اباي ەسكەرتكىشى - شىعىس قازاقستاندىقتاردىڭ جامبىل جۇرتىنا تارتۋى
شىعىس قازاقستاندىقتار تاعىلىمى مول تويعا وسىنداي تارتۋ جاسادى. كونە تاراز قالاسىنىڭ قاق تورىنەن ورىن العان ۇلى اقىننىڭ ەسكەرتكىشى وتكەن- كەتكەنگە ۇلاعاتى مەن عيبراتىن ۇقتىرىپ تۇراتىنى انىق، دەپ جازادى «ەگەمەن قازاقستان».
«قازاقتىڭ ءبىر ماقالى: «ونەر الدى - بىرلىك، ىرىس الدى - تىرلىك» دەيدى. بىرلىك قانداي ەلدە بولادى، قايتسە تاتۋ بولادى - بىلمەيدى. قازاق ويلايدى: بىرلىك - ات ورتاق، اس ورتاق، كيىم ورتاق، داۋلەت ورتاق بولسا ەكەن دەيدى. جوق، بىرلىك - اقىلعا بىرلىك، مالعا بىرلىك ەمەس... «ىرىس الدى - تىرلىك» دەيدى، ول قاي تىرلىك؟ جانىن قورعالاتىپ، جاۋدان قاشىپ، قورقاق اتانىپ، ەڭبەك قىلۋدان، قىزمەت قىلۋدان قاشىپ، ەرىنشەك اتانىپ، ەز اتانىپ، دۇنيەدە الگى ايتىلعان ىرىسقا دۇشپان بولادى. ول ايتقان تىرلىك ولار ەمەس. كوكىرەگى، كوڭىلى ءتىرى بولسا، سونى ايتادى».
اباي اتامىز التىنشى قاراسوزىندە وسىلاي دەپ تولعاپتى. ۇلى اقىننىڭ بىرلىك پەن ىنتىماقتى تۋ ەتكەن تەرەڭ دە ماعىنالى اسىل سوزدەرى اتادان بالاعا، نەمەرەدەن شوبەرەگە ۇزىلمەي ساقتالىپ، ءوز قاسيەتىن جويعان ەمەس.
ءيا، شىنىندا بۇل تويدىڭ تاريحتا قالار ورنى، سيپاتى، ءىزى بولۋ كەرەك. جامبىل جەرى ەجەلدەن ۇلتتىق بىرلىكتى سانادا ساقتاعان، تاتۋلىقتىڭ ورداسى بولعان ءوڭىر. تاراز تورىندە تەرەڭ تاريحىمىزدى ۇلىقتاۋعا باعىتتالىپ جاتقان وسىناۋ تىرلىكتەردىڭ ءبارى كونە قالانىڭ جاڭا زامانعا ساي كەلبەتىن، ساۋلەتىن جاساپ، اجارىن اشىپ، ەل وتكەنىن تۇگەندەي تۇسەتىنى انىق. تاراز قالاسىنداعى ەڭ ۇلكەن داڭعىل اباي اتىمەن اتالادى. ەندى، مىنە، سول داڭعىلدىڭ بويىنداعى اباي سكۆەرى قايتادان جاڭعىرتىلىپ، ەڭسەلى ەسكەرتكىشىنىڭ بوي كوتەرۋى قالا حالقىن تاعى ءبىر قۋانتىپ تاستادى.
جالپى، ەلىمىزدىڭ قاي ءوڭىرى دە تاراز جەرىندەگى تورقالى تويعا حال- قادەرىنشە تارتۋ- تارالعى جاسادى. ولاردى قازاق حاندىعى 550 جىلدىعىنىڭ ءبىزدىڭ قالامىزدا بۇگىن وتەتىن سالتاناتتى ءىس-شارالارى كەزىندە ەلىمىزدىڭ تۇكپىر-تۇكپىرىنەن كەلگەن قوناقتار تاماشالايتىن بولادى.
