ن. نازاربايەۆ قۇربان ايت نامازىنا قاتىستى
«بارشا قازاقستاندىقتاردى، كورشى ەلدەردە تۇراتىن جانە الەمدەگى ءيسى مۇسىلمان جۇرتىن قۇربان بايرام مەرەكەسىمەن قۇتتىقتايمىن!» - دەدى ەلباسى.
مەملەكەت باسشىسى بۇل مەرەكەنىڭ حالىقتاردىڭ بىرلىگى مەن تاتۋلىعىندا ۇلكەن ءمانى بار ەكەنىن ەرەكشە اتاپ ءوتتى.
«بۇل كۇنى بارشا مۇسىلمان تۋىستارىمەن، كورشىلەرىمەن جۇزدەسىپ، بۇنىڭ الدىنداعى رەنىشتەرىن كەشىرەدى، اللادان بەرەكە، حالىقتىڭ ىنتىماعى مەن باقۋاتتى بولۋىن تىلەيدى»، - دەپ اتاپ ءوتتى ن. نازاربايەۆ.
«الەمدەگى بارلىق قاقتىعىس، ءبىرىنشى كەزەكتە، تەرريتوريادان، شەكارانىڭ انىق بولماعاندىعىنان شىعادى. ءبىز بۇل ماسەلەنى شەشتىك، ءبىزدىڭ شەكارامىز بارلىق جاعىنان دا دوستىق پەن تىنىشتىقپەن قورعالعان. ەكىنشىدەن قاقتىعىستار ۇلتارالىق قاقتىعىستاردان شىعادى. ءوز ۇلتىڭدى وزگەلەردەن بيىك قويۋ - ەڭ ۇلكەن كۇنا. جەر بەتىندەگى بارلىق ادامدار بىردەي، اللا ولاردى تەڭ ەتىپ جاراتتى. وزگەلەرگە قۇرمەت كورسەتۋ ارقىلى ءبىز ەلىمىزدە تىنىشتىقتى ساقتايمىز»، - دەدى مەملەكەت باسشىسى.
قاقتىعىستاردىڭ ءۇشىنشى سەبەبى، ونىڭ ايتۋىنشا - ءدىنارالىق قاقتىعىستار، مۇنى قازىرگى ۋاقىتتا بۇكىل الەمنەن بايقاۋعا بولادى. «ءبىز - قازاقستاندىقتار ءوز دىنىمىزگە - مۇسىلمان دىنىنە قۇرمەتپەن، سۇيىسپەنشىلىكپەن قارايمىز، ءبىراق ءبىز وزگە دە دىندەر مەن سەنىمدەردى قۇرمەتتەيمىز. وسى نەگىزدە ءبىز بىرلىكتى، تاتۋلىقتى، دوستىقتى ساقتايمىز. بۇگىنگى مەيرامنىڭ ايتپاعى وسى. جالپى بارلىق قازاقستاندىق اللادان بەرەكە- بىرلىكتى، باقىتتى ءومىر مەن تىنىشتىقتى سۇرايدى. وسى ۇلى مەيرام باقىت پەن تىنىشتىقتى اكەلسىن. مەرەكەلەرىڭىز قۇتتى بولسىن، قۇرمەتتى وتانداستار»، - دەپ قورىتىندىلادى پرەزيدەنت ءوز ءسوزىن.
اۆتور: جاسۇلان جولدىبايەۆ
