قىتاي مەن قازاقستان اراسىنداعى ىنتىماقتاستىق جاڭا ساپالى كەزەڭگە اياق باستى - چجان ۆەي، ق ح ر- دىڭ الماتىداعى باس كونسۋلى

الماتى. قازاقپارات - قىتاي مەن قازاقستان اراسىنداعى ىنتىماقتاستىق جاڭا ساپالى كەزەڭگە اياق باستى.

ال ول بۇكىل الەمدىك قاۋىمداستىق الدىندا ەكى ەل اراسىنداعى تاتۋ كورشىلىكتىڭ، ءوزارا سىيلاستىقتىڭ جارقىن ۇلگىسىنە اينالادى. بۇگىن الماتىدا «قىتاي-قازاقستان» دوستىق جانە ىنتىماقتاستىق كەرۋەنىن سالتاناتتى جاعدايدا قارسى الۋ ءراسىمى بارىسىندا قىتاي حالىق رەسپۋبليكاسىنىڭ الماتىداعى باس كونسۋلى چجان ۆەي مىرزا وسىلاي دەدى.

«قىتاي مەن قازاق حالقى دوستىعىنىڭ تامىرى تەرەڭدە جاتىر. جاڭا تاريحي كەزەڭدە ەكى مەملەكەت ءوز مۇددەلەرىنە تولىقتاي جاۋاپ بەرە الاتىن جان-جاقتى ستراتەگيالىق ارىپتەستىكتى دامىتىپ جاتىر. بۇل بۇكىل ورتالىق ازيا ايماعىندا بەيبىتشىلىك پەن تۇراقتىلىقتىڭ ورناۋىنا سەپتىگىن تيگىزەدى»، - دەدى چجان ۆەي.

سونىمەن قاتار ول كەرۋەننىڭ سوڭعى ايالداماسى - تاراز قالاسى ەكەندىگىن جەتكىزدى.

«قازاقستان - ۇلى جىبەك جولى بويىنداعى العاشقى جانە ماڭىزدى ايالداما. بيىل تاراز قالاسىندا قازاق حاندىعىنىڭ 550 جىلدىعى كەڭ كولەمدە اتاپ وتىلەتىنى بەلگىلى. سوندىقتان، كەرۋەن 8 مىڭنان استام شاقىرىمدى قۇرايتىن ۇزاق تا اۋىر جولدى جولدى باسىپ ءوتىپ، ءوزىنىڭ سوڭعى نۇكتەسى - تاراز قالاسىنا كەلىپ، قىتاي حالقىنىڭ قازاق حالقىنا دەگەن دوستىق سەزىمى مەن قۇتتىقتاۋىن جەتكىزەدى. شىدامدىلىقتىڭ، باتىلدىقتىڭ، تاباندىلىقتىڭ جانە ماقساتكەرلىكتىڭ ۇلگىسىن تانىتقان بۇل كەرۋەن - ۇلى جىبەك جولى ەكونوميكالىق بەلدەۋى تۇجىرىمداماسى مەن «نۇرلى جول» باعدارلاماسىنىڭ جۇزەگە اسۋىنا جاڭا سەرپىن بەرەدى دەپ سەنەمىن. سونداي-اق، بۇل ق ح ر- دىڭ قۇرىلعانىنا 66 جىل تولۋىنا جانە قازاق حاندىعىنىڭ قۇرىلعانىنا 550 جىل تولۋىنا وراي جاسالعان تاماشا سىيلىق! 2000-جىلدان استام تاريحى بار ۇلى جىبەك جولى بۇگىن جاڭا رۋحاني كۇشكە يە بولدى»، - دەدى چجان ۆەي.

ايتا كەتەلىك، «قىتاي-قازاقستان» دوستىق جانە ىنتىماقتاستىق كەرۋەنى قازىر اباي داڭعىلىنىڭ بويىمەن باتىسقا قاراي ءجۇرىپ بارادى. قالادان شىققان سوڭ كەرۋەن ق ر پرەزيدەنتى نۇرسۇلتان نازاربايەۆتىڭ تۋعان اۋىلى - الماتى وبلىسىنىڭ قاراساي اۋدانىندا ورنالاسقان ءۇشقوڭىر (بۇرىنعى شامالعان) ەلدى مەكەنىنە بارىپ ايالدايدى. ودان ءارى كونە ۇلى جىبەك جولى بويىنداعى ءىرى ورتالىقتاردىڭ ءبىرى بولعان - تاراز قالاسىنا قاراي اتتانادى. جوسپار بويىنشا 7- قازانعا دەيىن كەلىپ جەتۋى ءتيىس. ويتكەنى، 8- قازاننان باستاپ، تاراز قالاسىندا قازاق حاندىعىنىڭ 550 جىلدىعىنا ارنالعان كەڭ كولەمدى مەرەكەلىك شارالار باستالادى. كەرۋەن ادەتتەگىدەي كۇنىنە 25 شاقىرىمنان ءجۇرىپ وتىرادى.

اۆتور: جاپپاربەرگەن ايبوتا