شەلەك وزەنىندە رافتينگ بويىنشا جارىس باستالادى

الماتى. قازاقپارات - الماتى وبلىسىنىڭ ەڭبەكشى قازاق اۋدانى ارقىلى اعاتىن شەلەك وزەنىندە رافتينگ بويىنشا «CHILIK RaLLy 2015» جارىسى بولادى.

بۇل تۋرالى قازاقستاننىڭ رافتينگ فەدەراتسياسىنىڭ باسپا ءسوز قىزمەتىنەن حابارلادى.

رافتينگ بويىنشا «CHILIK RaLLy 2015» فەدەراتسيا كۋبوگى - قازاقستاننىڭ رافتينگ فەدەراتسياسى ۇيىمداستىراتىن جازعى جارىستارىنىڭ سوڭعى كەزەڭى.

جارىستا ەلىمىزدىڭ تۋريستىك جانە سپورتتىق كلۋبتارىنىڭ اۋەسقوي جانە كاسىپقوي كوماندالارى ۇزاق قاشىقتىققا جارىسۋ، جاقىن قاشىقتىققا قاتار جارىسۋ جانە سلالوم بويىنشا ءوزارا باق سىناسادى.

«شەلەك وزەنىندە وتەتىن كۇزگى جارىستارعا قاتىسۋشىلار دا، كورەرمەندەر دە كوپتەپ كەلەدى. ويتكەنى، مۇندا ەڭ قىزىقتى تراسسادا رافتينگتىڭ بارلىق ءتۇرى بويىنشا جارىسۋعا بولادى. ونىڭ ۇستىنە «CHILIK RaLLy» كۋبوگىن تابيعات اياسىنداعى جارىستاردىڭ، پالاتكادا تۇنەپ، تازا اۋادا دەمالۋدىڭ وزىندىك ءبىر سوڭعى ماۋسىمى دەۋگە بولادى»، - دەدى قازاقستان رافتينگ فەدەراتسياسىنىڭ پرەزيدەنتى ماكسيم زيمين.

ايتا كەتەلىك، جارىس وتكىزۋ لاگەرىنە كەلۋ جانە تىركەلۋ 3 -قىركۇيەك كۇنى باستالادى. ال جۇما كۇنى «R6A» ساناتىنداعى كوماندالاردىڭ جارىسى وتەدى.

سەنبى كۇنى تاڭەرتەڭ ساعات 10:00 دە اۋەسقوي كوماندالار تىركەلەدى. كوپ ۇزاماي ساعات 11:00-دە «اۋەسقويلار» ساناتى بويىنشا ەرلەر مەن ايەلدەر اراسىندا جارىس باستالادى.

جەكسەنبى كۇنى بۋىرقانعان تاۋ وزەنىندە سلالوم بويىنشا جارىس وتەدى.

اۆتور: جاپپاربەرگەن ايبوتا