قازاقستاندا العاش رەت كامەلەتكە تولماعانداردى زورلايتىندارعا ءومىر بويىنا باس بوستاندىعىنان ايىرۋ جازاسى ەنگىزىلدى
«2015-جىلدىڭ 1- قاڭتارىنان باستاپ قولدانىسقا ەنگەن قازاقستاننىڭ قىلمىستىق كودەكسىنە العاش رەت كامەلەتكە تولماعانداردى زورلاعاندارعا ءومىر بويىنا باس بوستاندىعىنان ايىرۋ جازاسى ەنگىزىلدى. سوت، سونىمەن قاتار 15-20 جىلعا دەيىن تۇرمەگە توعىتۋ جازاسىن دا تاڭداۋعا قۇقىلى»، - دەپ جازدى ادۆوكات ءوزىنىڭ Facebook پاراقشاسىندا.
وتەبەكوۆ جاقىندا الماتىداعى پودەزدىڭ بىرىندە كىشكەنتاي قىز بالاعا ازعىندىق ارەكەتتەر جاساعان پەدوفيلدى سوتتىڭ 15 جىلعا تۇرمەگە جابۋ جازاسىنا كەسكەنىن ەسكە سالدى. قىلمىس اياعىنا دەيىن جەتكىزىلمەگەندىكتەن، ودان ارتىق جازا تاعايىنداۋ مۇمكىن ەمەس دەيدى ادۆوكات. زاڭگەردىڭ سوزىنە سەنسەك، بۇل قىلمىس جاساۋعا وقتالۋ دەپ قاراستىرىلادى. ونداي كەزدەرى جازا مەرزىمى ماكسيمالدى مەرزىمنىڭ 3/4 بولىگىنەن ارتىق بولماۋى كەرەك.
وتەبەكوۆ 15 جىلعا توعىتىلعان پەدوفيل اياعىنا دەيىن جازاسىن وتەيتىنىن العا تارتتى. سەبەبى پەدوفيلدەرگە شارتتى تۇردە مەرزىمىنەن بۇرىن بوساتۋ سياقتى جازانى الماستىرۋ شارالارى قاراستىرىلماعان.
«جاڭا كودەكس پەدوفيلدەر ءۇشىن بارلىق جەڭىلدىكتەرگە جولدى جاۋىپ تاستادى! ولار ءۇشىن كەلەسى جاعدايلار الىنىپ تاستالدى: شارتتى سوتتاۋ؛ شارتتى تۇردە مەرزىمىنەن بۇرىن بوساتۋ؛ كەز كەلگەن ەسكىرۋ مەرزىمى؛ زارداپ شەگۋشى تاراپپەن كەلىسىمگە كەلۋ؛ اۋىر جاعدايلارعا دۋشار بولعاندىقتان نەمەسە ءوز ىسىنە وكىنەتىنىن دالەلدەي العاندىقتان بوساتۋ؛ وتەلمەگەن جازا مەرزىمىن ايىپپۇلعا نەمەسە بوستاندىعىن شەكتەۋ جازاسىنا الماستىرۋ؛ جازاسىن بالالارى بارىن ەسكەرە وتىرىپ، كەيىنگە شەگەرۋ؛ امنيستيا (كەشىرىم بەرۋ). كەرەمەت. الايدا بۇعان جەتۋ ءۇشىن ۇزاق جولدان وتۋگە تۋرا كەلدى»، - دەيدى ادۆوكات.
nur.kz
