تىڭشىلاردىڭ زاتتارى قويىلعان مۇراجاي اشىلدى

 اراسىندا مىڭنان استام ەكسپونات پەن حاكەرلىك باعدارلامالار قويىلعان. ءتىپتى تىڭشىلار پايدالاناتىن قوندىرعىلارعا ساراپشىلاردىڭ ءوزى تاڭداي قاعىپ وتىر.

 زاماناۋي تەحنولوگيالارعا ولار جوعارى باعا بەرگەن. بۇل مۇراجايدان الەمنىڭ قۇپيا اگەنتتەرى قولداناتىن زاماناۋي ءتىنتۋشى قوندىرعىلاردىڭ ءتۇر- ءتۇرىن تاباسىز. ماسەلەن مىنا قارۋ سىرتتاي قاراعاندا تەمەكى تۇتقاسىنا ۇقساسا، ارادان اۋمايتىن بۇل قوندىرعى قوپارعىش زاتتى ىزدەيدى. ءتىپتى قاراڭعىدا دا تۇسىرەتىن كامەرالارى بار كولىك تە وسىندا. ال بۇل جاي عانا قولشاتىر ەمەس. كەز- كەلگەنىمىزدى سەسپەي قاتىراتىن ۋى بار قۋاتتى قارۋ. ءدال وسىندا ادامدى اجال قۇشتىراتىن شاراپتاردىڭ دا سان ءتۇرى قويىلعان.

كريستوفەر نەرينگ، بەرلين تۇرعىنى:

 - بارىنەن بۇرىن ماعان تىڭشىلاردىڭ ءىس- قيمىل كارتاسى ۇنادى. بەرلين كوشەلەرىن ارالاپ جۇرسەڭىز ولار جاسىرىنعان شتاب- پاتەردى تابا الاسىز.

جالپى مۇندا وتە قىزىقتى ەكسپوناتتاردى كەزىكتىرۋگە بولادى. ارينە دجەيمس بوندقا ارنالعان بۇرىشتى كورمەي كەتۋگە بولماس.

 كيەۆين وسۆار، تۋريست:

 - ءبىز مۇندا نورۆەگيادان كەلدىك. بالا كەزىمىزدەن تىڭشىلار تۋرالى كومپيۋتەرلىك ويىنداردى كوپ وينايتىنبىز. ەندى مىنە، قۇپيا اگەنتتەردىڭ ومىرىمەن     شىنايى تانىسىپ وتىرمىن. مەنى اسىرەسە جوعارى لاۋازىمدى شەنەۋنىكتەردىڭ كەلىسسوزىن تىڭدايتىن، اياق كيىمنىڭ تاقاسىنا جاسىرىنعان تەحنيكالىق قۇرال قىزىقتىردى. تىڭشىلىق وسىدان 3,5 مىڭ جىل بۇرىن پايدا بولعان كونە كاسىپ ءتۇرى. كەيبىر دەرەكتەرگە سۇيەنسەك، العاشقى قۇپيا اگەنت ەجەلگى مىسىردا بارلاۋ جۇمىستارىن جۇرگىزىپ، جاسىرىن تۇردە ۆاۆيلونعا جۇمىس ىستەگەن. يواحيم توماس، مۇراجاي ديرەكتورى:

- ءبىز 10 جىل بويى تىڭشىلار جايىندا اقپارات پەن ەكسپوناتتار جينادىق. جەكە كوللەكسيونەرلەر ساقتاپ كەلگەن قايتالانا بەرمەيتىن قۇرالداردى تاپتىق. سونىڭ ءبىرى ەنيگما كولىگى. ەكىنشى دۇنيەجۇزىلىك سوعىسى كەزىندە ونى بۇزۋ، جەڭىسكە جەتۋدىڭ ءبىر قادامى ەدى.

بەرليندەگى مۇراجاي تىڭشىلاردىڭ ومىرىنەن سىر شەرتەتىن ەڭ زاماناۋي كەشەن. ينتەراكتيۆتى تاقتا مەن ارنايى مونيتورلاردىڭ ارقاسىندا مۇندا فيلم كورىپ، ەڭ تانىمال تىڭشىلاردىڭ بەرگەن سۇحباتىنان دا قۇلاعدار بولا الاسىز.

 www.24.kz