شي جينپيڭ ءتورت تارماقتان تۇراتىن بەيبىت دامۋ جوسپارىن ۇسىندى
«بارلىق ەلدەر وزدەرىنىڭ دامۋ الەۋەتىن نىعايتۋى، قورشاعان ورتانى قورعاۋدى جاقسارتۋى، سونىمەن بىرگە دامىعان جانە دامۋشى ەلدەر اراسىنداعى ارىپتەستىكتى وڭتايلاندىرۋى، ال جالپى دامۋدى ۇيلەستىرۋ تەتىگى نىعايتىلۋى ءتيىس»، - دەپ مالىمدەدى ق ح ر ءتوراعاسى.
ول بارلىق ەلدەردى سامميتتە بەكىتىلگەن مىندەتتەردى ورىنداۋعا شاقىردى.
دامۋى تومەن ەلدەرگە 12 ميلليارد دوللار كومەك
2030 - جىلعا قاراي قىتايدىڭ ناشار دامىعان ەلدەرگە كومەگىنىڭ جالپى كولەمى 12 ميلليارد دوللاردى قۇرايدى. بۇل تۋرالى ق ح ر ءتوراعاسى شي جينپيڭ ب ۇ ۇ- نىڭ ورنىقتى دامۋ سامميتىندە سويلەگەن سوزىندە مالىمدەدى.
«قىتاي 2015 - جىلعا بەلگىلەنگەن دامۋ ماقساتتارىنا قول جەتكىزۋ ءۇشىن دامۋشى ەلدەرگە كومەككە وڭتۇستىك- وڭتۇستىك جەلىسى بويىنشا ىنتىماقتاستىقتى قولداۋ ءۇشىن 2 ميلليارد دوللار ۇسىنادى. قىتاي ناشار دامىپ وتىرعان ەلدەرگە ينۆەستيتسيالاردى ۇلعايتا وتىرىپ، 2030 - جىلعا قاراي قولداۋ كولەمىن 12 ميلليارد دوللارعا دەيىن جەتكىزۋگە نيەتتى»، - دەپ ءمالىم ەتتى ول.
«قىتاي ناشار دامىعان جانە شاعىن مەملەكەتتەر ءۇشىن 2015 - جىلدىڭ سوڭىنا بەلگىلەنگەن نەسيەلەردى وتەۋ مەرزىمىن ۇزارتادى»، - دەدى.
ءوز سوزىندە شي جينپيڭ يننوۆاتسيالاردىڭ ماڭىزىن اتاپ ءوتتى. «بارلىق ەلدەر يننوۆاتسيالارعا ۇمتىلۋى، دامۋ ءۇشىن ەسىكتەرىن ايقارا اشۋى ءتيىس»، - دەدى ول.
قىتاي تازا ەنەرگيا كوزدەرىنىڭ جاھاندىق جەلىسىن قۇرۋدى ۇسىنادى
شي جينپيڭ ەلدەردىڭ تازا ەنەرگيا كوزدەرىنە قاجەتتىلىگىن قاناعاتتاندىرۋعا مۇمكىندىك بەرەتىن جاھاندىق ەنەرگەتيكا جەلىسىن قۇرۋدى ۇسىندى.
«قىتاي ەلدەر اراسىندا ولاردىڭ ۇلتتىق جاعدايلارىنا سايكەس كەلەتىن دامۋ تاجىريبەسىمەن الماسۋ جانە زەرتتەۋلەردى جەڭىلدەتۋ ماقساتىندا ءبىلىمدى دامىتۋ حالىقارالىق ورتالىعىن قۇرادى. قىتاي سونداي- اق ەلدەردىڭ تازا بالامالى ەنەرگيا كوزدەرىنە سۇرانىسىن قاناعاتتاندىرۋ جونىندەگى مىندەتتى جەڭىلدەتۋ ءۇشىن جاھاندىق ەنەرگەتيكالىق جەلى قۇرۋدى ۇسىنادى»، - دەپ قوستى ق ح ر ءتوراعاسى.
ول سونداي- اق دامۋشى ەلدەردىڭ تۇراقتى ءوسىمىن قامتاماسىز ەتۋ ماقساتىندا ازيالىق ينفراقۇرىلىمدىق ينۆەستيتسيالار بانكى مەن بريكس دامۋ جاڭا بانكى اۋقىمىندا باسقا ەلدەرمەن ىنتىماقتاستىقتى دامىتۋعا ءازىر ەكەنىن ءبىلدىردى.
