كەشە قىتايدا اۋىر اتلەتيكادان ءىرى حالىقارالىق تۋرنير باستالدى

استانا. قازاقپارات - كەشە قىتايدىڭ فۋچجوۋ قالاسىندا اۋىر اتلەتيكادان ءىرى حالىقارالىق گران- پري تۋرنيرى باستالدى.

دودا بارىسىندا ريو وليمپياداسىنا ليتسەنزيالىق ۇپايلار تاراتىلاتىن بولادى.

ماڭىزدى دوداعا قازاقستاندىق زىلتەمىرشىلەر دە قاتىسۋدا. ءۇش كۇنگە سوزىلاتىن جارىستا ەلىمىزدىڭ نامىسىن 8 سپورتشى قورعايدى. ولاردىڭ قاتارىندا الەم چەمپيوناتىنىڭ قولا جۇلدەگەرى كيريلل پاۆلوۆ (77 كەلى)، جاقىندا عانا ازيا چەمپيوناتىندا توپ جارعان ايدار قازوۆ (77 كەلى)، قۇرلىقتىق جارىستاردا جەڭىس تۇعىرىنان كورىنىپ جۇرگەن ساۋلە ءسادۋاقاسوۆا (63 كەلى) مەن اسەم سادىقوۆا (69 كەلى) بار. سونداي-اق فارحاد حاركي مەن الەكساندر كيم 69 كەلىگە دەيىنگى سالماقتا جارىس جولىنا شىقسا، سەمەن ليندەر مەن نيدجات راگيموۆ 85 كەلىدە سىنعا تۇسەدى. ايتا كەتەيىك، نيدجات قازاقستان قۇراماسى ساپىندا العاش رەت ونەر كورسەتكەلى وتىر. دۇنيەجۇزىلىك جاسوپىرىمدەر وليمپياداسى مەن ەۋروپا بىرىنشىلىگىنىڭ جەڭىمپازى ۇلتتىق قۇراماعا ءازىربايجان ەلىنەن كەلگەن بولاتىن.

فۋچجوۋداعى گران-پري دوداسىندا ەرلەر اراسىندا بەس سالماق دارەجەسى (56، 62، 69، 77، 85 كەلى) بويىنشا، ايەلدەر اراسىندا دا بەس سالماقتا (48، 53، 58، 63، 69) جەڭىمپازدار انىقتالادى. ال جالپى جارىسقا 12 ەلدەن 63 سپورتشى قاتىسپاق.

گران-پري دوداسىنىڭ جۇلدە قورى 160000 ا ق ش دوللارىن قۇراپ وتىر. چەمپيون اتانعان سپورتشى - 8000، كۇمىس مەدال يەلەنگەن سپورتشىعا 5000 ا ق ش دوللارى تابىستالادى. قولا جۇلدەگەر 3000 دوللار يەلەنەدى. ودان وزگە رەكورد ورناتقان سپورتشىلارعا سىياقىلار دا قاراستىرىلعان.

جارىس كەستەسى:

21- قىركۇيەك

13:00-15:00 ايەلدەر 48، 53 كەلى

17:30-19:30 ەرلەر 56, 62 كەلى

22- قىركۇيەك

13:00-15:00 ەرلەر 69، 77 كەلى

17:30-19:30 ايەلدەر 58, 63 كەلى

23- قىركۇيەك

13:00-15:00 ايەلدەر 69 كەلى، ەرلەر 85 كەلى

16:30-18:30 جابىلۋ سالتاناتى

massaget.kz