قازاقستاندىق وندىرۋشىلەردى قىتايدا وتكىزىلەتىن اۋىلشارۋاشىلىق كورمەلەرگە قاتىسۋعا شاقىردى - فوتو

بەيجىڭ- يانچىڭ. قازاقپارات - قازاقستاندىق وندىرۋشىلەرگە نانجيڭ قالاسىنداعى اۋىلشارۋاشىلىق تاۋارلارىنىڭ كورمە زالىندا جىل بويى قولدانىلاتىن جەكە ورىندار اقىسىز ۇسىنىلادى.

بۇل تۋرالى قازاقستان رەسپۋبليكاسىنىڭ شاڭحاي قالاسىنداعى باس كونسۋلى جوشىحان قىراۋبايەۆتىڭ جياڭسۋ پروۆينسياسىنىڭ باسشىلىعى جانە ءىرى ەكسپورتتىق- يمپورتتىق اۋىلشارۋاشىلىق كومپانيالاردىڭ باسشىلارىمەن وتكىزگەن كەلىسوزدەرىنىڭ قورىتىندىلارى بويىنشا بەلگىلى بولدى.

كەزدەسۋ بارىسىندا تاراپتار قازاقستان مەن جياڭسۋ پروۆينسياسىنىڭ ونەركاسىپ جانە اۋىلشارۋاشىلىق سالالارىنداعى ساۋدا- ەكونوميكالىق جانە ينۆەستيتسيالىق ىنتىماقتاستىعىنىڭ ناقتى باعىتتارىن تالقىلاپ ءوتتى.

ج. قىراۋبايەۆ ق ر پرەزيدەنتى نۇرسۇلتان نازاربايەۆتىڭ تاياۋداعى ساپارىنىڭ بارىسىندا جياڭسۋ پروۆينسياسى حالىق وكىلدەرىنىڭ بۇكىلقىتايلىق جينالىسى تۇراقتى كوميتەتىنىڭ ءتوراعاسى - پارتيا كوميتەتىنىڭ حاتشىسى لوۋ جيتسزيۋنمەن قازاقستان مەن جياڭسۋ پروۆينسياسىنىڭ اراسىنداعى ىنتىماقتاستىقتى دامىتۋ بولاشاعىن تالقىلاعانىن اتاپ ءوتتى.

قازاقستاندىق ديپلومات قازاقستانداعى ينۆەستيتسيالىق كليمات، «نۇرلى جول» باعدارلاماسىنىڭ قىتايلىق «جىبەك جولىنىڭ ەكونوميكالىق بەلدەۋى» باستاماسىمەن ءتۇيىسۋى، سونداي-اق ق ر- نىڭ اۋىل شارۋاشىلىعىن دامىتۋ جانە ونىڭ تابيعي ونىمدەر شىعارۋ ىسىندەگى باسىمدىقتارى تۋرالى بايانداپ بەردى.

يان گەنپين ج. قىراۋبايەۆتى جياڭسۋ پروۆينسياسى باسشىلىعىنىڭ ن. نازاربايەۆپەن كەزدەسۋ كەزىندە قول جەتكىزىلگەن كەلىسۋشىلىكتەرگە ۇلكەن ءمان بەرىپ وتىرعانىن ايتتى. قىتايلىق شەنەۋنىك ق ر پرەزيدەنتىنىڭ ەكىجاقتى قاتىناستاردى دامىتۋ جانە ەۋرازيالىق قۇرلىقتا تۇراقتىلىقتى ساقتاۋ ىسىندە سىڭىرگەن ەڭبەگىن ەرەكشە اتاپ ءوتتى.

تاراپتار ينۆەستيتسيالاۋ ماسەلەسىن مۇقيات تۇردە زەرتتەپ، سالالىق باعىتتار دەلەگاتسيالارىمەن الماسۋدى كەلىستى. يان گەنپين قازاقستاندىق اۋىلشارۋاشىلىق وندىرۋشىلەردى قىتايدا وتكىزىلەتىن اۋىلشارۋاشىلىق كورمەلەرگە بەلسەندى قاتىسۋعا شاقىردى.

بۇل رەتتە ول قازاقستاندىق وندىرۋشىلەر ءۇشىن جياڭسۋ پروۆينتسياسىنىڭ نانجيڭ قالاسىنداعى اۋىلشارۋاشىلىق تاۋارلارىنىڭ كورمە زالىندا جىل بويى قولدانىلاتىن جەكە ستەندتى اقىسىز ۇسىنۋعا دايىن ەكەنىن مالىمدەدى.

ەسكە سالا كەتەيىك، نانجيڭ (نانجيڭ - «وڭتۇستىك استانا») - جياڭسۋ پروۆينسياسىنىڭ اكىمشىلىك ورتالىعى جانە يانتسزى (چاڭجياڭ - رەد.) وزەنىنىڭ تومەن اڭعارىنداعى كەمەجاي، قىتايدىڭ بۇرىنعى استاناسى. ول ەلدىڭ شىعىسىندا، شاڭحاي قالاسىنان سولتۇستىك- باتىسقا قاراي 260 شاقىرىم جەردە ورنالاسقان. ءىرى ونەركاسىپ جانە مادەنيەت ورتالىعى. حالىق سانى 8 ميلليون ادامنان اسادى.