نيۋ-يوركتە دارىندى قازاق سۋرەتشىسىنىڭ كورمەسى اشىلدى - كەسكىن

استانا. قازاقپارات - نيۋ-يوركتە ەلىمىزدىڭ دارىندى سۋرەتشىسى، يادرولىق قارۋعا قارسى «اتوم» جوباسىنىڭ ەلشىسى، كارىپبەك كۇيىكوۆتىڭ كورمەسى اشىلدى.

ونەر مايتالمانىنىڭ تۋىندىلارىن تاماشالاۋعا تانىمال ساياساتكەرلەر، قوعام قايراتكەرلەرى، ديپلوماتتار مەن بۇقارالىق اقپارات قۇرالدارىنىڭ وكىلدەرى كەلدى، دەپ حابارلايدى khabar.kz.

كارىپبەك كۇيىكوۆ تاعدىردىڭ قاتال جازۋىنا اۋەل باستان-اق مويىنسۇنباعان. ومىرگە دەگەن قۇشتارلىعىنىڭ ارقاسىندا سۋرەت سالۋعا دەن قويعان. قىلقالامدى اۋزىمەن نەمەسە اياعىمەن ۇستاپ، ءومىردىڭ كەز كەلگەن سىنىنان سۇرىنبەي وتۋگە شاقىرادى. ال سۇيىكتى ونەرىنە ءوزى ءتارىزدى اتومدىق سىناقتاردىڭ قاسىرەتىن تارتقان جانداردى ارقاۋ ەتەدى. نيۋ-يورك تورىندە دارىندى سۋرەتشىنىڭ بىرەگەي تۋىندىلارىن ب ۇ ۇ- نىڭ باس حاتشىسى پان گي مۋن تاماشالاپ، ءتانتى بولدى.

«قازاقستانعا يادرولىق قارۋعا قارسى باستاماسى ءۇشىن ريزاشىلىعىمىزدى بىلدىرەمىز. «اتوم» جوباسىنىڭ ەلشىسى كارىپبەك كۇيىكوۆ الەمدى يادرولىق قارۋدان الاستاپ قانا قويماي، ادامزاتتى دۇرىس ءومىر سۇرۋگە شاقىرادى»، - دەيدى كورمە قوناعى لاسسينا زەربو.

ب ۇ ۇ باس حاتشىسىنىڭ ساياسي ماسەلەلەرگە قاتىستى كومەكشىسى ميروسلاۆ ەنچا وسىدان بەس جىل بۇرىن سەمەي پوليگونىنا كەلگەن. ەلگە كەلگەن قوناق يادرولىق سىناقتىڭ ەل مەن جەرگە تيگىزگەن زاردابىن ءوز كوزىمەن كوردى.

ميروسلاۆ ەنچانىڭ پىكىرىنشە، كورمەدەگى سۋرەتتەر يادرولىق قارۋسىز الەم قالىپتاستىرۋ قاجەتتىگىن اشىق كورسەتەدى. قازاق سۋرەتشىسىنىڭ بىرەگەي تۋىندىلارى باسقا ادامدارعا ۇلگى بولۋى ءتيىس.

وتانداسىمىز كارىپبەك كۇيىكوۆتىڭ شىعارمالارىمەن بارلىق الەم حالىقتارى تانىس. دارىندى سۋرەتشى يادرولىق قارۋعا قارسى «اتوم» جوباسى اياسىندا بەلسەندىلىك تانىتىپ، ءتۇرلى حالىقارالىق دەڭگەيدەگى باس قوسۋلارعا قاتىسىپ جۇرەدى.

- قىلقالامدى اۋزىمەن نەمەسە اياعىمەن ۇستاپ، سۋرەت سالاتىن، جازۋ جازاتىن ادامداردى كورسەم ەرەكشە تاڭقالامىن. الايدا قازاقستاندىق سۋرەتشىنىڭ ەڭبەكتەرى تىپتەن كەرەمەت. كارىپبەك وسىعان دەيىن مۇنداي كورمەلەردى حيروسيما مەن ناگاساكيدە وتكىزگەندىگىن بىلەمىن، - دەپ تاڭدانىسىن جاسىرمادى ب ۇ ۇ باس حاتشىسىنىڭ ورىنباسارى يۋكيو تاكاسۋ.

كارىپبەك كۇيىكوۆ تاعدىرىنا ەشقاشان وكپە ايتىپ، مۇڭ شاعىپ كورگەن ەمەس. كەرىسىنشە، اعىسقا قارسى جۇزە بىلەتىن جانداردىڭ قاتارىنان. كورمەدە كورسەتىلگەن تۋىندىلار دا سۋرەتشىنىڭ ومىرگە دەگەن وزگەشە كوزقاراسىن تانىتا ءبىلدى.