قازاقستان اۋماعى ارقىلى قىتاي- ەۋروپا- قىتاي تاسىمالداۋ قىزمەتى ءۇش ەسەگە ارتادى
فورۋمعا قىتاي، جاپونيا، وڭتۇستىك كورەيا، قازاقستان، تايۋان، ەۋروپالىق ەلدەردىڭ 200 دەن استام لوگيستيكالىق جانە تەڭىز كەمە كومپانيالارى جينالدى.
كورمەدە «ق ت ج» ۇ ك» ا ق باسشىسى قازاقستاننىڭ ترانزيتتىك الەۋەتى تۋرالى بايانداما جاسادى. بايانداما بارىسىندا قازاقستاننىڭ «نۇرلى جول» جاڭا ەكونوميكالىق ساياساتى اياسىنداعى قىتاي حالىق رەسپۋبليكاسىمەن سينەرگيالىق «ءبىر بەلدەۋ - ءبىر جول» باعدارلاماسىن ۇيلەستىرۋ جايى ايتىلدى. سونداي-اق، 2015 -جىلعى سەگىز ايدا قىتاي- ەۋروپا- قىتاي باعدارىنداعى كونتەينەرلىك پويىزداردىڭ 2014 -جىلمەن سالىستىرعاندا 105 كونتەينەرلىك پويىزدان 291 گە ارتقاندىعى اتالىپ ءوتىلدى.
«ليانيۋنگان قالاسىنداعى قازاقستان - قىتاي حالىقارالىق لوگيستيكالىق كومپانياسى» 14 ايدا 150 مىڭ كونتەينەردى وڭدەگەن. بۇل كورسەتكىشتى 2020 -جىلدارعا قاراي 500 مىڭ كونتەينەرگە جەتكىزۋ جوسپارلانىپ وتىر.
ساپار بارىسىندا جياڭسۋ پروۆينسياسىنىڭ گۋبەرناتورى ليۋ سيۋەيۋن مەن ليانيۋنگان قالاسىنىڭ مەرى جاۋ شياۋجياڭمەن ەكىجاقتى كەزدەسۋلەر وتكىزىلدى. كەزدەسۋلەر بارىسىندا 2015 -جىلعى تامىزدىڭ 31 ىندەگى قازاقستان رەسپۋبليكاسى پرەزيدەنتىنىڭ ق ح ر- عا ساپارى بارىسىندا قول قويىلعان «قورعاس- شىعىس قاقپاسى» ا ە ا دامىتۋعا ارنالعان ينۆەستيتسيالىق 600 ميلليون ا ق ش دوللارى كولەمىندەگى قارجىنى يگەرۋ جايى ساراپتالدى.
ونىڭ سىرتىندا «ليانيۋنگان قالاسىنداعى قازاقستان- قىتاي حالىقارالىق بىرلەسكەن لوگيستيكالىق كومپانياسىن» ودان ءارى دامىتۋ مەن ليانيۋنگان پورتى ماڭىنداعى شاڭحاي ىنتىماقتاستىعى ۇيىمىنا قاتىسۋشى مەملەكەتتەردىڭ لوگيستيكالىق پاركىنىڭ تەحنيكالىق- ەكونوميكالىق دايەكتەمەسىن جاساۋ جايى قاراستىرىلدى.
انىقتاما: جياڭسۋ پروۆينسياسى ىشكى جالپى ءونىمى جىلىنا 1,2 تريلليون دوللاردى قۇرايتىن 78 ميلليون تۇرعىنى بار دامىعان ءوڭىر. ليانيۋنگان پورتى قىتايدىڭ سەرپىندى دامىپ كەلە جاتقان جىلىنا 200 ميلليون توننا جۇك وڭدەيتىن پورتى سانالادى. ليانيۋنگان قالاسىندا 5 ميلليون حالىق تۇرادى.
