قىتايداعى جارىلىستار: پوليتسيا كۇدىكتىنى اتادى
جاڭا حابارلارعا قاراعاندا، جارىلىس سالدارىنان جەتى ادام مەرت بولدى، 50 دەن استام ادام جاراقاتتاندى، ەكەۋى ءىز- تۇزسىز كەتتى.
ق ح ر قوعامدىق قاۋىپسىزدىك مينيسترلىگىنىڭ حابارلاۋىنشا، جارىلىستار تۋرالى ءىس قىلمىس رەتىندە قارالۋدا، كۇدىكتى لاڭكەستىككە ايىپتالىپ وتىرعان جوق.
جارىلىس تۋرالى ءىس بويىنشا داپۋ اۋىلىنىڭ تۇرعىنى، تەگى ۆەي دەگەن 33 جاستاعى ەر ادام ۇستالدى. باسقا ەشتەڭە ايتىلماعان. قىلمىستىڭ سەبەپتەرى دە ايتىلعان جوق.
«قوعامدىق قاۋىپسىزدىك ورگاندارى بار كۇش-جىگەرىن جۇمساپ، ءىستى تەرگەۋدە»، - دەلىنگەن مينيسترلىكتىڭ مالىمدەمەسىندە.
ۇكىمەتتىك شينحۋا اگەنتتىگىنىڭ حابارلاۋىنشا، كۇندىزگى ساعات ءۇش پەن بەستىڭ اراسىندا ليۋجوۋ شاعىن قالاسى مەن ونىڭ اينالاسىندا 15 جارىلىس بولدى. جەرگىلىكتى اۋرۋحانا، قالالىق بازارلار، ساۋدا ورتالىعى، اۆتوبۋس ستانساسى جانە بىرنەشە ۇكىمەتتىك عيماراتتار، سونىڭ ىشىندە تۇرمە مەن شەنەۋنىكتەر جاتاقحاناسى زاقىمدالعان.
پوليتسيانىڭ الدىن الا بولجامدارى بويىنشا، بومبا مەكەن-جايلارعا سالەمدەمە رەتىندە جىبەرىلىپ، «شۇعىل جەتكىزۋ» دەپ تاپسىرىس بەرىلگەن.
سارسەنبى كۇنى الەۋمەتتىك جەلىلەردە وقيعا ورنىنان كوپتەگەن فوتوسۋرەتتەر جاريالاندى. سۋرەتتەردە تۇتىندەپ جاتقان ۇيىندىلەر جانە قيراعان كوشەلەر كورىنەدى.
