اسكەري كيىمدەردى ەركىن ساۋدادا ساتۋعا شەكتەۋلەر ەنگىزىلەدى

استانا. قازاقپارات - اسكەري كيىمدەردى ەركىن ساۋدادا ساتۋعا شەكتەۋلەر ەنگىزىلەدى. بۇل تۋرالى بۇگىن پارلامەنت سەناتى ەكونوميكالىق ساياسات، وڭىرلىك دامۋ جانە كاسىپكەرلىك كوميتەتىنىڭ كەڭەيتىلگەن وتىرىسى بارىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋدا قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا ءمالىم بولدى.

قۇجاتتىڭ ماقساتى ساۋدا قىزمەتىن مەملەكەتتىك رەتتەۋدىڭ ادىستەرى مەن نىساندارىن جۇيەلەندىرۋ، ەلەكتروندىق ساۋدا سالاسىنداعى كاسىپكەرلىك سۋبەكتىلەرىنىڭ قىزمەتىن، بيرجالىق قىزمەت سالاسىن ودان ءارى جەتىلدىرۋ بولىپ وتىر. سونىمەن قاتار، زاڭ جوباسىندا ەلىمىزدىڭ سىرتقى ساۋدانى رەتتەۋ سالاسىنداعى زاڭناماسىن حالىقارالىق شارتتارعا، سونىڭ ىشىندە كەدەن وداعى مەن د س ۇ نورمالارىنا سايكەستەندىرۋ كوزدەلەدى.

بۇدان بولەك، زاڭ جوباسىندا ەلەكتروندىق ساۋدانى جۇزەگە اسىرۋ بارىسىندا ساتۋشىنىڭ، ونىڭ ىشىندە ساتۋشىنىڭ ءوزى تۋرالى اقپارات بەرۋ مىندەتى قاراستىرىلىپ وتىر. سونىمەن قاتار، ەلەكتروندىق ساۋدا بارىسىندا تۇتىنۋشىلاردىڭ قۇقىقتارىن قورعاۋ نورماسى قامتىلادى.

ۇلتتىق ەكونوميكا ۆيتسە-ءمينيسترى تيمۋر جاقسىلىقوۆتىڭ ايتۋىنشا، زاڭ جوباسىندا ىشكى ساۋدا قىزمەتى باعىتىندا ازىق-تۇلىك تاۋارلارىنىڭ تابيعي شىعىندارىن بەكىتۋ بويىنشا ۇكىمەتتىڭ قۇزىرەتتىلىگى ايقىندالادى.

سونىمەن قاتار، زاڭ جوباسىنىڭ اياسىندا ارنايى كيىمدەردى پايدالانۋ ارقىلى قۇقىق بۇزۋشىلىقتار، قىلمىستار جاساۋدى تەجەۋ شارالارى قامتىلىپ وتىر. اتاپ ايتقاندا، اسكەري جانە ارنايى كيىمدەر، نىساندى كيىمدەرگە جاتاتىن تاۋارلاردى ەركىن ساۋدادا ساتۋعا شەكتەۋلەر بەلگىلەنەدى. بۇدان باسقا، زاڭ جوباسىمەن «100 ناقتى قادام» ۇلت جوسپارىن جۇزەگە اسىرۋعا باعىتتالعان نورمالار دا قامتىلىپ وتىر.

تالقىلاۋدان سوڭ، كوميتەت مۇشەلەرى زاڭ جوباسىن الداعى ۋاقىتتا وتەتىن پالاتانىڭ جالپى وتىرىسىنا شىعارۋ تۋرالى شەشىم قابىلدادى.

اۆتور: قانات مامەتقازى ۇلى