استانا ماڭىنداعى كونە بوزوق قالاسى ۇشار بيىكتەن ءتۇسىرىلدى - كەسكىن

استانا. قازاقپارات - ەلوردا تۇرعىنى، بلوگەر ۆيتالي پەروۆ مىڭجىلدىق تاريحى بار بوزوق قالاسىن ۇشار بيىكتەن ۆيدەوعا ءتۇسىردى.

كونە بوزوق قالاسى استانادان نەبارى 5 شاقىرىم قاشىقتىقتا، استراحان تاس جولى بويىندا ورنالاسقان. ونىڭ اۋماعى 30 گەكتار جەردى الىپ جاتىر.

قازبا جۇمىستارى 1999 -جىلى باستالعان. وسى جۇمىستار ناتيجەسىندە بوزوق قالاسى 8-10 -عاسىرلاردا ۇلى جىبەك جولىنىڭ تارماعى - دالا جولى بويىندا قالا- قورعان بولعانى انىقتالدى. ول سونداي- اق قىپشاق بيلەۋشىسىنىڭ ورداسى، ءدىني- مادەني ورتالىق بولعان.

زەرتتەۋشىلەر بوزوق قالاسىنىڭ ىرگەسىندە بۇگىنگى استانا بوي كوتەرگەن دەپ سانايدى. قوس شاھاردىڭ وزىندىك تاريحي ۇندەستىگى بارى ايدان انىق. بۇل جاڭالىق تاريحي تۇسىنىكتى تۇبەگەيلى وزگەرتىپ جىبەردى. سەبەبى بۇرىن بۇل جەر تەك مال جايۋعا ارنالعان دالا سانالىپ كەلگەن ەدى.