ل. گانديلوۆ: ن. نازاربايەۆتى الەمدىك دەڭگەيدەگى تۇلعالار ت. رۋزۆەلت، ۋ. چەرچيلل جانە دىڭ شياۋپيڭمەن ءبىر دەڭگەيدە قويۋعا بولادى
«ءبىز بەلگىلى ءبىر جەتىستىكتەر (قازاقستان حالقى اسسامبلەياسى مەن تۇتاستاي قازاق حالقىنىڭ جەتىستىكتەرى- رەد.) تۋرالى ايتقاندا، ونىڭ ەكىنشى جاعىنا دا نازار اۋدارۋعا ءتيىسپىز، ياعني مۇندا قۇرمەتتى نۇرسۇلتان ءابىش ۇلى نازاربايەۆتىڭ ەڭبەگى ەرەن - ونىڭ ساياسي ەرىك-جىگەرى مەن دانالىعىنىڭ ارقاسىندا بەيبىتشىلىك پەن ءوزارا تۇسىنىستىككە نەگىزدەلگەن قۋاتتى مەملەكەت قۇرۋعا مۇمكىن بولدى. سوندىقتان دا، مەن بۇگىن شىن ىقىلاسىممەن نۇرسۇلتان ءابىش ۇلىن الەمدىك ليدەرلەر بولىپ تابىلاتىن رۋزۆەلت، چەرچيلل جانە دىڭ شياۋپيڭمەن قاتار اتار ەدىم»، - دەدى ازەربايجان ەلشىسى بەيجىڭدە «قازاقستان حالقى اسسامبلەياسىنىڭ جىلى: قوعامدىق كەلىسىم مەن ۇلتتىق بىرلىكتىڭ قازاقستاندىق ۇلگىسى» تاقىرىبىمەن وتكەن دوڭگەلەك ۇستەل جيىنىندا.
ەسكە سالا كەتسەك، ەلشى لاتيف گانديلوۆ ەكونوميكا عىلىمدارىنىڭ كانديداتى، ديپلوماتيالىق قىزمەتتەن بۇرىن (1995 -جىلدارى) باكۋ قالاسىندا كەشەندى دامۋ پروبلەمالارى عىلىمي-زەرتتەۋ ورتالىعىنىڭ اعا عىلىمي قىزمەتكەرى بولدى، پوليتەحنيكالىق ينستيتۋتتا ءدارىس بەرىپ، ساياسي ەكونوميكا كافەدراسىنىڭ دوتسەنتى بولعان. 2004-2010-جىلدار ارالىعىندا قازاقستانداعى ازەربايجان ەلشىلىگىن باسقاردى. 2010-جىلدىڭ مامىر ايىندا قازاقستاننىڭ «دوستىق» وردەنىمەن ماراپاتتالعان.
بەيجىڭدەگى دوڭگەلەك ۇستەلدى قازاقستاننىڭ قىتاي حالىق رەسپۋبليكاسىنداعى ەلشىلىگى ۇيىمداستىرىپ وتىر. شاراعا ش ى ۇ باس حاتشىسى دميتري مەزەنتسيەۆ، قىتايداعى ەلشىلەر اندرەي دەنيسوۆ (رەسەي)، قانايىم باقتىعۇلوۆا (قىرعىزستان)، چينار رۋستاموۆا (تۇركىمەنستان)، لاتيف گانديلوۆ (ازەربايجان)، سونداي-اق، تاجىك، ۋكراين، بەلارۋس ديپلوماتتارى، قىتاي حالىقتىق قوعامىنىڭ شەت مەملەكەتتەرمەن دوستىق قوعامى قىزمەتكەرلەرى، ق ح ر ۇلتتار ءىسى جونىندەگى مەملەكەتتىك كوميتەتىنىڭ وكىلدەرى، قىتايلىق عالىمدار قاتىستى.
ايتا كەتەرلىگى، قازاقستان حالقى اسسامبلەياسى ءتوراعاسىنىڭ ورىنباسارى - ق ر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى ەرالى توعجان باستاعان دەلەگاتسيا قۇرامىندا پارلامەنت ءماجىلىسىنىڭ دەپۋتاتتارى زۋحرا ساياپوۆا مەن نادەجدا نەستەروۆا، «دۇنعان ەتنومادەني ورتالىعى قاۋىمداستىعى» ق ب باسقارما مۇشەسى شاكير حاحازوۆ، «قازاقستانداعى ۇيعىرلاردىڭ رەسپۋبليكالىق مادەني ورتالىعى» ق ب ءتوراعاسى شايماردان نۋرۋموۆ، قازاقستان حالقى اسسامبلەياسى الماتى وبلىستىق حاتشىلىعىنىڭ مەڭگەرۋشىسى عابيت تۇرسىنباي، ق ر پرەزيدەنتى اكىمشىلىگى ق ح ا حاتشىلىعىنىڭ ينسپەكتورى ەدىل وسپان، سىرتقى ىستەر مينيسترلىگى سىرتقى ساياسي تالداۋ جانە بولجاۋلار دەپارتامەنتىنىڭ كەڭەسشىسى ايدا ەرمەكقاليەۆالار بولدى.
اۆتور: قانات مامەتقازى ۇلى
