىر-تۇكپىرىنەن دە نەمىستەر كەلىپ قاتىسقان.

ىشكى ىستەر مينيسترلىگىنىڭ مالىمەتىنشە، بيىلعى قىركۇيەكتىڭ وزىندە گەرمانيادا 164 مىڭعا جۋىق بوسقىن تىركەلگەن. ال، ەل اۋماعىنا جىل باسىنان بەرى 577 مىڭ ميگرانت قونىس اۋدارسا، بوسقىن اتاۋىن الۋعا 303 مىڭنان اسا ءوتىنىش كەلىپ تۇسكەن.

ايتا كەتەيىك، اتالعان پارتيا 2013-جىلدىڭ اقپانىندا قۇرىلدى. پارتيا مۇشەلەرى ەۋروپا ەلدەرى اراسىندا ءبىرىڭعاي ۆاليۋتا ەنگىزۋدىڭ قاتە ەكەنىن، تەك ەلدىڭ ەۋروايماقتان شىققاندا عانا قارىشتاپ داميتىنىن العا تارتادى.

Baq.kz