قوعامداعى جەكسۇرىن ادامدار

ولار شىققان تەگىنە، العان تاربيەسىنە، كورگەن تالىمىنە قاراي سان قىرلى قالىپتاسادى.

ءار ۇيدە ءار ءتۇرلى ءتارتىپ ساقتالاتىندىقتان، ومىرگە دەگەن كوزقاراس سان قيلى قالىپتاساتىندىقتان بىرەۋدىڭ كەي ارەكەتتەرى وزگەلەرگە ۇناماي، اينالاسىنا جەك كورىنىشتى بولادى.

تەمەكى شەگەتىن ادامدار ءوز دەنساۋلىعىمەن قاتار، وزگەلەردىڭ دە ومىرىنە زيان تيگىزەدى. شىلىمىن شەگىپ كەلگەننەن كەيىنگى ءسىڭىپ قالعان جاعىمسىز ءيىسىن ەسەپتەمەگەندە، ادامدار ورتاسىندا وتىرىپ تا كوك ءتۇتىنىن بۋداقتاتا بەرەتىندەر كوپ. بۇل كورىنىسكە اۆتوبۋستا كۇن سايىن كۋا بولىپ ءجۇرمىز. قوعامدىق كولىكتەگى ادامداردىڭ اللەرگياسى بار ما، جيىركەنە مە، وندا شارۋاسى جوق. ءوز قاجەتتىلىگىن قاناعاتتاندىرسا بولدى. اسكەري ادامداردىڭ قاعيداسى بويىنشا تەمەكى شەككىسى كەلسە، ەشكىمگە اسەر ەتپەيتىن جەردە عانا رۇقسات. نەگە سولاردان ۇلگى الماسقا؟ ەڭ جاقسىسى، ءوزىڭىزدى جەڭىپ، سول نارسەدەن الشاقتاڭىز.

قوقىس قالدىعىن جۇرگەن جەرىنە تاستاپ كەتە بەرەتىندەر قوعامعا قانشا زيان كەلتىرىپ جاتقانى ويىنا كىرىپ شىقپايدى. ولاردىڭ بار ويى - باسقالار دا تاستاپ ءجۇر. تامشىداي يگى ىستەن كولدەي جاقسىلىق قۇرالادى. جەر- اناعا جاناشىرلىق تانىتىپ، ءارقايسىسىمىز وزىمىزگە جاۋاپ بەرىپ، قالدىقتاردى ارنايى ورىندارعا، قوقىس جاشىكتەرىنە نە ۋاقىتشا سومكەمىزگە سالا تۇرساق، قوقىس قالاسىندا ءومىر سۇرمەس ەدىك. اينالامىز دا تاپ- تازا، سىرتتان كەلگەن سىنشى قوناقتارعا دا، وزىىمزگە دە جاعىمدى جاي سىيلار ەدىك.

ابىرويلى بولعىڭىز كەلە مە؟ سىزگە مۇقتاج جاندارعا قول ۇشىن سوزىڭىز. ۇلكەندەرگە جول بەرىڭىز، اۋىر جۇگىن كوتەرىسىڭىز. ال كىشىلەرگە الىمجەتتىك كورسەتىپ، جوق ابىرويدى جەردەن قازىپ، كۇشتەپ سىيلاتقىڭىز كەلەتىن بولسا، ەشكىمگە دە قادىرىڭىز بولمايدى.

كوشەدە، اۋلالاردا كوپشىلىك جينالىپ وتىراتىن ارنايى ورىندار بار. الايدا بۇل قاتتى داۋىستاپ كۇلىپ، داۋرىعا سويلەپ، ساياسي ماسەلەلەردى تالقىلاۋعا ارنالعان جەر ەمەس. مۇمكىن، بىرەۋدىڭ بالاسى ۇيىقتاپ جاتقان بولار، قارت اناسى اۋىرىپ جاتقان شىعار... ولار مۇنداي ارەكەتكە اشۋلى كەيىپپەن مىندەتتى تۇردە داۋىس كوتەرەدى. سوڭى جانجالعا ۇلاسپاسىن دەسەڭىز، ءوزىڭىزدى ارەكەتىڭىزگە جاۋاپ بەرە الاتىنداي ۇستاڭىز. ەشكىمگە پايداڭىز تيمەسە دە، زيان كەلتىرمەۋدى ويلاڭىز. جانىڭىزداعى ادامدارعا ەلىگىپ، ەسىڭىز شىعىپ كەتپەي، قوعامدىق ورىندا وتىرعانىڭىزدى ەستە ۇستاڭىز.

massaget.kz