قىتايدان شىققان «جىبەك جولى» اۆتوشەرۋىنىڭ قاتىسۋشىلارى استاناعا جەتتى

استانا. قازاقپارات - بۇگىن «جىبەك جولى» اۆتوشەرۋىنىڭ قاتىسۋشىلارى استاناعا جەتتى. بۇل تۋرالى بۇگىن ەلوردادا وتكەن باسپا ءسوز ءماسليحاتىندا ءمالىم بولدى.

اتاپ ايتقاندا، 8- تامىزدا شاڭحايدان (ق ح ر) باستالعان بۇل اۆتوشەرۋ بەس ەل ارقىلى ءوتىپ، ساپارىن 24- قازاندا ميلاندا (يتاليا) اياقتايدى. بۇل شارانىڭ ماقساتى - جاڭا جىبەك جولى بويىندا مادەني، ەكونوميكالىق قارىم-قاتىناستاردى دامىتۋ.

«بيىلعى 9- تامىزدا ءبىزدىڭ مينيستر مەن «جىبەك جولى» اۆتوشەرۋى ۇيىمداستىرۋ كوميتەتىنىڭ اتقارۋشى ديرەكتورى فۋ جياڭ وسى اۆتوشەرۋدى قولداۋ تۋرالى مەموراندۋمعا قول قويدى. ءبىز قوناقجايلى ەل رەتىندە ءبىزدىڭ مەيمانداردى قارسى الۋعا قۋانىشتىمىز. وسى ورايدا بۇل اۋقىمدى اكسيا مادەنيەت پەن ءتۋريزمدى دامىتۋعا ەلەۋلى ۇلەس قوسادى دەپ سانايمىز»، - دەدى ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ.

ءوز كەزەگىندە اۆتوشەرۋدى ۇيىمداستىرۋ كوميتەتىنىڭ اتقارۋشى ديرەكتورى فۋ جياڭ وسى ساپار بارىسىندا 16 مىڭ شاقىرىم قاشىقتىقتى ەڭسەرۋ جوسپارلانىپ وتىرعاندىعىن، قازاقستاننان كەيىن رەسەيگە باعىت الاتىندىقتارىن جەتكىزدى. ونىڭ سوزىنە قاراعاندا، وسى حالىقارالىق اۆتوشەرۋدىڭ قۇرامىندا 8 كولىك قامتىلعان.

ايتا كەتەيىك، وسى شارا اياسىندا ەلورداداعى «اراي» ساياباعىندا قىتايدىڭ ۇزدىك سكريپكاشىلارىنىڭ ءبىرى شەن چجۋنگونىڭ قاتىسۋىمەن ارنايى كونسەرت ۇيىمداستىرىلماق، سونداي-اق Ramada Plaza قوناقۇيىندە «ينۆەستيتسيالار، يندۋستريالدى پاركتەر جانە استانا-ەكسپو-2017» تاقىرىبىندا دوڭگەلەك ۇستەل وتكىزىلمەك.

اۆتور: رۋسلان عابباسوۆ