جاھاننىڭ جاندى جەرى - تاياۋ شىعىس تارابى

 ول ءبىراز ۋاقىتتان بەرى لاڭكەستىكتىڭ سان ءتۇرلى زۇلىم ارەكەتتەرىنەن باستاپ، ۇلىسارالىق ۇيپا- تۇيپا ۇرىستاردىڭ دا ناعىز بىقسىعان وشاعىنا اينالدى. وسى ارقىلى ەۋروپا ەلدەرىنىڭ «ساۋ باستارىنا ساقينا» سالىپ بەرىپ، ءتۇپسىز تىعىرىققا تىرەگەن بوسقىنداردىڭ تولاسسىز كوشى- قون ماسەلەسى دە تۋىنداپ وتىر. بۇگىندە بۇل پروبلەمالاردىڭ ءبىر- بىرلەرىمەن العاۋسىز استاسىپ، شىرماۋىقتاي شاتاسىپ جاتقانى دا ەشكىمنىڭ كۇمانىن تۋدىرا المايدى. اپتا ءالى دە وسى وقيعالاردىڭ اينالاسىنان شىعا الماي تۇر. «سۇراپ العان اۋرۋدىڭ ەمى جوق» دەگەندەي، ءاۋ باسىندا ادامداردىڭ ءوز قولدارىمەن جاسالعان، سونىڭ ىشىندە «قويدان دا قوڭىر» بولىپ، بەيبىت تىنىش جاتقان ەڭسەلى ەلدەرگە سىرتقى كۇشتەردىڭ ارالاسۋى سالدارىنان ءورىس الىپ كەتكەن بۇل الاساپىراننىڭ اياقتالار شاماسى اڭعارىلار ەمەس. الايدا، وسىعان قاراي قادام باسۋدىڭ العاش جاسالىپ جاتقان يشاراسى دا بوي كورسەتىپ قالعان سياقتى. ودان قانداي ناتيجە شىعاتىنىن ءوز مەرزىمى كورسەتەدى.

 ا ق ش رەسەيگە بەتىن بۇرا باستادى

ۆاشينگتون قازىر رەسەي مەن يراندى پرەزيدەنت باشار اسادپەن ديالوگ جۇرگىزۋگە دانەكەر بولۋعا شاقىرا وتىرىپ، سيرياداعى جانجالدى ساياسي تۇرعىدا شەشۋدىڭ كەلىسسوز ۇدەرىسىن باستاۋعا بارىنشا ىنتالى بولىپ وتىر.

وسى ءوتىنىشتىڭ سىڭايىندا ا ق ش ەندى سيريا ليدەرىنىڭ تەز ارادا قىزمەتتەن كەتۋى تۋرالى ماسەلە كوتەرىلە قويمايتىنىن ءبىلدىردى. مۇنى جەتكىزگەن مەملەكەتتىك دەپارتامەنت باسشىسى دجون كەرري تاراپتاردىڭ سيريا جونىندەگى پوزيتسيالارى ءبىر- بىرلەرىنە جاقىنداي تۇسكەنىن اتاپ ءوتتى. الايدا، بۇل تۇرعىدا رەسەيمەن ىنتىماقتاس بولۋدى امەريكا ەليتاسىنىڭ وكىلدەرى تۇگەلدەي قولداپ وتىرعان جوق. ا ق ش مەملەكەتتىك حاتشىسى دجون كەرري سەنبى كۇنى رەسەي مەن يرانعا ءوز بەدەلدەرىن پايدالانىپ، سيريا پرەزيدەنتىن ەلدەگى جانجالدى رەتتەۋ ءۇشىن ساياسي كەلىسسوز ۇستەلىنە وتىرۋعا كوندىرۋ جونىندە ءوتىنىش جاسادى. «ءبىز كەلىسسوزگە كىرىسۋىمىز كەرەك. مۇندا بىزگە رەسەي مەن يران سەكىلدى ىقپالى جۇرەتىن مەملەكەتتەر كومەكتەسەدى دەپ ۇمىتتەنەمىز» ، -  دەدى دجون كەرري  ۇلىبريتانيا سىرتقى ىستەر ءمينيسترى فيليپ حامموندپەن كەزدەسۋى كەزىندە. داماسكىنىڭ ايماقتاعى نەگىزگى وداقتاستارى بولىپ تابىلاتىن رەسەي مەن يرانعا اسادتى ساياسي كەلىسسوزگە كوندىرىپ بەرۋ جونىندە ۇسىنىس ايتۋ -  ا ق ش تاراپىنان بۇل تاراپتا بولىپ وتىرعان ءبىرىنشى باستاما.

مەملەكەتتىك حاتشى ءوزىنىڭ مالىمدەمەسىن كەلەسى كۇنى ا ق ش قورعانىس ءمينيسترى ەشتون كارتەر مەن رەسەي قورعانىس ءمينيسترى سەرگەي شويگۋدىڭ تەلەفون ارقىلى سيرياداعى جاعدايدى تالقىلاعاندارىنان كەيىن جاسادى. پەنتاگوننىڭ حابارلاماسىنا قاراعاندا، ا ق ش اسكەري ۆەدومستۆوسىنىڭ باسشىسى ءوز اڭگىمەسىندە «سيرياداعى ساياسي ترانزيتتىڭ نەگىزى بولىپ تابىلاتىن ديپلوماتيالىق كەلىسسوزدەرمەن قاتارلاسا جۇرگىزىلەتىن مۇنداي كەڭەستەردىڭ قاجەتتىلىگى مەن ماڭىزدىلىعىنا» باسا نازار اۋدارعان ەكەن. نەمىستىڭ Bild am Sonntag باسىلىمى جەكسەنبى كۇنى ءوزىنىڭ مانبەلەرىنە سىلتەمە جاساي وتىرىپ، ا ق ش پەن رەسەي بارلاۋ ۇيىمدارى وكىلدەرىنىڭ سيريا جونىندە اقپارلار الماسۋ ءۇشىن ماسكەۋدە كەزدەسكەنىن حابارلادى. ا ق ش «يسلام مەملەكەتىنە» قاتىستى بارلاۋ مالىمەتتەرىن ماسكەۋمەن بولىسۋگە مۇددەلى بولىپ وتىر، دەپ جازادى باسىلىم وسى رەتتە. رەسەي مەن ا ق ش- تىڭ سيرياعا قاتىستى كەلىسسوزدەرى ۆلاديمير پۋتين مەن باراك وبامانىڭ قىركۇيەك ايىنىڭ سوڭىندا نيۋ- يوركتە وتەتىن ب ۇ ۇ باس اسسامبلەياسى الاڭىندا جالعاسىن تابۋى مۇمكىن. ازىرگە بۇل كەزدەسۋ جونىندە الدىن الا كەلىسىم بولماعان. الايدا، ساراپشىلار «قىسقا ۋاقىتقا سوزىلسا دا، ونداي ۇشىراسۋدىڭ» بولۋىن جوققا شىعارىپ وتىرعان جوق.

«ەگەمەن قازاقستان»