سەرىك احمەتوۆ سوتتا انتيكوررۋپتسيالىق ۆەدومستۆونىڭ تەرگەۋشىسىنە سۇراق جاۋدىردى
21 -قىركۇيەكتە قازاقستاننىڭ مەملەكەتتىك قىزمەت جانە سىبايلاس جەمقورلىققا قارسى ءىس- قيمىل اگەنتتىگىنىڭ جەدەل توبىنىڭ تەرگەۋشىسى الەكسەي شەۆچەنكودان جاۋاپ الىندى. وعان سۇراقتاردى ەكس- پرەمەردىڭ ءوزى قويدى. جوعارى لاۋازىمدى شەنەۋنىك تەرگەۋشىدەن كۋاگەر احمەت كۇلجانوۆقا سوتقا كەلۋى ءتيىس بولعان كۇنى نەلىكتەن تەلەفون سوققانىن سۇرادى. احمەتوۆتىڭ ايتۋىنشا، تەرگەۋشى كۋاگەرگە ءجيى تەلەفون سوققان جانە تەرگەۋشىنىڭ بۇل ىستە جەكە مۇددەسى بار بولۋى مۇمكىن.
«كۇلجانوۆتىڭ قورعاۋشىلاردىڭ كۋاگەرى ەكەنىن قايدان ءبىلدىڭىز؟ ول سوتقا كەلۋى ءتيىس بولعان كۇنى وعان نەلىكتەن تەلەفون سوقتىڭىز؟ ايىپتالۋشىلار تاراپىنداعى بارلىق كۋاگەردى جاقسى بىلەسىز. سوت وتىرىسى باستالعانعا دەيىن وعان نەلىكتەن تەلەفون سوقتىڭىز؟ مۇنداي بەلسەندىلىگىڭىز نەمەن بايلانىستى؟»، - دەپ سۇرادى احمەتوۆ.
بۇعان تەرگەۋشى ءوزىنىڭ قىزمەتتىك مىندەتىن اتقارعاندىعىن ايتىپ، جاۋاپ بەردى. «سىزگە ءتۇسىندىرىپ جاتىرمىن عوي، تەرگەۋشى احمەت كۇلجانوۆقا كەزدەسۋ جايلى كەلىسۋ ءۇشىن تەلەفون سوقتىم. سەبەبى بۇل كۋاگەردى سوتقا قايتا شاقىرۋ قاجەتتىلىگى تۋادى عوي، مەن وسىلايشا ونى بىردەن تاۋىپ الامىن. كۋاگەرلەردى شاقىرۋ تۋرالى تاپسىرما ماعان سوتتان بەرىلدى»، - دەپ جاۋاپ بەردى شيەۆچەنكو.
سەرىك احمەتوۆ سوتتىڭ نازارىن شەۆچەنكونىڭ ناقتى جاۋاپ بەرۋدەن جالتارىپ وتىرعانىنا اۋداردى. بۇرىنعى پرەمەر-ءمينيستردىڭ ايتۋىنشا، مەملەكەتتىك قىزمەت جانە سىبايلاس جەمقورلىققا قارسى ءىس- قيمىل اگەنتتىگىنىڭ قىزمەتكەرلەرى سوت پروتسەسسىن بەلسەندى تۇردە باقىلاۋعا العىسى كەلەدى. سونىمەن قاتار، احمەتوۆ سوتتىڭ نازارىن تەرگەۋشى مەن ونىڭ قىزمەتكەرلەرىنىڭ ايىپتالۋشى تاراپتىڭ كۋاگەرلەرىنىڭ سوت وتىرىسىنا قاتىسۋىن ءالى كۇنگە دەيىن قامتاماسىز ەتىپ كەلەتىنىن ايتتى. وسىلايشا، احمەتوۆ انتيكوررۋپتسيالىق ۆەدومستۆو وكىلدەرىنىڭ كۋاگەرلەردىڭ بەرەتىن جاۋابىنا اسەر ەتۋى مۇمكىن ەكەندىگىن ايتىپ، كۇدىكتەندى.
ەسكە سالايىق، قاراعاندى قالاسىندا ەكس- پرەمەر- مينيستر سەرىك احمەتوۆتىڭ جانە ءىستىڭ وزگە دە فيگۋرانتتارىنىڭ سوتى جالعاسىپ جاتىر. سوت ءىستىڭ 82- تومىن قاراپ جاتىر. ەسكە سالا كەتەيىك، قازاقستاننىڭ ەكس-پرەمەر-ءمينيسترى سەرىك احمەتوۆكە جەمقورلىق ماندەگى التى قىلمىس بويىنشا رەسمي تۇردە ايىپ تاعىلعان بولاتىن، ولاردىڭ قاتارىندا اسا ءىرى كولەمدە پارا الدى (تەرگەۋدىڭ تۇجىرىمىنشا، 2 ميلليون 400 مىڭ دوللار - اۆت.)، اسا ءىرى كولەمدە بيۋدجەت قارجىسىن جىمقىردى، لاۋازىمىن اسىرا پايدالاندى جانە كاسىپكەرلىك قىزمەتكە زاڭسىز ارالاستى دەگەن ايىپتار بار.
