حالىقارالىق «قازاق ءتىلى» قوعامى جانىنان «مەملەكەتتىك ءتىلدى دامىتۋ القاسى» قۇرىلادى - ءومىرزاق ايتباي ۇلى
بۇل تۋرالى بۇگىن الماتىدا «دوستىق ۇيىندە» وتكەن «مەملەكەتتىك ءتىل - مەنىڭ ءتىلىم» اتتى سالتاناتتى ءىس- شارا بارىسىندا حالىقارالىق «قازاق ءتىلى» قوعامىنىڭ پرەزيدەنتى، اكادەميك ءومىرزاق ايتباي ۇلى ءمالىم ەتتى.
«بۇل القانىڭ قۇرامىنا قازاقستان حالقى اسسامبلەياسى اياسىندا جۇمىس ىستەيتىن ۇلتتىق- مادەني ورتالىقتاردىڭ جەتەكشىلەرىن، مەملەكەتتىك تىلگە قاتىستى ۇيىمداردىڭ باسشىلارى مەن وسى سالاداعى باسقا دا ەلەۋلى تۇلعالاردى ەنگىزسەك دەگەن نيەتىمىز بار. سونىمەن قاتار وعان ەلىمىزگە بەلگىلى قوعام قايراتكەرلەرى، عالىمدار، ءتىل جاناشىرلارى مەن ۇلتتىق- مادەني ورتالىقتاردىڭ جەتەكشىلەرى تارتىلادى. القا ەل ىشىندە مەملەكەتتىك ءتىلدىڭ ءورىسىن كەڭەيتۋ، ساپاسىن ارتتىرۋ ماسەلەلەرى بويىنشا تۇجىرىمدار، ۇسىنىستار، جوبالار ازىرلەپ، ولاردى ىسكە اسىرۋعا ءوز ۇلەسىن قوسادى»، - دەدى ءو. ايتباي ۇلى.
جيىن بارىسىندا قازاقتار شوعىرلانا قونىستانعان شەت ەلدەردە جانە باۋىرلاس تۇركى مەملەكەتتەرىنىڭ استانالارىندا «قازاق ءتىلىن ۇيرەتۋ ورتالىقتارى جەلىسىن قۇرۋ تۋرالى» مەموراندۋمنىڭ جوباسى قابىلداندى. وعان ءتىل جاناشىرلارى بولىپ جۇرگەن وتاندىق مەملەكەتتىك، مەملەكەتتىك ەمەس، قوعامدىق جانە جەكە مەنشىك مەكەمەلەر، جوعارى وقۋ ورىندارى، بۇقارالىق اقپارات قۇرالدارى، كىتاپحانا جانە باسقا دا ءتۇرلى مەنشىك ۇيىمدارىنىڭ باسشىلارى قول قويادى.
ءومىرزاق ايتباي ۇلىنىڭ ايتۋىنشا، بۇل ورتالىقتار شەت ەلدەردە ءومىر سۇرەتىن قانداستارىمىزدىڭ اراسىندا قازاق ءتىلىنىڭ قولدانىلار اياسىن كەڭەيتۋگە سەپتىگىن تيگىزەدى. «ازىرگە ءبىرىنشى ورتالىقتى وسى حالىقارالىق «قازاق ءتىلى» قوعامىنىڭ جانىنان قۇرىپ الامىز. كەيىن بىرتىندەپ باسقا مەملەكەتتەرگە شىعامىز. بۇل وڭاي شارۋا ەمەس. الدىمەن سىرتقى ىستەر مينيسترلىگىمەن، كەيىن سول شەت ەلدەردەگى قازاقستان ەلشىلىكتەرىمەن كەلىسەمىز. اتالعان ورتالىقتار شەت ەلدەردە ءومىر سۇرەتىن 5 ميلليون قازاقتىڭ انا تىلىنەن اجىراماۋىن جانە تاريحي وتانىمەن تۇراقتى بايلانىسىن قامتاماسىز ەتەدى»، - دەدى ءو. ايتباي ۇلى.
جوسپار بويىنشا الداعى ۋاقىتتا بارلىعى 50 ورتالىقتى اشۋ كوزدەلۋدە. ايتا كەتەلىك، بۇگىنگى سالتاناتتى ءىس- شارا بارىسىندا قازاقستاندا ءومىر سۇرەتىن وزگە ۇلتتاردىڭ ونەرپاز جاستارىنىڭ ورىنداۋىندا قازاقتىڭ ءبىرقاتار تانىمال اندەرى شىرقالدى.
جيىن ءوز جۇمىسىن اياقتادى.
اۆتور: جاپپاربەرگەن ايبوتا
