ۇلى جىبەك جولىنىڭ قايتا جاڭعىرۋى قازاقستان مەن قىتاي اراسىنداعى ىنتىماقتاستىقتى ارتتىرا تۇسەدى - ز. امانجولوۆا

الماتى. قازاقپارات - كونە ۇلى جىبەك جولىنىڭ بۇگىندە قايتا جاڭعىرۋى قازاقستان مەن قىتاي اراسىنداعى ىنتىماقتاستىقتى ارتتىرا تۇسەدى.

بۇل تۋرالى بۇگىن الماتىعا «قىتاي-قازاقستان» دوستىق جانە ىنتىماقتاستىق كەرۋەنىن باستاپ كەلگەن قىتايلىق دەلەگاتسيانى سالتاناتتى جاعدايدا قارسى الۋ بارىسىندا الماتى قالاسى اكىمىنىڭ ورىنباسارى زاۋرەش امانجولوۆا مالىمدەدى.

ونىڭ ايتۋىنشا، ۇلى جىبەك جولى بۇگىندە ەكى ەل اراسىندا ءوزارا ارەكەتتەستىك جانە ىنتىماقتاستىق جولىنا اينالۋدا.

«قىتاي-قازاقستان» دوستىق جانە ىنتىماقتاستىق كەرۋەنى بۇدان ءبىر جىل بۇرىن قىتايدىڭ چيان قالاسىنان شىققان بولاتىن. بۇگىن مىنە الماتى قالاسىنا كەلىپ جەتتى. مەن وسى كەرۋەندى الىپ كەلگەن قىتايلىق دەلەگاتسياعا «قوش كەلدىڭىزدەر!» دەگىم كەلەدى. ءبىز بۇعان وتە قۋانىشتىمىز. بۇگىن سونىمەن قاتار، الماتىدا قالا كۇنى تويلانىپ جاتىر. ياعني، «توي - تويعا ۇلاستى» دەگەن ءسوز. كەرۋەن كونە ۇلى جىبەك جولى ارقىلى كەلىپ وتىر. وزدەرىڭىز بىلەسىزدەر، بيىل ەلىمىزدە قازاقستان حالقى اسسامبلەياسى مەن قازاقستان كونستيتۋتسياسىنىڭ 20 جىلدىعى جانە قازاق حاندىعىنىڭ 550 جىلدىعى اتاپ ءوتىلىپ جاتىر. وسى تۇرعىدا «قازاقستان-قىتاي» دوستىق جانە ىنتىماقتاستىق كەرۋەنى - بۇل قىتاي حالقىنىڭ ۇلى جىبەك جولى ارقىلى بىزگە جەتكىزگەن ىستىق سالەمى»، - دەدى ز. امانجولوۆا.

سونىمەن قاتار، قالا اكىمىنىڭ ورىنباسارى بۇگىن مادەنيەت جانە دەمالىس ورتالىق ساياباعىنا جينالعان جۇرتشىلىقتى قالا كۇنىمەن قۇتتىقتادى.

«الماتى - قازاقستان حالقىنىڭ تاريحىندا ەرەكشە ورىن الاتىن قالا. قازاقستاندىقتاردىڭ باسىم كوپشىلىگىنىڭ ءومىرى مەن تاعدىرى الماتىمەن تىعىز بايلانىستى. سوندىقتان بارشالارىڭىزدى وسى قالا كۇنىمەن ءوز اتىمنان جانە الماتى قالاسىنىڭ اكىمى باۋىرجان قىدىرعالي ۇلى بايبەكتىڭ اتىنان شىن جۇرەكتەن قۇتتىقتايمىن»، - دەدى ز. امانجولوۆا.

ايتا كەتەلىك، بۇگىن قالا كۇنى قالانىڭ بارلىق اۋداندارىندا جانە ق ر تۇڭعىش پرەزيدەنتى ساياباعىندا اتاپ ءوتىلىپ جاتىر.

اۆتور: جاپپاربەرگەن ايبوتا