حان ورداسىندا تۇڭعىش باسپاحانا ۇيىنە ەسكەرتكىش تاقتا ورناتىلدى - فوتو
ونىڭ اشىلۋ راسىمىندە اۋدان اكىمى نۇرلان راحىمجانوۆتىڭ اتاپ وتكەنىندەي، حان ورداسى - ەلىمىزدەگى تاريحي مەكەندەردىڭ ءبىرى. 1826 - جىلى ىرگەسىن جاڭگىر حان قالاعان وردادا تۇڭعىش مەكتەپ، قازىناشىلىق ءۇيى، قارۋ- جاراق پالاتاسى، اۋرۋحانا جانە باسقا عيماراتتار اشىلىپ، ەل يگىلىگىنە اينالدى. سونىڭ ءبىرى - باسپاحانا. وردادا 1911 - جىلى ۇلت زيالىلارىنىڭ قولداۋىمەن «قازاقستان» گازەتى شىقسا، 1917 -جىلى الاش قايراتكەرلەرىنىڭ ۇنىنە اينالعان «ۇران» باسىلىمى جارىق كوردى.
«جايىق پرەسس» ج ش س باس ديرەكتورى جانتاس سافۋللين كەڭەستىك ساياساتقا سايكەس حان ورداسىنداعى باسپاحانا 1918 - جىلى اشىلدى دەپ كوپكە دەيىن بۇرمالانىپ كەلگەندىگىن جەتكىزدى. ءارى ول قازاقستانداعى تۇڭعىش كەڭەستىك باسپاحانا دەپ اتالدى. ءتىپتى سونى ايعاقتايتىن تاقتايشا ءالى تۇر. شىن مانىسىندە ول كەڭەس وكىمەتى ورناماستان بۇرىن دا جۇمىس جاساپ تۇرعان. وعان دالەل - اتى التى الاشقا ءمالىم اعارتۋشى، سەگىز ءتىل بىلگەن عۇلاما عابدولعازيز مۇساعاليەۆتىڭ رەداكتورلىق ەتۋىمەن 1917-1918 - جىلدارى «ۇران» گازەتىنىڭ شىعۋى. مۇنىڭ كەڭەس داۋىرىندە اتالماۋىنىڭ سىرى ونىڭ «الاش» قوزعالىسىنىڭ ءۇنى بولعاندىعىندا. اتالعان باسىلىمنىڭ تولىق ەمەس ساندارى تەك سوڭعى كەزدە عانا تابىلىپ، سونىڭ ناتيجەسىندە جەكە كىتاپ بولىپ شىعارىلدى. ەندى بۇگىن تاريحي عيماراتتا ەسكەرتكىش تاقتانىڭ ورناتىلۋى قازاق حاندىعىنىڭ 550 جىلدىعىنا قوسىلعان ۇلەس بولىپ تابىلادى.
حان ورداسى اۋىلدىق ارداگەرلەر كەڭەسىنىڭ ءتوراعاسى سيسەن بايزونوۆ ولكەنىڭ تاريحىن ۇمىتپاي، جارقىن ىستەردى جاس ۇرپاقتىڭ جادىندا قالدىرۋ ءۇشىن وسىنداي ورەلى شارالاردىڭ قاجەت ەكەندىگىنە توقتالدى.
