قازاقستان وكىلى جىبەك جولى يدەيالارىن جۇزەگە اسىرۋ كوميتەتىن قۇرۋ تۋرالى ۇسىنىس جاسادى
«كوپ جۇمىس جاسالعان، الايدا الدىمىزدا اتقارىلاتىن مىندەت ءالى كوپ. بىرىكتىرەتىن ورتالىق ءالى جوق. مۇمكىن، ءبىزدىڭ ۇسىنىستارىمىز تاراتىلىپ، دامۋى ءۇشىن جىبەك جولى يدەيالارىن جۇزەگە اسىرۋ كوميتەتىن نەمەسە سول سىندى ۇيىم قۇرۋ قاجەت بولار»، - دەدى ول «بايلانىستىلىق: جاڭا تالاپتار مەن جاڭا كوزقاراس» پلەنارلىق سەسسياسىندا سويلەگەن سوزىندە.
ونىڭ ايتۋىنشا، جىبەك جولىنىڭ ەكونوميكالىق بەلدەۋىن جانداندىرۋ يدەياسىن العاش رەت ق ح ر ءتوراعاسى شي جينپيڭنىڭ ءدال استانادا ۇسىنعانى ايتۋلى وقيعا بولىپ تابىلادى. «بۇل يدەياعا بىزدە (ق ر- دا - رەد. ) ۇلكەن قۇرمەتپەن قاراپ جانە سوڭعى ەكى جىلدا ءبىزدىڭ باسپا سوزدە كەڭىنەن جاريالانىپ وتىر»، - دەپ اتاپ ءوتتى ول.
«ءبىر اي بۇرىن قازاقستانعا شانشي پروۆينتسياسىنىڭ دەلەگاتسياسى كەلگەن. ولار تاياۋ ۋاقىتتا قازاق حاندىعىنىڭ 550 جىلدىعى تويلاناتىن تاراز قالاسىندا توقتايدى. كەلەسى جىلى قازاقستاندا قوناق ءۇي پويىزىن ىسكە قوسۋ جوسپارلانىپ وتىر. «قورعاس- الماتى- تاراز- شىمكەنت- تۇركىستان- قىزىلوردا- بايقوڭىر» باعدارىمەن جۇرەتىن بۇل تۋريستىك پويىز بۇكىل قازاقستان ارقىلى ءجۇرىپ، مىندەتتى تۇردە استاناعا سوعادى»، - دەپ ەسكە سالدى س. مالدىبايەۆ.
ەسكە سالا كەتەيىك، «ءبىر بەلدەۋ، ءبىر جول» بويىنداعى ب ا ق ىنتىماقتاستىعى فورۋمىنىڭ ۇيىمداستىرۋشىسى رەتىندە قىتاي كومپارتياسىنىڭ «رىنمين رىباۋ» مەدياقۇرىلىمى شىققان. شاراعا 59 ەلدەن 155 مەدياقۇرىلىم، سونداي- اق ب ۇ ۇ تىلشىلەر قاۋىمداستىعى، ق ح ر كوممەرتسياسىنىڭ ۆيتسە-ءمينيسترى، حىنان (گو گەنماو)، شەنشي (جان جەنيۋن) ، گانسۋ (ۋاڭ سانيۋن)، لانجوۋ قالاسى (يۋي حايان)، شاندۇڭ پروۆينتسياسىنىڭ جينداۋ قالاسى (لي جيۋن)، لويان قالاسى (چەن سيۋەفەن) پارتيا كوميتەتتەرىنىڭ حاتشىلارى، قىتايدىڭ جياڭسۋ، گۋاڭدۇڭ پروۆينتسيالارى جانە تاعى باسقا ايماقتارىنىڭ اتقارۋشى ورگاندارىنىڭ، قىتايلىق بانكتەر، بىرلەستىكتەر مەن ب ا ق وكىلدەرى قاتىستى.
فورۋمنىڭ اشىلۋىندا قۇرمەتتى شەتەلدىك قوناقتاردىڭ اراسىندا العاشقىلاردىڭ ءبىرى بولىپ «قازاقپارات» حالىقارالىق اقپاراتتىق اگەنتتىگىنىڭ باس ديرەكتورى داۋرەن دياروۆ ءسوز سويلەدى.
